കണ്ണൂരിൽ പട്ടാപ്പകൽ പന്ത്രണ്ടുകാരിയെ കടയിൽ നിന്ന് തട്ടിക്കൊണ്ടുപോകാൻ ശ്രമം; സംഘത്തിൽ നിന്ന് രക്ഷനേടാൻ സഹായകമായത് തൂക്കിയിട്ട വാഴക്കുല, കേസ് രജിസ്റ്റർ ചെയ്ത് പോലീസ്

കണ്ണൂർ: പട്ടാപകൽ പന്ത്രണ്ടുകാരി തട്ടിക്കൊണ്ടുപോകാൻ ശ്രമം. കണ്ണൂർ പരിയാരത്ത് ചെറുതാഴം കളപ്പുറത്താണ് സംഭവം. കടയിൽ നിൽക്കുകയായിരുന്ന പെൺകുട്ടിയെ കാറിലെത്തിയ രണ്ടംഗസംഘമാണ് തട്ടിക്കൊണ്ടു പോകാൻ ശ്രമിച്ചത്. മുത്തച്ഛൻ നടത്തുന്ന കടയിൽ ഇരിക്കുകയായിരുന്ന പെൺകുട്ടിയെ ആണ് തട്ടിക്കൊണ്ടു പോകാൻ ശ്രമം നടത്തിയത്.

സംഭവസമയം കുട്ടിയുടെ മുത്തച്ഛൻ കടയിൽ ഇല്ലായിരുന്നു. ഗ്രേ കളർ കാറിലെത്തിയവർ സിഗരറ്റ് ചോദിച്ചാണ് കടയിലേക്ക് വന്നത്. ഇല്ലെന്ന് പറഞ്ഞപ്പോൾ മടങ്ങിപ്പോവുകയും, വീണ്ടും തിരികെ വന്ന് മിഠായി ആവശ്യപ്പെടുകയുമായിരുന്നു. കുട്ടി മിഠായി എടുത്ത് കൊടുത്ത ഉടനെ, കുട്ടിയുടെ കൈകൾ പിടിച്ച് കാറിനുള്ളിലേക്ക് കയറ്റാൻ ശ്രമിക്കുകയായിരുന്നു.

എന്നാൽ മറുകൈ കൊണ്ട് കടയിൽ തൂക്കിയിട്ടിരുന്ന പഴക്കുലയിൽ ബലമായി പിടിച്ച് നിൽക്കാനാണ് കുട്ടി ശ്രമിച്ചത്. ഈ സമയം വഴിയിലൂടെ വാഹനത്തിൽ മറ്റാരോ വരുന്നത് ശ്രദ്ധയിൽ പെട്ടതോടെ ഇവർ പെൺകുട്ടിയെ വിട്ട് കാറിൽ കയറി പോവുകയായിരുന്നു. ഉടനെ തന്നെ കുട്ടി വീട്ടിലെത്തി വീട്ടുകാരോട് വിവരം പറഞ്ഞു. തുടർന്ന് സ്‌റ്റേഷനിലെത്തി നൽകിയ പരാതിയുടെ അടിസ്ഥാനത്തിൽ പോലീസ് കേസ് രജിസ്റ്റർ ചെയ്തു.