വയനാടുണ്ടായ ദുരന്തത്തിൽ സംസ്ഥാനം വിറങ്ങലിച്ചു നിൽക്കുമ്പോൾ എ എൻ ഷംസീർ അമേരിക്കയിലേക്ക് ! പാർട്ടിക്കുള്ളിൽ തന്നെ വിമർശനം ശക്തം

തിരുവനന്തപുരം : വയനാടുണ്ടായ ദുരന്തത്തിൽ കേരളം ഇപ്പോഴും വിറങ്ങലിച്ചു നിൽക്കുമ്പോൾ സ്പീക്കർ എ എൻ ഷംസീർ അമേരിക്കയിലേക്ക്. അമേരിക്കയിലെ കെന്റക്കി സംസ്ഥാനത്തിൽ നടക്കുന്ന നാഷനൽ ലെജിസ്ലേച്ചർ കോൺഫറൻസിൽ പങ്കെടുക്കാനാണ് സ്പീക്കർ എ എൻ ഷംസീർ പോയിരിക്കുന്നത്. 6,7 തീയതികളിലായാണ് പരിപാടി നടക്കുന്നത്.

അതേസമയം, സംസ്ഥാനം വയനാടുണ്ടായ ദുരന്തത്തിൽ പകച്ചു നിൽക്കുമ്പോൾ സ്പീക്കറുടെ വിദേശയാത്രയ്ക്കെതിരെ വിമർശനം ഉയരുന്നുണ്ട്. 350ലേറെ പേർ മരിക്കുകയും 200ലേറെ പേരെ കാണാതാകുകയും ചെയ്ത ദുരന്തത്തിന്റെ ആഘാതത്തില്‍ സംസ്ഥാനം നില്‍ക്കുമ്പോള്‍ സ്പീക്കർ കുടുംബവുമൊന്നിച്ച്‌ വിദേശത്തേക്ക് യാത്രപോയത് ശരിയല്ലെന്ന വിമർശനം പാർട്ടിക്കുള്ളിൽ തന്നെ ഉയരുകയാണ്.

സംസ്ഥാന നിയമസഭയുടെ സ്പീക്കർ എന്ന നിലയിലുളള ഔദ്യോഗിക പരിപാടിയാണെന്നാണ് സ്പീക്കറുടെ ഓഫീസിന്റെ വിശദീകരണം. മുഖ്യമന്ത്രിയും മന്ത്രിമാരും ഔദ്യോഗിക പരിപാടികള്‍ക്കായി വിദേശത്തേക്ക് പോകുന്നതിന് മുൻപ് വിദേശകാര്യമന്ത്രാലയത്തില്‍ നിന്ന് പൊളിറ്റിക്കല്‍ ക്ലിയറൻസ് വാങ്ങേണ്ടതുണ്ട്. എന്നാല്‍, അമേരിക്കൻ പര്യടനത്തിനായി യാത്രതിരിച്ചിരിക്കുന്ന സ്പീക്കർ എ എൻ ഷംസീർ വിദേശകാര്യ വകുപ്പില്‍ നിന്ന് പൊളിറ്റിക്കല്‍ ക്ലിയറൻസ് വാങ്ങിയിട്ടില്ല. അതിനു മറുപടിയായി ടിക്കറ്റും താമസവും മറ്റും പരിപാടിയുടെ സംഘാടകർ തന്നെയാണ് നല്‍കുന്നതെന്നും സർക്കാർ പണം ചെലവാക്കാത്തത് കൊണ്ടാണ് ഔദ്യോഗിക യാത്രയായിട്ടും പൊളിറ്റിക്കല്‍ ക്ലിയറൻസ് എടുക്കാതിരുന്നതെന്നാണ് നൽകുന്ന വിശദീകരണം.