കമ്മ്യൂണിസ്റ്റ് ഭീകരതയില്ലാത്ത ഭാരതം യാഥാർത്ഥ്യമാക്കും; ചുവപ്പുകൊടി മാറ്റി ത്രിവർണപതാക നാട്ടി,ഛത്തീസ്ഗഢിൽ 14,000 കോടിയുടെ പദ്ധതികൾക്ക് തുടക്കം കുറിച്ച് പ്രധാനമന്ത്രി നരേന്ദ്രമോദി

റായ്‌പൂർ : രാജ്യത്തെ കമ്മ്യൂണിസ്റ്റ് ഭീകര ബാധിത ജില്ലകളുടെ എണ്ണം കഴിഞ്ഞ 11 വർഷത്തിനിടെ 125-ൽ നിന്ന് മൂന്നായി കുറഞ്ഞതായി പ്രധാനമന്ത്രി നരേന്ദ്രമോദി. രാജ്യത്തിൻ്റെ എല്ലാ കോണുകളും മാവോയിസ്റ്റ് ഭീകരതയിൽ നിന്ന് പൂർണ്ണമായും മുക്തമാകുന്ന ദിവസം വിദൂരമല്ലെന്ന് അദ്ദേഹം പ്രഖ്യാപിച്ചു. ഛത്തീസ്ഗഢ് സംസ്ഥാനത്തിൻ്റെ 25-ാം സ്ഥാപക ദിനമായ ഇന്ന് റായ്‌പൂരിൽ സംസാരിക്കുകയായിരുന്നു പ്രധാനമന്ത്രി. നക്സലിസത്തിൽ നിന്നും കമ്മ്യൂണിസ്റ്റ് ഭീകരതയിൽ നിന്നും ഛത്തീസ്ഗഢ് ഇന്ന് മോചിതമാകുന്നതിൽ തനിക്ക് സന്തോഷമുണ്ടെന്നും മോദി പറഞ്ഞു.

ഛത്തീസ്ഗഢിൻ്റെ 25-ാം സ്ഥാപക ദിനത്തോടനുബന്ധിച്ച് (രജത മഹോത്സവം) സംസാരിച്ച പ്രധാനമന്ത്രി, 14,000 കോടി രൂപയുടെ വിവിധ വികസന പദ്ധതികൾക്ക് തുടക്കം കുറിക്കുകയും പുതിയ നിയമസഭാ മന്ദിരം ഉദ്ഘാടനം ചെയ്യുകയും ചെയ്തു.

“55 വർഷത്തിലേറെയായി ഈ നാട് അക്രമത്തിൻ്റെ പേരിൽ ദുരിതമനുഭവിച്ചു. അക്രമത്തിൻ്റെ ഈ കളിയിൽ എൻ്റെ ഗോത്ര സഹോദരീ സഹോദരങ്ങളെ നശിക്കാൻ എനിക്ക് വിട്ടുകൊടുക്കാനാവില്ല. മക്കൾക്കായി കരയുന്ന അമ്മമാരെ എനിക്ക് നോക്കിനിൽക്കാനാവില്ല. അതുകൊണ്ടാണ് 2014-ൽ നിങ്ങൾ എനിക്ക് അവസരം നൽകിയപ്പോൾ ഭാരതത്തെ കമ്മ്യൂണിസ്റ്റ് ഭീകരതയിൽ നിന്ന് മോചിപ്പിക്കാൻ ഞാൻ പ്രതിജ്ഞയെടുത്തത്. ഇന്ന് രാജ്യം അതിൻ്റെ ഫലങ്ങൾ കാണുന്നു,” പ്രധാനമന്ത്രി പറഞ്ഞു.

കമ്മ്യൂണിസ്റ്റ് ഭീകരർ കൂട്ടത്തോടെ കീഴടങ്ങിയ സമീപകാല സംഭവങ്ങൾ പ്രധാനമന്ത്രി എടുത്തു പറഞ്ഞു. “ദിവസങ്ങൾക്ക് മുൻപ് 30-ൽ അധികം കമ്മ്യൂണിസ്റ്റ് ഭീകരർ കങ്കറിൽ കീഴടങ്ങി, അതിനു മുൻപ് ബസ്തറിൽ 200-ൽ അധികം പേർ ആയുധം വെച്ച് ഇന്ത്യൻ ഭരണഘടനയെ അംഗീകരിച്ചു. രാജ്യത്തുടനീളം ലക്ഷങ്ങളും കോടികളും വിലയിട്ടിരുന്ന ഡസൻ കണക്കിന് ആളുകളാണ് ഇപ്പോൾ ആയുധം വെടിഞ്ഞ് സാധാരണ ജീവിതത്തിലേക്ക് മടങ്ങിയെത്തിയത്,” അദ്ദേഹം പറഞ്ഞു.

വർഷങ്ങളോളം രാജ്യം ഭരിച്ചവർ രാഷ്ട്രീയ നേട്ടത്തിനായി ഛത്തീസ്ഗഢിലെ ജനങ്ങൾക്ക് അന്യായങ്ങൾ വരുത്തിയെന്നും, കമ്മ്യൂണിസ്റ്റ് ഭീകരത കാരണം ഗോത്ര മേഖലകൾ റോഡുകൾ, വിദ്യാഭ്യാസം, ആശുപത്രികൾ എന്നിവ നിഷേധിക്കപ്പെട്ടുവെന്നും മോദി പറഞ്ഞു.

