കാനഡയിൽ വീണ്ടും അജ്ഞാത ആക്രമണം? ഖലിസ്ഥാനികളെ പിന്തുണയ്ക്കുന്ന പാക് വംശജനെ അജ്ഞാതനായ യുവാവ് തീ കൊളുത്തി

കാനഡ കേന്ദ്രീകരിച്ച് നടക്കുന്ന ഇന്ത്യാ വിരുദ്ധ പ്രവർത്തനങ്ങളെ പിന്തുണച്ചിരുന്ന പാക് വംശജനായ കനേഡിയൻ വ്യവസായി അജ്ഞാതന്റെ ആക്രമണത്തിനിരയായി. ബ്രിട്ടീഷ് കൊളംബിയ പ്രവിശ്യയിലെ സറേ നഗരത്തിൽ ഖാലിസ്ഥാൻ ഭീകരൻ ഹർദീപ് സിംഗ് നിജ്ജാറിൻ്റെ മരണത്തെ തുടർന്നുള്ള പ്രതിഷേധത്തിലുടനീളം പങ്കാളിയായിരുന്ന രഹത് റാവുവാണ് ആക്രമിക്കപ്പെട്ടത്.

ഇക്കഴിഞ്ഞ വെള്ളിയാഴ്ച 25 വയസ് പ്രായമുള്ള അജ്ഞാതനായ യുവാവ് രഹത് റാവുവിനെ തീകൊളുത്തിയ ശേഷം രക്ഷപ്പെടുകയായിരുന്നു.. ആശുപത്രിയിൽ പ്രവേശിപ്പിച്ച ഇയാളുടെ നില ഗുരുതരമാണ്. പാക് ചാര സംഘടനയായ ഐഎസ്ഐയുമായി റാവുവിന് ബന്ധമില്ലെന്നാണ് പ്രാഥമിക വിവരം. അതേസമയം റാവുവിനെ തീകൊളുത്തിയ പ്രതിയുടെ ഫോട്ടോ കനേഡിയൻ പോലീസ് പുറത്തുവിട്ടു.

കഴിഞ്ഞ വർഷം ജൂൺ 18നാണ് സറേയിലെ ഒരു ഗുരുദ്വാരയ്ക്ക് പുറത്ത് നിജ്ജർ വെടിയേറ്റ് മരിക്കുന്നത്. ഇന്ത്യൻ സർക്കാർ പുറത്തിറക്കിയ ഭീകരന്മാരുടെ പട്ടികയിൽ ഉൾപ്പെടെ ഇയാളുടെ പേര് ഉൾപ്പെട്ടിരുന്നു. നിജ്ജറിന്റെ കൊലപാതകത്തിൽ ഇന്ത്യൻ സർക്കാർ ഏജൻ്റുമാരുടെ പങ്കുണ്ടെന്ന് കനേഡിയൻ പ്രധാനമന്ത്രി ജസ്റ്റിൻ ട്രൂഡോ ആരോപിച്ചതിനെത്തുടർന്ന് ഇന്ത്യയും കാനഡയും തമ്മിലുള്ള നയതന്ത്ര ബന്ധം ഉലഞ്ഞിരുന്നു.