ആശങ്കയുടെ മുൾമുനയിൽ ഏറെനേരം തിരുവനന്തപുരം വിമാനത്താവളം; പുറത്തുനിന്നടക്കം ആംബുലൻസുകളെത്തിച്ച് ഒരുക്കിയത് വിപുലമായ അടിയന്തിര സന്നാഹങ്ങൾ; ഒടുവിൽ ആശ്വാസവാർത്തയായി സുരക്ഷിത ലാൻഡിംഗ്

തിരുവനന്തപുരം: തിരുച്ചിറപ്പള്ളിയിൽ നിന്ന് പറന്നുയർന്ന ഷാർജ വിമാനത്തിന്റെ ലാൻഡിംഗ് ഗീയറിന് സാങ്കേതിക തകരാർ കണ്ടെത്തിയതോടെ ആശങ്കയുടെ മുൾമുനയിലായത് തിരുവനന്തപുരം വിമാനത്താവളം. രാവിലെ 11:40 നാണ് അടിയന്തിര ലാന്ഡിങ്ങിനൊരുങ്ങാൻ തിരുവനന്തപുരം വിമാനത്താവള അധികൃതർക്ക് നിർദ്ദേശമെത്തിയത്. വിമാനത്തിന്റെ സ്ഥാനം അനുസരിച്ച് എല്ലാ സൗകര്യങ്ങളുമുള്ള വിമാനത്താവളം എന്ന നിലയിൽ തിരുവനന്തപുരം വിമാനത്തവളമാണ് അടിയന്തിര ലാന്ഡിങ്ങിന് തെരെഞ്ഞെടുത്തത്. തുടർന്നുള്ള 43 മിനിറ്റുകൾ സാക്ഷ്യം വഹിച്ചത് ചടുലമായ നീക്കങ്ങൾക്കായിരുന്നു, വിമാനത്താവളത്തിൽ ഫുൾ എമർജൻസി പ്രഖ്യാപിച്ചു. അടിയന്തിര രക്ഷാദൗത്യത്തിനടക്കമുള്ള സംവിധാനങ്ങൾ ഒരുക്കി. പുറത്തുനിന്നടക്കം ആംബുലൻസുകൾ എത്തിച്ച് വൻ സന്നാഹങ്ങൾ ഒരുക്കി.

11:33 ന് വിമാനത്താവള പരിസരത്തെത്തിയ വിമാനം ഇന്ധനം തീർക്കാനായി പത്തുമിനിട്ട് അറബിക്കടലിനു മുകളിൽ വട്ടമിട്ട് പറന്നു. പരമാവധി ഇന്ധനം ഒഴുക്കിയ ശേഷം 12:03 ന് വിമാനം 161 യാത്രക്കാരുമായി സുരക്ഷിതമായി നിലത്തിറക്കി. അപകട സാദ്ധ്യത ഒഴിവാക്കാൻ വിമാനം വേഗത കുറച്ചാണ് റൺ വേ തൊട്ടത്. വിമാനത്താവളത്തിൽ അടിയന്തിരാവസ്ഥ പ്രഖ്യാപിച്ചത് കാരണം വൈകിയ വിമാനങ്ങളുടെ സമയം പുനഃക്രമീകരിച്ചു. പോലീസും ഫയർഫോഴ്‌സും ഏത് അടിയന്തിര സാഹചര്യവും നേരിടാൻ തയ്യാറായി നിലയുറപ്പിച്ചിരുന്നു. എ എക്‌സ് ബി 613 എന്ന എയർ ഇന്ത്യ എക്സ്‌പ്രസ് വിമാനത്തിനാണ് പറന്നുയർന്ന ശേഷം സാങ്കേതിക തകരാർ ശ്രദ്ധയിൽപ്പെട്ടത്.