വിമാനയാത്ര ചിലവേറും! ഇന്ധന സർചാർജ് കൂട്ടി എയർ ഇന്ത്യ ; പുതിയ നിരക്കുകൾ നാളെ മുതൽ പ്രാബല്യത്തിൽ

ഇറാൻ യുദ്ധത്തെത്തുടർന്ന് ആഗോളതലത്തിൽ വിമാന ഇന്ധനവില കുതിച്ചുയരുന്ന പശ്ചാത്തലത്തിൽ ആഭ്യന്തര, അന്തർദേശീയ റൂട്ടുകളിൽ സർചാർജ് വർദ്ധിപ്പിച്ച് എയർ ഇന്ത്യ ഗ്രൂപ്പ്. ഭൂരിഭാഗം റൂട്ടുകളിലും ഏപ്രിൽ 8 ബുധനാഴ്ച മുതൽ പുതുക്കിയ നിരക്കുകൾ പ്രാബല്യത്തിൽ വരും. എന്നാൽ യൂറോപ്പ്, വടക്കേ അമേരിക്ക, ഓസ്‌ട്രേലിയ എന്നിവിടങ്ങളിലേക്കുള്ള വിമാനങ്ങൾക്ക് ഏപ്രിൽ 10 മുതലായിരിക്കും വർദ്ധനവ് ബാധകമാകുക. പെട്രോളിയം-പ്രകൃതിവാതക മന്ത്രാലയത്തിന്റെയും സിവിൽ ഏവിയേഷൻ മന്ത്രാലയത്തിന്റെയും നിർദ്ദേശപ്രകാരം ആഭ്യന്തര വിമാന ഇന്ധനവില വർദ്ധനവ് 25 ശതമാനമായി പരിമിതപ്പെടുത്തിയ സാഹചര്യത്തിലാണ് ഈ നീക്കം.

ആഭ്യന്തര റൂട്ടുകളിൽ ദൂരത്തിന്റെ അടിസ്ഥാനത്തിലുള്ള പുതിയ സ്ലാബ് രീതിയാണ് എയർ ഇന്ത്യ ഏർപ്പെടുത്തിയിരിക്കുന്നത്. 500 കിലോമീറ്റർ വരെയുള്ള യാത്രകൾക്ക് 299 രൂപയും, 501 മുതൽ 1000 കിലോമീറ്റർ വരെ 399 രൂപയും സർചാർജ് നൽകണം. ദൂരം കൂടുന്നതിനനുസരിച്ച് ഈ നിരക്കിൽ മാറ്റം വരും; 2000 കിലോമീറ്ററിന് മുകളിലുള്ള യാത്രകൾക്ക് 899 രൂപയാണ് സർചാർജ്. എയർ ഇന്ത്യ എക്സ്പ്രസ് വിമാനങ്ങൾക്കും ഈ നിരക്കുകൾ ബാധകമായിരിക്കും. അന്താരാഷ്ട്ര റൂട്ടുകളിലെ ഇന്ധനവിലയിൽ നിയന്ത്രണങ്ങളില്ലാത്തതിനാൽ വിദേശ യാത്രകൾക്ക് വലിയ തോതിലുള്ള വർദ്ധനവാണ് രേഖപ്പെടുത്തിയിരിക്കുന്നത്. പശ്ചിമേഷ്യൻ രാജ്യങ്ങളിലേക്ക് 500 രൂപയും സിംഗപ്പൂരിലേക്ക് 600 രൂപയുമാണ് സർചാർജ് നിശ്ചയിച്ചിട്ടുള്ളത്. എന്നാൽ ദീർഘദൂര യാത്രകളായ യൂറോപ്പിലേക്ക് 2050 രൂപയും വടക്കേ അമേരിക്ക, ഓസ്‌ട്രേലിയ എന്നിവിടങ്ങളിലേക്ക് 2800 രൂപയും അധികമായി നൽകേണ്ടി വരും.

ആഗോളതലത്തിൽ വിമാന ഇന്ധനവില ബാരലിന് 99 ഡോളറിൽ നിന്നും ഒരു മാസത്തിനുള്ളിൽ 195 ഡോളറിലേക്ക് ഉയർന്നത് വ്യോമയാന മേഖലയ്ക്ക് വലിയ പ്രതിസന്ധിയാണ് സൃഷ്ടിച്ചിരിക്കുന്നത്. ഇന്ധനവിലയിലുണ്ടായ വർദ്ധനവ് പൂർണ്ണമായും യാത്രക്കാരിൽ നിന്നും ഈടാക്കുന്നില്ലെന്നും ഒരു ഭാഗം കമ്പനി തന്നെ വഹിക്കുന്നുണ്ടെന്നും എയർ ഇന്ത്യ വ്യക്തമാക്കി. പുതിയ നിരക്കുകൾ പ്രാബല്യത്തിൽ വരുന്നതിന് മുൻപ് എടുത്ത ടിക്കറ്റുകൾക്ക് അധിക സർചാർജ് നൽകേണ്ടതില്ല. എന്നാൽ ടിക്കറ്റിലെ തീയതിയോ റൂട്ടോ മാറ്റുകയാണെങ്കിൽ പുതുക്കിയ നിരക്കുകൾ ബാധകമാകും. വരും ദിവസങ്ങളിൽ ഇന്ധനവിലയിലെ മാറ്റങ്ങൾക്കനുസരിച്ച് സർചാർജ് നിരക്കുകൾ ഇടയ്ക്കിടെ പുനഃപരിശോധിക്കുമെന്നും എയർ ഇന്ത്യ അറിയിച്ചു.