അറ്റകുറ്റപ്പണി!ദില്ലിയിൽ -വാഷിങ്ടൺ ഡിസി വിമാനം യാത്രാ മധ്യേ റദ്ദാക്കി എയർ ഇന്ത്യ

അറ്റകുറ്റപ്പണിയെത്തുടർന്ന് ദില്ലിയിൽ നിന്ന് വാഷിങ്ടൺ ഡിസിയിലേക്കുള്ള എയർ ഇന്ത്യ വിമാനം (AI103) യാത്രാ മധ്യേ റദ്ദാക്കി. യാത്രാ മധ്യേ വിമാനം വിയന്ന വിമാനത്താവളത്തിൽ ഇന്ധനം നിറയ്ക്കുന്നതിനായി നിർത്തിയിരുന്നു. തുടർന്ന് നടത്തിയ പരിശോധനയിലാണ് വിമാനത്തിന് അറ്റകുറ്റപ്പണി ആവശ്യമാണെന്ന് വ്യക്തമായത്. വിമാനത്തിന് വിയന്നയിൽ വെച്ചുള്ള ഇടവേളയിൽ ദീർഘനേരം അറ്റകുറ്റപ്പണി നടത്തേണ്ടി വന്നതായും തുടർന്ന് അത് റദ്ദാക്കിയതായും എയർ ഇന്ത്യ വ്യാഴാഴ്ച അറിയിച്ചു.

“ജൂലൈ 2 ന് ദില്ലിയിൽ നിന്ന് വാഷിംഗ്ടൺ ഡിസിയിലേക്കുള്ള AI103 വിമാനം വിയന്നയിൽ ഇന്ധനം നിറയ്ക്കുന്നതിനായി നിർത്തിയിരുന്നു . പതിവ് വിമാന പരിശോധനകൾക്കിടയിൽ, വിമാനത്തിന് ഉറപ്പായും പരിഹരിക്കേണ്ട അറ്റകുറ്റപ്പണി തിരിച്ചറിഞ്ഞു, അത് പൂർത്തിയാക്കാൻ കൂടുതൽ സമയം ആവശ്യമായിരുന്നു,” – എയർ ഇന്ത്യവക്താവ് പറഞ്ഞു.

അറ്റകുറ്റപ്പണി പ്രശ്‌നം കാരണം വിയന്നയിൽ നിന്ന് വാഷിംഗ്ടൺ ഡിസിയിലേക്ക് പോകേണ്ട വിമാനത്തിന്റെ ആദ്യ ഘട്ടം റദ്ദാക്കുകയും യാത്രക്കാരെ ഇറക്കുകയും ചെയ്തു. തിരിച്ച് വാഷിംഗ്ടണിൽ നിന്ന് വിയന്ന വഴി ദില്ലിയിലേക്കുള്ള AI104 വിമാനവും റദ്ദാക്കിയതായി എയർ ഇന്ത്യ അറിയിച്ചു.

യാത്രക്കാർക്ക് ദില്ലിയിലേക്കുള്ള മറ്റ് വിമാനങ്ങളിൽ വീണ്ടും ബുക്ക് ചെയ്യുകയോ മുഴുവൻ പണവും റീഫണ്ട് ചെയ്യുകയോ ചെയ്തിട്ടുണ്ടെന്ന് വിമാനക്കമ്പനി വ്യക്തമാക്കി.