ദളപതി നടനം ഇനി തിരശീലയിൽ കാണുക രണ്ട് ചിത്രങ്ങളിൽ കൂടി മാത്രം! കരാർ ഒപ്പിട്ട ചിത്രങ്ങൾ പൂർത്തിയാക്കിയ ശേഷം അഭിനയം നിർത്തി മുഴുവൻ സമയവും രാഷ്ട്രീയത്തിന് വേണ്ടി മാറ്റി വെക്കുമെന്ന് നടൻ വിജയ് !

തമിഴക വെട്രി കഴകം എന്ന തന്റെ രാഷ്ട്രീയ പാർട്ടിയുടെ പേര് പ്രഖ്യാപിച്ചതിന് പിന്നാലെ കരാർ ഒപ്പിട്ട ചിത്രങ്ങൾ പൂർത്തിയാക്കിയ ശേഷം അഭിനയം നിർത്തുമെന്നും മുഴുവൻ സമയവും രാഷ്ട്രീയത്തിന് വേണ്ടി മാറ്റി വെക്കുമെന്നുമുള്ള തീരുമാനം വെളിപ്പെടുത്തി വിജയ്. പാർട്ടിയുടെ പേര് പുറത്ത് വന്നതിന് പിന്നാലെ പുറത്തിറക്കിയ താരത്തിന്റെ പ്രസ്താവനയിലാണ് ഇക്കാര്യം വ്യക്തമാക്കിയിരിക്കുന്നത്. ആരാധക സംഘടനയായ വിജയ് മക്കൾ ഇയക്കം അംഗങ്ങളാണ് രാഷ്ട്രീയ പാർട്ടി രജിസ്റ്റർ ചെയ്യാൻ മുൻകൈ എടുത്തത്. രജിസ്ട്രേഷൻ പൂർത്തിയാക്കിയതിന് ശേഷമാണ് പാർട്ടിയുടെ പേര് പ്രഖ്യാപിച്ചത്.

‘എന്നെ സംബന്ധിച്ച് രാഷ്ട്രീയം എനിക്ക് മറ്റൊരു ജോലിയല്ല. അതൊരു വിശുദ്ധ ജോലിയാണ്. രാഷ്ട്രീയ ഉയരങ്ങൾ മാത്രമല്ല, രാഷ്ട്രീയത്തിൻ്റെ നീളവും പരപ്പും എൻ്റെ മുൻഗാമികളിൽ നിന്ന് പഠിക്കേണ്ടതുണ്ടെന്ന് ഞാൻ മനസ്സിലാക്കി. അതിനായി ഞാൻ മാനസികമായി തയ്യാറെടുക്കുകയാണ്. രാഷ്ട്രീയം ഒരു ഹോബിയല്ല, അത് എൻ്റെ അഗാധമായ ആഗ്രഹമാണ്. രാഷ്ട്രീയ പ്രവർത്തനത്തെ ബാധിക്കാതെ ഇതുവരെ കരാറൊപ്പിട്ട സിനിമകൾ പൂർത്തിയാക്കും. അതിനുശേഷം പൂർണമായും രാഷ്ട്രീയത്തിൽ മുഴുകും’, വിജയ് പ്രസ്താവനയിൽ പറഞ്ഞു.

തമിഴ്നാട്ടിലെ മുഴുവന്‍ നിയോജക മണ്ഡലങ്ങളിലെയും വിജയ് മക്കള്‍ ഇയക്കം ഭാരവാഹികളുമായി കഴിഞ്ഞ വര്‍ഷം ചെന്നൈയില്‍ വിജയ് കൂടിക്കാഴ്ച നടത്തിയിരുന്നു. നിരാലംബരായ വിദ്യാര്‍ത്ഥികള്‍ക്ക് പഠനത്തിന് സഹായിക്കുന്ന ട്യൂഷന്‍ സെന്‍ററുകള്‍ വിജയ് മക്കള്‍ ഇയക്കം ആരംഭിച്ചിരുന്നു. വിജയ് ചിത്രമായ ലിയോയുടെ വിജയാഘോഷവുമായി ബന്ധപ്പെട്ട് നടന്ന പരിപാടിയിൽ രാഷ്ട്രീയ പ്രവേശത്തെക്കുറിച്ച് താരം സംസാരിക്കുമെന്നായിരുന്നു കരുതിയിരുന്നത്.

നിലവിൽ പടിവാതിൽക്കൽ എത്തിനിൽക്കുന്ന ലോക്സഭാ തെരഞ്ഞെടുപ്പിൽ തമിഴക വെട്രി കഴകം മത്സരിക്കില്ല. രണ്ട് വർഷത്തിനപ്പുറമുള്ള തമിഴ്‌നാട് നിയമസഭാ തെരഞ്ഞെടുപ്പിലാകും പാർട്ടി മത്സരിക്കുക. ഡിഎംകെയ്ക്കും മുഖ്യമന്ത്രി എം കെ സ്റ്റാലിനും തമിഴ്‌നാട് രാഷ്ട്രീയ രംഗത്തിൽ ഇതുവരെയും ശക്തരായ എതിരാളികൾ ഉണ്ടായിരുന്നില്ല. വിജയ്‌യുടെ പ്രവേശനത്തോടെ തമിഴ്‌നാട്ടിൽ രാഷ്ട്രീയ പോര് കനക്കും.