കമ്മ്യൂണിസ്റ്റ് ഭീകരതയുടെ അന്ത്യം “അസാധ്യമായതിനെ സാധ്യമാക്കി” എന്ന് പ്രധാനമന്ത്രി പറഞ്ഞു. “ബസ്തറിൽ ഇപ്പോൾ ഭയമില്ല, പകരം ആഘോഷമാണ്. ബസ്തർ ഒളിമ്പിക്സ് പോലുള്ള പരിപാടികൾ അവിടെ സംഘടിപ്പിക്കപ്പെടുന്നു. കമ്മ്യൂണിസ്റ്റ് ഭീകരതയുടെ വെല്ലുവിളികൾക്കിടയിലും ഛത്തീസ്ഗഢിന് ഇത്രത്തോളം പുരോഗമിക്കാൻ കഴിഞ്ഞെങ്കിൽ, ആ വെല്ലുവിളി ഇല്ലാതായാൽ സംസ്ഥാനം എത്ര വേഗത്തിൽ മുന്നോട്ട് പോകുമെന്ന് ചിന്തിച്ചു നോക്കൂ,

ബോംബുകളുടെയും വെടിയുണ്ടകളുടെയും ഭയത്തെ വികസനം മറികടന്നു. ബിജാപ്പൂർ ജില്ലയിലെ ചികപ്പള്ളി ഗ്രാമത്തിൽ ഏഴ് പതിറ്റാണ്ടിനിടെ ആദ്യമായി വൈദ്യുതി എത്തി. ഭീകരതയുടെ ശക്തികേന്ദ്രങ്ങളായി അറിയപ്പെട്ടിരുന്ന ഗ്രാമങ്ങൾ ഇന്ന് അഭിമാനത്തോടെ ദേശീയ പതാക ഉയർത്തുന്നു.” -മോദി കൂട്ടിച്ചേർത്തു.

പ്രധാനമന്ത്രി ₹14,000 കോടി രൂപയുടെ വികസന പദ്ധതികൾക്ക് തറക്കല്ലിടുകയും ഉദ്ഘാടനം ചെയ്യുകയും ചെയ്തു. പുതിയ റോഡുകൾ, ഭവന നിർമ്മാണം, ആരോഗ്യ സംരക്ഷണം, കണക്റ്റിവിറ്റി പദ്ധതികൾ എന്നിവ ഇതിൽ ഉൾപ്പെടുന്നു. പി.എം.എ.വൈ (പ്രധാനമന്ത്രി ആവാസ് യോജന) പ്രകാരം കഴിഞ്ഞ 12 വർഷത്തിനിടെ 4 കോടിയിലധികം കുടുംബങ്ങൾക്ക് വീടുകൾ നൽകി. ഛത്തീസ്ഗഢിൽ മാത്രം 3.5 ലക്ഷം കുടുംബങ്ങളാണ് ഇന്ന് പുതിയ വീടുകളിലേക്ക് പ്രവേശിച്ചത്.

ഛത്തീസ്ഗഢിൻ്റെ രൂപീകരണ യാത്ര അനുസ്മരിച്ചുകൊണ്ട് അടൽ ബിഹാരി വാജ്‌പേയിയാണ് സംസ്ഥാനത്തിന് രൂപം നൽകിയതെന്നും, മുൻ മുഖ്യമന്ത്രി രമൺ സിംഗ് പ്രത്യേക അഭിനന്ദനം അർഹിക്കുന്നുവെന്നും മോദി പറഞ്ഞു. വിഷ്ണു ദിയോ സായിയുടെ നേതൃത്വത്തിൽ സംസ്ഥാനം അതിവേഗം മുന്നോട്ട് പോകുകയാണെന്നും അദ്ദേഹം കൂട്ടിച്ചേർത്തു. 2000-ൽ ഒരു മെഡിക്കൽ കോളേജ് മാത്രമുണ്ടായിരുന്ന സ്ഥാനത്ത് ഇന്ന് 24 മെഡിക്കൽ കോളേജുകളും എയിംസ് റായ്പൂരും ഛത്തീസ്ഗഢിൻ്റെ പുരോഗതിയുടെ പ്രതീകമാണെന്നും അദ്ദേഹം ചൂണ്ടിക്കാട്ടി.

റായ്‌പൂരിൽ വിമാനമിറങ്ങിയ ഉടൻ, പ്രശസ്ത എഴുത്തുകാരൻ വിനോദ് കുമാർ ശുക്ല, പാണ്ഡവനി കലാകാരി ടീജൻ ഭായ് എന്നിവരെ വിളിച്ച് അവരുടെ ആരോഗ്യവിവരങ്ങൾ അന്വേഷിച്ച് മോദി സാംസ്കാരിക നേതാക്കളെ ആദരിച്ചു. നയാ റായ്പൂരിലെ ശ്രീ സത്യസായി സഞ്ജീവനി ഹാർട്ട് കെയർ ഹോസ്പിറ്റൽ സന്ദർശിച്ച അദ്ദേഹം, അവിടെ ചികിത്സയിലായിരുന്ന 2,500 കുട്ടികളുമായി സംവദിച്ചു.

പുതിയ നിയമസഭാ മന്ദിരത്തിൽ വാജ്‌പേയിയുടെ പ്രതിമ അനാച്ഛാദനം ചെയ്തുകൊണ്ട്, ‘നല്ല ഭരണത്തിൻ്റെ മന്ത്രം’ ‘നാഗരിക് ദേവോ ഭവഃ’ (പൗരൻ ദൈവമാണ്) ആണെന്നും പ്രധാനമന്ത്രി പറഞ്ഞു.