”ദി കശ്മീർ ഫയൽസ് ചരിത്രത്തിന്‍റെ ഭാഗമായ സിനിമ, ഞാൻ തീർച്ചയായും കാണും”; സിനിമയെ പ്രശംസിച്ച് നടൻ ആമിർ ഖാൻ

ദില്ലി: ദി കശ്മീർ ഫയൽസ് ചരിത്രത്തിന്‍റെ ഭാഗമായ സിനിമയെന്ന് ബോളിവുഡ് താരം ആമിർ ഖാൻ(Aamir Khan says every Indian should watch The Kashmir Files). ഈ ചിത്രം എല്ലാവരുടെയും ഹൃദയത്തെ സ്‌പര്‍ശിക്കുമെന്നും, കാശ്മീരി ഹിന്ദുക്കളുടെ വംശഹത്യയുടെ കഥപറയുന്ന ‘ദി കശ്മീർ ഫയൽസ്’ താൻ കാണുമെന്നും താരം പറഞ്ഞു.

തെലുങ്ക് ചിത്രം RRR ന്റെ റിലീസിങ്ങുമായി ബന്ധപ്പെട്ട് ദില്ലിയിൽ നടന്ന വാർത്താസമ്മേളനത്തിനിടെ മാധ്യമപ്രവർത്തകരുടെ ചോദ്യത്തിന് മറുപടി പറയവെയായിരുന്നു അദ്ദേഹത്തിന്റെ പ്രതികരണം. സിനിമയെക്കുറിച്ചുള്ള ഖാന്റെ കാഴ്ചപ്പാട് എന്താണെന്ന ചോദ്യത്തിന് അത് നമ്മുടെ ഹൃദയങ്ങളെ തകർക്കുന്ന ചരിത്രത്തിന്റെ ഭാഗമാണെന്നും കശ്മീരി പണ്ഡിറ്റുകൾക്ക് എന്ത് സംഭവിച്ചാലും അത് അപലപനീയമാണെന്നുമായിരുന്നു ഖാന്റെ മറുപടി. അതേസമയം എല്ലാവരും സിനിമ കാണണമെന്നും കശ്മീരി ഹിന്ദുക്കൾക്ക് സംഭവിച്ചത് അപലപനീയമാണെന്നും അദ്ദേഹം പ്രതികരിച്ചു.

ആമിർ ഖാന്റെ വാക്കുകൾ ഇങ്ങനെ:

”ഇത്തരമൊരു വിഷയത്തെ ആസ്പദമാക്കിയുള്ള ഏത് സിനിമയും എല്ലാ ഇന്ത്യക്കാരും കണ്ടിരിക്കണം. ഞാൻ തീർച്ചയായും ഇത് കാണും. കശ്‌മീരി പണ്‌ഡിറ്റുകള്‍ക്ക്‌ എന്ത്‌ സംഭവിച്ചു എന്നത്‌ വളരെ ഖേദകരമാണ്. ഇതുപോലൊരു സിനിമ എല്ലാ ഇന്ത്യക്കാരും കാണണം. അതിലൂടെ അവര്‍ക്ക്‌ സംഭവിച്ചത്‌ ഓര്‍ക്കാന്‍ കഴിയും. മനുഷ്യത്വത്തില്‍ വിശ്വസിക്കുന്ന എല്ലാവരുടെയും വികാരങ്ങളെ സ്‌പര്‍ശിച്ച ചിത്രമാണിത്‌. അത്‌ തന്നെയാണ് ഈ ചിത്രത്തെ മനോഹരമാക്കുന്നത്‌” എന്നും ആമിർ ഖാൻ പറഞ്ഞു.

അതേസമയം വിമർശനങ്ങളെ അതിജീവിച്ച് വിജയകരമായി പ്രദർശനം തുടരുകയാണ് വിവേക് ​​രഞ്ജൻ അഗ്നിഹോത്രിയുടെ ‘ദി കശ്മീർ ഫയൽസ്’ എന്ന ചിത്രം. രാജ്യമൊട്ടാകെ 630 തിയേറ്ററുകളിലാണ് ചിത്രം പ്രദര്‍ശനത്തിനെത്തിയത്‌. സിനിമയുടെ ഗംഭീര പ്രതികരണത്തിന് ശേഷം മലയാളം, തമിഴ്‌, തെലുങ്ക്‌, കന്നഡ എന്നി ഭാഷകളിലും ‘കശ്‌മീര്‍ ഫയല്‍സ്‌’ ഡബ്ബ്‌ ചെയ്‌തു. റിലീസ്‌ ചെയ്‌ത ആദ്യ ആഴ്‌ചയില്‍ തന്നെ ‘കശ്‌മീര്‍ ഫയല്‍സ്‌’ 100 കോടി ക്ലബ്ബില്‍ ഇടംപിടിച്ചിരുന്നു.