കോന്നിയിലെ പാറമടയിൽ അപകടം ! 2 തൊഴിലാളികൾ കുടുങ്ങി; ദേശീയ ദുരന്തര നിവാരണ സേന അപകടസ്ഥലത്തേക്ക് തിരിച്ചു

പത്തനംതിട്ട കോന്നിയിലെ പാറമടയിലുണ്ടായ അപകടത്തിൽ രണ്ട് അന്യസംസ്ഥാന തൊഴിലാളികൾ പാറകൾക്കിടയിൽ അകപ്പെട്ടു. പാറ നീക്കംചെയ്യുന്നതിനിടെ ഹിറ്റാച്ചിയ്ക്ക് മുകളിലേയ്ക്ക് ഇടിഞ്ഞുവീണാണ് അപകടമുണ്ടായത്. ഹിറ്റാച്ചി ഓപ്പറേറ്ററും സഹായിയുമാണ് അപകടത്തില്‍പ്പെട്ടത്. ഹിറ്റാച്ചി പൂര്‍ണമായും തകര്‍ന്ന നിലയിലാണ്.

ജാര്‍ഖണ്ഡ്, ഒറീസ സ്വദേശികളാണ് കുടുങ്ങിക്കിടക്കുന്നത്. പാറ അവശിഷ്ടങ്ങൾക്കിടയിൽനിന്ന് ഇവരെ പുറത്തെടുക്കാനുള്ള ശ്രമം നടക്കുകയാണ്. ഉച്ചകഴിഞ്ഞ് മൂന്നുമണിയോടെയായിരുന്നു അപകടം. അപകടം നടന്ന സ്ഥലത്തേക്ക് എത്തിച്ചേരാൻ വഴികളില്ലാത്തതിനാൽ രക്ഷാപ്രവർത്തനം ദുഷ്കരമാണ്. പാറ അടർന്നു വീഴുന്നത് തുടരുന്നതിനാല്‍ രക്ഷാപ്രവര്‍ത്തനം പ്രയാസകരമാണ്. ദേശീയ ദുരന്തര നിവാരണ സേന അപകടസ്ഥലത്തേക്ക് തിരിച്ചുവെന്നാണ് വിവരം