അദാനി: കലുഷിതമായി പാർലമെന്റ്;നഷ്ട്ടപെട്ടതെല്ലാം തിരികെ പിടിക്കാനുറച്ച് വിപണിയിൽ തിരിച്ചുകയറി അദാനി ഓഹരികൾ

ദില്ലി : ഹിൻഡൻബർഗ് റിപ്പോർട്ടിനെത്തുടർന്ന് പ്രതിരോധത്തിലായ അദാനി ഗ്രൂപ്പ് ഓഹരികൾക്കെതിരായ ആരോപണങ്ങൾ സംയുക്ത പാർലമെന്ററി സമിതി അന്വേഷിക്കണമെന്നാവശ്യപ്പെട്ട് പ്രതിപക്ഷ അംഗങ്ങൾ സഭാനടപടികൾ തടസ്സപ്പെടുത്തിയതോടെ ലോക്‌സഭ ചൊവ്വാഴ്ച ഉച്ചയ്ക്ക് 12 വരെ നിർത്തി വയ്‌ക്കേണ്ടി വന്നു. രാജ്യസഭാ നടപടികളും ഉച്ചയ്ക്ക് 12 വരെ നിർത്തി. ഉച്ചയ്ക്ക് 12 ന് വീണ്ടും ലോക്സഭ ചേർന്നെങ്കിലും ബഹളം ആവർത്തിച്ചതിനെ തുടർന്ന് രാജ്യസഭ ഉച്ചയ്ക്ക് രണ്ടു മണി വരെ വീണ്ടും നിർത്തിവച്ചു

അതെ സമയം അദാനി ഗ്രൂപ്പ് ഓഹരികൾ വിപണിയിൽ നഷ്ടത്തിൽ നിന്ന് പതിയെ കര കയറുന്ന കാഴ്ചയാണ് ഇന്ന് കണ്ടത്. ഗ്രൂപ്പ് ഓഹരികളിൽ അദാനി എന്റർപ്രൈസസ് ആദ്യ ട്രേഡിങ് സെഷനിൽ 20 ശതമാനം അപ്പർ സർക്യുട്ട് പരിധിയിൽ മികച്ച നേട്ടത്തിലായി. വിപണികളിൽ ലിസ്റ്റ് ചെയ്ത പത്ത് അദാനി ഓഹരികളിൽ രണ്ടെണ്ണം ഒഴികെ മറ്റെല്ലാം മുന്നേറ്റം കാട്ടി.

അദാനി ഗ്രീൻ എനർജി, അദാനി പോർട്ട്സ്, അദാനി ട്രാൻസ്മിഷൻ എന്നീ മൂന്ന് പ്രധാന കമ്പനികളുടെ 110 കോടി ഡോളർ വായ്പയുടെ 2024 സെപ്തംബർ മാസത്തെ തിരിച്ചടവ് കാലാവധിക്ക് മുൻപു തന്നെ അദാനി ഗ്രൂപ്പ് പ്രമോട്ടർമാർ മുൻകൂറായി അടയ്ക്കുമെന്ന പ്രഖ്യാപനമാണ് ഓഹരി വില മുന്നേറിയതിന് കാരണമായത്.