“രാഹുൽ അവരുടെ കണ്ണീർ കുടിച്ചിട്ട് പോയി. എന്നാൽ, അവരുടെ കണ്ണീരൊപ്പിയില്ല.” – രാഹുൽ ​ഗാന്ധിയുടെ വയനാട് സന്ദർശനത്തിന് പിന്നാലെ അതിരൂക്ഷ വിമർശനവുമായി എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍

കോൺ​ഗ്രസ് നേതാവ് രാഹുൽ ​ഗാന്ധിക്കെതിരെ അതിരൂക്ഷ വിമർശനവുമായി എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. രാഹുൽ വയനാട്ടിലെത്തിയതിന് പിന്നിൽ രാഷ്ട്രീയമാണെന്നും അദ്ദേഹം ആരോപിച്ചു. വയനാട്ടിൽ വന്യജീവി ആക്രമണത്തിൽ തുടർച്ചയായി ആളുകൾ കൊല്ലപ്പെടുന്ന പശ്ചാത്തലത്തിൽ വയനാട് എംപിയായ രാഹുൽ ഗാന്ധി ഇന്നാണ് ആക്രമണത്തില്‍ കൊല്ലപ്പെട്ടവരുടെ വീടുകൾ സന്ദർശിച്ചത്. പയ്യമ്പള്ളി ചാലിഗദ്ദയിലെ അജീഷിന്റെ വീടും വനസംരക്ഷണസമിതി ജീവനക്കാരന്‍ പോളിന്റെ വീടും രാഹുൽ സന്ദർശിച്ചു.മണ്ഡലത്തിൽ രാഹുൽ എത്തുന്നില്ല എന്ന പരാതി നേരത്തെ തന്നെ ഉയർന്നിരുന്നു.

“രാഹുൽ വയനാട്ടിൽ നിന്നും ജയിച്ച വ്യക്തിയാണ്. ഇടയ്ക്കിടെ ഇങ്ങനെ വന്നിട്ടുപോകുന്നു ഒരു എം.പിയാണ്. അദ്ദേഹം വന്ന് റീത്ത് വെച്ച് കരഞ്ഞിട്ടുപോയി. രാഹുൽ വന്നിട്ട് അവരുടെ കണ്ണീർ കുടിച്ചിട്ട് പോയി. എന്നാൽ, അവരുടെ കണ്ണീരൊപ്പിയില്ല. മുഖ്യമന്ത്രിയും വനംമന്ത്രിയും വയനാട്ടില്‍ പോകാതിരുന്നത് ഒരു പരിധി വരെ തെറ്റാണ്. എന്നാൽ, അവർക്ക് പോകാൻ താത്പര്യമില്ലാത്തതുകൊണ്ടല്ല. മറിച്ച്, ജനരോഷം അത്ര ഭയങ്കരമാണ്. “- വെള്ളാപ്പള്ളി നടേശന്‍ പറഞ്ഞു.