സംസ്ഥാന സ്കൂൾ കലോത്സവ റിപ്പോർട്ടിങ്ങിനിടെ ചാനൽ അവതാരകന്റെ ദ്വയാർത്ഥ പ്രയോ​ഗം !! ചാനൽ ലോകത്തെ ഇടത് പ്രചാരകനെ സംരക്ഷിക്കാനാണ് സംസ്ഥാന സർക്കാർ മൗനം പാലിക്കുന്നതെന്ന് ജവ​ഹർ ബാൽമഞ്ച് ; സർക്കാർ നിസം​ഗത തുടർന്നാൽ കോടതിയെ സമീപിക്കും

തിരുവനന്തപുരം: സംസ്ഥാന സ്കൂൾ കലോത്സവ റിപ്പോർട്ടിങ്ങിനിടെ റിപ്പോർട്ടർ ടിവി അവതാരകൻ നടത്തിയ ദ്വയാർത്ഥ പ്രയോ​ഗത്തിൽ സംസ്ഥാന സർക്കാരിന്റെ നിസം​ഗത ​ഗുരുതരമായ കുറ്റകൃത്യമെന്ന വിമർശനവുമായി ജവഹർ ബാൽമഞ്ച് സംസ്ഥാന ചെയർമാൻ ആനന്ദ് കണ്ണശ. ചാനൽ ലോകത്തെ ഇടത് പ്രചാരകനെ സംരക്ഷിക്കാനാണ് സംസ്ഥാന സർക്കാർ മൗനം പാലിക്കുന്നത്. ചാനൽ അവതാരകനും റിപ്പോർട്ടർക്കുമെതിരെ സംസ്ഥാന സർക്കാർ നിയമനടപടികൾ സ്വീകരിക്കുന്നില്ലെങ്കിൽ ജവ​ഹർ ബാൽമഞ്ച് കോടതിയെ സമീപിക്കുമെന്നും അദ്ദേഹം പറഞ്ഞു.

“ചാനലിനകത്തും പുറത്തും ഇടതുപക്ഷ ആശയങ്ങൾ പ്രചരിപ്പിക്കാൻ വെമ്പൽ കൊള്ളുന്ന അവതാരകൻ കുട്ടികളെ കുറിച്ച് പോലും ദ്വയാർത്ഥ പ്രയോ​ഗം നടത്തിയിട്ടും സംസ്ഥാന സർക്കാരോ സർക്കാരിന് നേതൃത്വം നൽകുന്ന സിപിഎമ്മോ മൗനം പാലിക്കുകയാണ്. പൊലീസിന് സ്വമേധയാ കേസെടുക്കാവുന്ന കുറ്റക‍ൃത്യമായിട്ടും ചാനലിനോ റിപ്പോർട്ടർക്കോ അവതാരകനോ എതിരെ നിയമനടപടി സ്വീകരിക്കാൻ തയ്യാറാകുന്നില്ല. രാജാവിനെക്കാൾ വലിയ രാജഭക്തിയാണ് പോലീസ് ഇക്കാര്യത്തിൽ കാണിക്കുന്നത്.”- ആനന്ദ് കണ്ണശ പരിഹസിച്ചു.

സംസ്ഥാന സ്കൂള്‍ കലോത്സവ റിപ്പോര്‍ട്ടിങുമായി ബന്ധപ്പെട്ട് റിപ്പോര്‍ട്ടര്‍ ചാനലിനെതിരെ ബാലാവകാശ കമ്മീഷൻ കേസെടുത്തിരുന്നു. സംസ്ഥാന സ്കൂൾ കലോത്സവുമായി ബന്ധപ്പെട്ട വാർത്താവതരണത്തിൽ ഡോ. അരുൺകുമാർ സഭ്യമല്ലാത്ത ഭാഷയിൽ ദ്വയാർത്ഥ പ്രയോഗം നടത്തിയതുമായി ബന്ധപ്പെട്ടാണ് കമ്മീഷൻ സ്വമേധയാ കേസെടുത്തത്

കലോത്സവത്തിൽ പങ്കെടുത്ത ഒപ്പന ടീമിൽ മണവാട്ടിയായി വേഷമിട്ട പെണ്‍കുട്ടിയോട് റിപ്പോർട്ടർ ചാനലിലെ റിപ്പോർട്ടർ ഷാബാസ് നടത്തുന്ന സംഭാഷണത്തിന്മേലാണ് ദ്വയാർത്ഥ പ്രയോഗം. ഈ വീഡിയോ ദൃശ്യങ്ങൾ സമൂഹ മാദ്ധ്യമങ്ങളിൽ പ്രചരിച്ചതോടെയാണ് ബാലാവകാശ കമ്മീഷൻ സ്വമേധയാ കേസെടുത്തത്. ഇതു സംബന്ധിച്ച് ചാനൽ മേധാവിയിൽ നിന്നും തിരുവനന്തപുരം ജില്ലാ പൊലീസ് മേധാവിയിൽ നിന്നും ബാലാവകാശ കമ്മിഷൻ അടിയന്തര റിപ്പോർട്ട് തേടി.