അയോദ്ധ്യ ശ്രീരാമക്ഷേത്രത്തിന്റെ മാതൃകയിൽ അമേരിക്കയിൽ ക്ഷേത്രമുയരുന്നു; കുടുംബക്ഷേത്രങ്ങളിലെ മണ്ണ് കൊണ്ടുവന്ന് ക്ഷേത്ര ഭൂമിയിൽ പ്രതിഷ്ഠിക്കാനും അവസരം

വാഷിംഗ്ടൺ: അയോദ്ധ്യ ശ്രീരാമക്ഷേത്രത്തിന്റെ മാതൃകയിൽ അമേരിക്കയിൽ ക്ഷേത്രം നിർമ്മിക്കാനൊരുങ്ങി സ്വാമി സത്യാനന്ദ സരസ്വതി ഫൗണ്ടേഷൻ. അമേരിക്കയിലെ ഹ്യൂസ്റ്റണിൽ പെയർലാൻഡിൽ ശ്രീമീനാക്ഷി ക്ഷേത്രത്തിന് അഭിമുഖമായിട്ടാകും ശ്രീരാമക്ഷേത്രം നിർമ്മിക്കുക. അഞ്ചേക്കർ ഭൂമിയിലാണ് ക്ഷേത്രം നിർമ്മിക്കുക. കേരളത്തിലെ കുടുംബക്ഷേത്രങ്ങളിലോ പരദേവതാ ക്ഷേത്രങ്ങളിലോ നിന്ന് ഒരു മണ്ണ് കൊണ്ടുവന്ന് പുതിയ ക്ഷേത്ര ഭൂമിയിൽ പ്രതിഷ്ഠിക്കാനുള്ള അവസരവും ഒരുക്കിയിട്ടുണ്ട്. ആവശ്യമുള്ളപ്പോൾ കലശം പുറത്തെടുത്ത് പൂജ ചെയ്യാനും അവസരം നൽകും ഇത് അവരുടെ കുടുംബക്ഷേത്രമായി ഔദ്യോഗികമായി ബന്ധപ്പെടുത്തപ്പെടുമെന്ന് കോർഡിനേറ്റർ രഞ്ജിത് പിള്ള പറഞ്ഞു.

ഒരു കുടുംബമോ വംശമോ പാരമ്പര്യമായി ആരാധിക്കുന്ന ദേവതകളോടുള്ള ആത്മബന്ധത്തെ ആഴത്തിൽ അംഗീകരിക്കുന്ന സംരംഭമാണിത്. കുടുംബത്തിന്റെയും വംശത്തിന്റെയും രക്ഷാധികാരിയായി കണക്കാക്കപ്പെടുന്ന പരദേവതകളുടെ ആചാരപരമായ ധർമങ്ങൾ കൃത്യമായി പാലിക്കുന്നതിലൂടെ ആത്മീയ സംരക്ഷണം ഉറപ്പാക്കപ്പെടും.