“എന്നെ തകർക്കാൻ ആസൂത്രിത നീക്കം ! “സിപിഎം സംസ്ഥാന സെക്രട്ടേറിയേറ്റ് യോഗത്തിലും ആത്മകഥാ വിവാദത്തിന് പിന്നിൽ ഗൂഢാലോചനയെന്നാവർത്തിച്ച് ഇ പി ജയരാജൻ

തിരുവനന്തപുരം : ആത്മകഥാ വിവാദത്തിന് പിന്നിൽ ഗൂഢാലോചനയെന്നാവർത്തിച്ച് സിപിഎം കേന്ദ്രകമ്മിറ്റി അംഗവും മുൻ എൽഡിഎഫ് കൺവീനറായുമായ ഇ പി ജയരാജൻ. ഇന്ന് തിരുവനന്തപുരത്ത് ചേർന്ന സിപിഎം സംസ്ഥാന സെക്രട്ടേറിയേറ്റ് യോഗത്തിലാണ് ജയരാജൻ നിലപാട് വീണ്ടും ആവർത്തിച്ചത്.

“തന്നെ തകർക്കാൻ ആസൂത്രിത നീക്കം നടക്കുന്നുണ്ടെന്ന് യോഗത്തിൽ അദ്ദേഹം പറഞ്ഞു. തെരഞ്ഞെടുപ്പ് സമയത്ത് പുസ്തകം പുറത്ത് വന്നതിന് പിന്നിൽ ഗൂഢാലോചനയുണ്ട്. സംഭവത്തിൽ ഡിജിപിക്ക് പരാതി നൽകിയിട്ടുണ്ട്. വസ്തുതാപരമായി കാര്യങ്ങൾ പരിശോധിക്കണം “- ഇ പി ജയരാജൻ പറഞ്ഞു.

യോഗത്തിൽ നിന്ന് ആദ്യം പുറത്തിറങ്ങിയതും ഇ പി ജയരാജനായിരുന്നു. പക്ഷെ പുറത്തുണ്ടായിരുന്ന മാദ്ധ്യമ പ്രവർത്തകരോട് അദ്ദേഹം കൂടുതൽ വിശദീകരണം നൽകാൻ തയ്യാറായില്ല.

അതേസമയം പാലക്കാട്ടെ ഇടത് സ്വതന്ത്രസ്ഥാനാർത്ഥി ഡോ. പി സരിനെ കഴിഞ്ഞ ദിവസം പുകഴ്ത്തി ഇപി ജയരാജൻ രംഗത്ത് വന്നിരുന്നു. പൊതു സമൂഹത്തോട് പ്രതിജ്ഞ ബദ്ധനായ ചെറുപ്പക്കാരനാണെന്നും ജനസേവനത്തിനായി ജോലി പോലും രാജിവെച്ചുവെന്നും ഇപി ജയരാജൻ പറഞ്ഞു. വയനാട്, ചേലക്കര ഉപതെരഞ്ഞെടുപ്പ് ദിനത്തിൽ ഇപിയുടേതായി പ്രചരിച്ച ആത്മകഥാ ഭാഗത്തിൽ സർക്കാരിനും സിപിഎമ്മിനുമെതിരായ വിമർശനങ്ങൾക്ക് പുറമെ സരിൻ വയ്യാവേലിയാകുമെന്ന പരാമർശവുമുണ്ടായിരുന്നു.