ക്ലാസ്‌റൂമിൽ വിദ്യാർത്ഥിയെ വിവാഹം ചെയ്ത് കോളേജ് അദ്ധ്യാപിക ! വീഡിയോ വിവാദമായതോടെ അന്വേഷണം പ്രഖ്യാപിച്ച് സർവകലാശാല

ക്ലാസ്‌റൂമിൽ വിദ്യാർത്ഥിയെ അദ്ധ്യാപിക വിവാഹം ചെയ്യുന്നതിന്റെ വീഡിയോ ദൃശ്യങ്ങൾ പുറത്ത് വന്നതിൽ വിവാദം കൊഴുക്കുന്നു. പശ്ചിമ ബംഗാൾ സർക്കാർ നിയന്ത്രണത്തിലുള്ള മൗലാന അബ്ദുൾ കലാം ആസാദ് സാങ്കേതിക സർവകലാശാല സൈക്കോളജി വിഭാഗത്തിൽ നടന്ന സംഭവത്തിൽ മുതിർന്ന വനിതാ പ്രൊഫസറാണ് ക്ലാസ് മുറിയിൽ വച്ച് വിദ്യാർത്ഥിയെ വിവാഹം ചെയ്തത്. വീഡിയോ വിവാദമായതോടെ സർവകലാശാല അന്വേഷണം പ്രഖ്യാപിച്ചു.

വധുവിനെ പോലെ അണിഞ്ഞൊരുങ്ങി നിൽക്കുന്ന അദ്ധ്യാപികയെയും വിദ്യാർത്ഥിയെയുമാണ് വീഡിയോയിൽ കാണാൻ സാധിക്കുന്നത്. ഒന്നാം വർഷ വിദ്യാർത്ഥിയെയാണ് അദ്ധ്യാപിക വിവാഹം ചെയ്യുന്നത്. സീമന്തരേഖയിൽ സിന്ദൂരമണിയിക്കാൻ അദ്ധ്യാപിക തല കുനിച്ചു കൊടുക്കുന്നതും വിദ്യാർത്ഥികൾ ആർപ്പ് വിളിക്കുന്നതും വീഡിയോ ദൃശ്യത്തിൽ കാണാം. ഹിന്ദു ബംഗാളി ആചാരപ്രകാരമാണ് ഇരുവരും വിവാഹം ചെയ്യുന്നത്. വീഡിയോയിലെ സംഭവത്തെ കുറിച്ച് അന്വേഷിക്കാൻ മൂന്നംഗ പാനലിനെയാണ് ചുമതലപ്പെടുത്തിയിരിക്കുന്നത്. സംഭവത്തിൽ അദ്ധ്യാപികയിൽ നിന്നും വിശദീകരണം തേടിയിട്ടുണ്ട്. അന്വേഷണം പൂർത്തിയാകുന്നത് വരെ അദ്ധ്യാപികയോടും വിദ്യാർത്ഥിയോടും ലീവിൽ പോവാനും സർവകലാശാല നിർദേശിച്ചിട്ടുണ്ട്.

അതേസമയം, ഇത് തന്റെ ക്ലാസിൽ നടന്ന നാടകത്തിന്റെ ഒരു ഭാഗമാണെന്നാണ് അദ്ധ്യാപികയുടെ വിശദീകരണം. കോളേജിന്റെ ഡോക്യുമെന്റേഷനായി ചിത്രീകരിച്ച വീഡിയോ സൈക്കോളജി ഡിപ്പാർട്ട്‌മെന്റിനെ മോശമാക്കി കാണിക്കാനായി മനപ്പൂർവം പുറത്ത് വിട്ടതാണെന്നും അദ്ധ്യാപിക ആരോപിക്കുന്നു.