ഒരു ഇംപാക്ടുമുണ്ടാക്കാത്ത ഒരു ഇംപാക്ട് പ്ലയർ !റിയാൻ പരാഗിനെതിരെ രൂക്ഷ വിമർശനവുമായി ആരാധകർ

ജയ്പുർ : ഗുജറാത്തിനെതിരെ കനത്ത പരാജയം ഏറ്റുവാങ്ങിയതോടെ രാജസ്ഥാൻ ആരാധകരുടെ കടുത്ത നിരാശ വിമർശനത്തിലേക്ക് വഴിമാറുന്നു. ഇങ്ങനെ പോയാൽ ടീമിന് ഒരിക്കലും കരകയറാൻ സാധിക്കില്ല എന്നാണ് ആരാധകരുടെ വാദം. കഴിഞ്ഞ മത്സരത്തിൽ ‘ഇംപാക്ട് പ്ലയറാ’യി ഇറങ്ങി യാതൊരു ഇംപാക്ടും നൽകാതെ മടങ്ങിയ യുവ ബാറ്റർ റിയാൻ പരാഗിനോടാണ് ആരാധകർക്ക് കൂടുതൽ രോഷം. എത്ര അവസരങ്ങൾ നൽകിയാലും പരാഗ് മെച്ചപ്പെട്ട പ്രകടനം കാഴ്ചവയ്ക്കാൻ പരാഗിന് സാധിക്കാത്തതാണ് ആരാധകരെ ചൊടിപ്പിച്ചിരിക്കുന്നത്.

‘2019ൽ 160 റൺസ് ശരാശരി 32, 2020ൽ 86 റണ്‍സ് ശരാശരി 12, 2021ൽ 93 റൺസ് ശരാശരി 11, 2022ൽ 183 റൺസ് ശരാശരി 16, 2023ൽ 54 റൺസ് ശരാശരി 13 എന്നിങ്ങനെയാണ് ഐപിഎല്ലിൽ പരാഗിന്റെ റൺ സമ്പാദ്യം. ഐപിഎലിലെ ഏ‌റ്റവും വലിയ ഫ്രോഡല്ലേ ഇയാൾ?’ എന്നാണ് ആരാധകർ ചോദിക്കുന്നത്. ഇത്ര മോശം പ്രകടനം കാഴ്ചവയ്ക്കുന്ന ഒരാൾക്ക് ടീം എന്തിനാണ് വീണ്ടും അവസരം കൊടുക്കുന്നതെന്നും ആരോധകർ രോഷത്തോടെ ചോദിക്കുന്നു.

‘ഐപിഎലിലെ ഏറ്റവും മോശം കളിക്കാരൻ, ക്രിക്കറ്റ് കണ്ട ഏറ്റവും വലിയ ഫ്രോഡ്’ എന്നിങ്ങനെ ആരാധകർ സമൂഹമാധ്യമത്തിൽ പരാഗിനെതിരെയുള്ള രോഷം പങ്കുവച്ചു. ‘അവൻ നല്ല ഫിനിഷറാണ്, ഒരുനാൾ അവൻ രാജസ്ഥാനു വേണ്ടി ഫിനിഷ് ചെയ്യും’ തുടങ്ങിയ പരിഹാസങ്ങളാണ് ട്വിറ്ററിൽ നിറയെ.

ഈ സീസണിലെ ആദ്യ മത്സരങ്ങളിലെ മോശം ഫോം കാരണം പരാഗിനെ ടീമിൽ നിന്ന് ഒഴിവാക്കിയിരുന്നു. ഇന്നലെ ഗുജറാത്തിനെതിരെ ഇംപാക്ട് പ്ലയറായാണ് പരാഗ് ഇറങ്ങിയത്. എന്നാൽ ആറു പന്തിൽ നാലു റൺസ് മാത്രമേ താരത്തിന് നേടാനായുള്ളൂ. ഈ സീസണിൽ 58 റൺസ് മാത്രമാണ് പരാഗിന്റെ സമ്പാദ്യം.