ട്യൂഷൻ ക്ലാസിൽ പത്തു വയസുകാരിയെ ലൈംഗികാതിക്രമത്തിനിരയാക്കി!!! 76 വയസുകാരനായ അദ്ധ്യാപകന് പത്തുവർഷം തടവും 10000 രൂപ പിഴയും ശിക്ഷ വിധിച്ച് അതിവേഗ പ്രത്യേക കോടതി

തിരുവനന്തപുരം: ട്യൂഷൻ ക്ലാസിൽ പത്തു വയസുകാരിയെ ലൈംഗികാതിക്രമത്തിനിരയാക്കിയ കേസിൽ 76 വയസുകാരനായ അദ്ധ്യാപകന് പത്തുവർഷം തടവും 10000 രൂപ പിഴയും ശിക്ഷ വിധിച്ച് തിരുവനന്തപുരം അതിവേഗ പ്രത്യേക കോടതി . മുട്ടത്തറ വില്ലേജിൽ അംബിക ഭവൻ വീട്ടിൽ ദേവദാസിനെയാണ് ശിക്ഷിച്ചത്. പിഴത്തുക കുട്ടിക്ക് നൽകണമെന്നും പിഴ അടച്ചില്ലെങ്കിൽ രണ്ടുമാസം കൂടുതൽ തടവ് അനുഭവിക്കണമെന്നും വിധിയിലുണ്ട്

2023 ഫെബ്രുവരി രണ്ടിനായിരുന്നു കേസിനാസ്പദമായ സംഭവം. ക്ലാസ്സിൽ മറ്റു കുട്ടികൾ ഇല്ലാത്ത സമയത്ത് പ്രതി കുട്ടിയുടെ സ്വകാര്യഭാ​ഗത്ത് കടന്നു പിടിക്കുകയായിരുന്നു. ഭയന്ന കുട്ടി സംഭവം ആരോടും തുറന്നുപറഞ്ഞില്ല. പിന്നീട് ട്യൂഷൻ ക്ലാസിൽ പോകാൻ വിസമ്മതിച്ചതിനെ തുടർന്ന് കാര്യം തിരക്കിപ്പോഴാണ് കുട്ടി വിവരം തുറന്നുപറഞ്ഞത്. ഉടൻ തന്നെ മാതാപിതാക്കൾ ട്യൂഷൻ സെൻ്ററിലെ പ്രിൻസിപ്പലിനെ വിവരം അറിയിക്കുകയും തുടർന്ന് പോലീസിൽ പരാതി നൽകുകയുമായിരുന്നു.

ഭാര്യയും താനും രോഗികളായതിനാലും മക്കൾ ഇല്ലാത്തതിനാലും ശിക്ഷ കുറയ്ക്കണമെന്ന് പ്രതി കോടതിയോട് അപേക്ഷിച്ചുവെങ്കിലും അധ്യാപകനായ പ്രതി ചെയ്ത കൃത്യത്തിന് യാതൊരു ദയയും അർഹിക്കുന്നില്ലെന്ന് കോടതി വിധിന്യായത്തിൽ പറഞ്ഞു. എന്നാലും ഈ സാഹചര്യങ്ങൾ പരിഗണിച്ച് പ്രതിക്ക് കോടതി വെറും തടവ് ആണ് വിധിച്ചത്.