അബ്‌റാ കാ ഡാബ്‌റാ ..’14 മിനിറ്റ്’ മിറാക്കിളുമായി വന്ദേ ഭാരത് ! അടുത്ത റൂട്ടിലേക്കുള്ള കുതിപ്പിന് സജ്ജമാക്കാൻ വെറും 14 മിനിറ്റ് ; പദ്ധതിക്ക് ഇന്ന് തുടക്കമാകും

ദില്ലി : അതിവേഗം കുതിക്കുന്ന വന്ദേ ഭാരത് ഇനി മുതൽ അടുത്ത റൂട്ടിലേക്കുള്ള യാത്രയ്ക്ക് സജ്ജമാകുന്നത് വെറും 14 മിനിറ്റിൽ .14 മിനിറ്റ് മിറാക്കിൾ എന്ന് പറയപ്പെടുന്ന ഈ സംരംഭത്തിന് ഇന്ന് തുടക്കമാകും .ദില്ലിയിലെ ആനന്ദ് വിഹാർ, ചെന്നൈ, പുരി, ഷിർദി എന്നിവയുൾപ്പെടെ 29 ഇടങ്ങളിലാണ് സംരംഭ൦ യാഥാർഥ്യമാകുന്നത് .

നിലവിൽ വന്ദേഭാരത് എക്‌സ്പ്രസുകൾ വൃത്തിയാക്കി അടുത്ത യാത്രയ്‌ക്ക് സജ്ജമാക്കാൻ ഏകദേശം 45 മിനിറ്റ് ആണ് എടുക്കുക.എന്നാൽ ഇനി മുതൽ വന്ദേ ഭാരത് എക്സ്പ്രസുകൾ 14 മിനിറ്റിനുള്ളിൽ വൃത്തിയാക്കി അടുത്ത യാത്രയ്‌ക്ക് സജ്ജമാകും.ദില്ലിയിൽ തുടക്കം കുറിക്കുന്ന ഈ സംരംഭത്തിന് റെയിൽവേ മന്ത്രി അശ്വിനി വൈഷ്ണവ് പങ്കെടുക്കും.ജപ്പാനിലെ ബുള്ളറ്റ് ട്രെയിനുകൾ ശുചീകരിക്കുന്ന ‘7 മിനിറ്റ് മിറാക്കിൾ’ പദ്ധതിക്ക് സമാനമായാണ് വന്ദേ ഭാരത് ഇത് നടപ്പിലാക്കുന്നത്.

വന്ദേഭാരത് എക്‌സ്പ്രസുകളുടെ ഓരോ കോച്ചിലും മൂന്ന് ക്ലീനിംഗ് സ്റ്റാഫുകളാകും ഉണ്ടാകുകയെന്ന് അധികൃതർ വ്യക്തമാക്കി. ഇതിന് മുന്നോടിയായി ജീവനക്കാർക്ക് പരിശീലനം നൽകിയിട്ടുണ്ട്.കേന്ദ്ര റെയിൽവേ മന്ത്രാലയത്തിന്റെ ‘സ്വച്ഛത ഹി സേവ’ കാമ്പയിന്റെ ഭാഗമായിട്ടാണ് ഈ പുതിയ പദ്ധതി നടപ്പിലാക്കുന്നത്. പ്രത്യേക പരിശീലനം നൽകിയിട്ടുള്ള ശുചീകരണ തൊഴിലാളികൾ ആണ് ’14 മിനിറ്റ് മിറാക്കിൾ’ പദ്ധതിയിൽ പങ്കെടുക്കുന്നത്.എല്ലാ യാത്രികരും കൃത്യസമയത്ത് തന്നെ ടെർമിനൽ സ്റ്റേഷനിൽ ഇറങ്ങിയെന്ന് ഉറപ്പാക്കിയതിന് ശേഷമായിരിക്കും ശുചീകരണ പ്രവർത്തനങ്ങൾ ആരംഭിക്കുക.