നിയന്ത്രണം വിട്ട കാർ നിർത്തിയിട്ടിരുന്ന വാഹനത്തിലേക്ക് ഇടിച്ചുകയറി; മൂന്ന് തമിഴ്‌നാട് സ്വദേശികൾക്ക് പരിക്ക്; ഒരാളുടെ നില ഗുരുതരം

പത്തനാപുരം: കൊല്ലം പുനലൂർ-മൂവാറ്റുപുഴ പാതയിൽ നിർത്തിയിട്ടിരുന്ന വാഹനത്തിന് പിന്നിൽ കാറിടിച്ച് മൂന്ന് പേർക്ക് പരിക്ക്. തമിഴ്‌നാട് തിരുനെൽവേലി സ്വദേശികൾക്കാണ് പരിക്കേറ്റത്. പത്തനാപുരം കടയ്ക്കാമണ്ണിലാണ് അപകടം സംഭവിച്ചത്. ഗുരുതരമായി പരിക്കേറ്റ സുബ്ബക്കുട്ടിയെ (27) തിരുവനന്തപുരത്തെ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

തകരാറിലായതിനെ തുടർന്ന് റോഡരികിൽ നിർത്തിയിട്ടിരിക്കുകയായിരുന്നു തിരുനെൽവേലി സ്വദേശികളുടെ ക്വാളിസ് ജീപ്പ്. ഈ വാഹനത്തിന്റെ കേടുപാടുകൾ പരിഹരിക്കാനായി പുറത്തുനിൽക്കുകയായിരുന്നു ഇവർ. ഈ സമയത്താണ് പുനലൂർ ഭാഗത്തുനിന്നും എത്തിയ ഇന്നോവ കാർ നിയന്ത്രണം തെറ്റി ക്വാളിസിന് പിന്നിലേക്ക് ഇടിച്ചു കയറിയത്. പരിക്കേറ്റ മറ്റ് രണ്ട് പേർ പുനലൂർ താലൂക്ക് ആശുപത്രിയിൽ ചികിത്സയിലാണ്.

പുന്നല സ്വദേശികളായ രണ്ട് യുവാക്കളാണ് ഇന്നോവ കാറിലുണ്ടായിരുന്നത്. ഇവർക്ക് പരിക്കുകളൊന്നുമില്ല. കാർ ഓടിച്ചിരുന്ന ആൾ ഉറങ്ങിപ്പോയതാകാം അപകടത്തിന് കാരണമായതെന്നാണ് പോലീസിന്റെ പ്രാഥമിക നിഗമനം. സംഭവത്തിൽ പത്തനാപുരം പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.

പുനലൂർ-മൂവാറ്റുപുഴ പാതയിലെ കടയ്ക്കാമൺ പ്രദേശം അപകടങ്ങളുടെ കേന്ദ്രമായി മാറുകയാണ്. കഴിഞ്ഞ മൂന്ന് മാസത്തിനിടെ മാത്രം പതിനഞ്ചോളം അപകടങ്ങളാണ് ഇവിടെ നടന്നതെന്ന് നാട്ടുകാർ പറയുന്നു. റോഡിലെ അശാസ്ത്രീയമായ നിർമ്മാണമാണോ അമിതവേഗതയാണോ അപകടങ്ങൾക്ക് കാരണമാകുന്നതെന്ന് അധികൃതർ പരിശോധിക്കണമെന്ന ആവശ്യം ശക്തമാണ്.