ഇസ്രായേൽ വിരുദ്ധതയോ അതോ അമേരിക്കൻ ഡോളറോ? ട്രമ്പിന്റെ ‘എബ്രഹാം ഉടമ്പടി’ കെണിയിൽ വീണ് പാകിസ്ഥാൻ; നേരിടുന്നത് ചരിത്രത്തിലെ ഏറ്റവും വലിയ പ്രതിസന്ധി

വാഷിങ്ടൺ : ഡൊണാൾഡ് ട്രമ്പ് ഭരണകൂടം ഇറാനുമായി ഒരു സമാധാന കരാറിലെത്തുകയാണെങ്കിൽ, അറബ്-മുസ്ലിം രാജ്യങ്ങൾ ഒടുവിൽ ‘എബ്രഹാം ഉടമ്പടി’യുടെ ( ഭാഗമാകേണ്ടിവരുമെന്നും ഇസ്രായേലുമായി ബന്ധം സ്ഥാപിക്കേണ്ടിവരുമെന്നുമുള്ള ട്രമ്പിന്റെ പ്രഖ്യാപനം ഇസ്ലാമിക ലോകത്ത് വലിയൊരു ഭൗമരാഷ്ട്രീയ ചലനമാണ് സൃഷ്ടിച്ചിരിക്കുന്നത്. ഫലസ്തീൻ വിഷയത്തിൽ മുസ്ലിം രാജ്യങ്ങളുടെ പരമ്പരാഗത രാഷ്ട്രീയ നിലപാടുകളെ പാടെ തകർക്കുന്നതാണ് ട്രമ്പിന്റെ ഈ തന്ത്രപരമായ നീക്കം. എന്നാൽ, ഈ പ്രഖ്യാപനം ഏറ്റവും കൂടുതൽ പ്രതിസന്ധിയിലാക്കുന്നത് പാകിസ്ഥാനെയാണ്. പതിറ്റാണ്ടുകളായി ഇസ്രായേൽ വിരുദ്ധത മുൻനിർത്തി സ്വന്തം രാജ്യത്തിന്റെ ആഭ്യന്തരവും പ്രത്യയശാസ്ത്രപരവുമായ ഐഡന്റിറ്റി കെട്ടിപ്പടുക്കുകയും, അതേസമയം നിലനിൽപ്പിനായി അമേരിക്കയെ പൂർണ്ണമായി ആശ്രയിക്കുകയും ചെയ്യുന്ന പാകിസ്ഥാന് മുന്നിൽ ഇതൊരു വലിയ കെണിയായി മാറിയിരിക്കുകയാണ്.

മേഖലയിലെ സമാധാനത്തിന് എന്നതിലുപരി ഫലസ്തീൻ വിഷയത്തിൽ മുസ്ലിം ലോകത്തുണ്ടായിരുന്ന പഴയ പ്രത്യയശാസ്ത്രപരമായ ഐക്യം തകർക്കുക എന്നതായിരുന്നു എബ്രഹാം ഉടമ്പടിയുടെ ലക്ഷ്യം. മുൻപ് ഫലസ്തീനെ പിന്തുണയ്ക്കുക എന്നത് മുസ്ലിം രാജ്യങ്ങളെ വൈകാരികമായി ഒന്നിപ്പിക്കുന്ന ഘടകമായിരുന്നു. എന്നാൽ 2020-ൽ യുണൈറ്റഡ് അറബ് എമിറേറ്റ്സും (UAE) ബഹ്റൈനും ഇസ്രായേലുമായി നയതന്ത്രബന്ധം സ്ഥാപിച്ചതോടെ ഈ ഐക്യത്തിൽ വിള്ളൽ വീണു. തുടർന്ന് മൊറോക്കോയും സുഡാനും ഈ പാത പിന്തുടർന്നു. ഗൾഫ് രാജ്യങ്ങൾ തങ്ങളുടെ സാമ്പത്തിക ആധുനികവൽക്കരണത്തിനും സാങ്കേതിക പങ്കാളിത്തത്തിനും അമേരിക്കൻ സുരക്ഷാ ഉറപ്പുകൾക്കുമാണ് മുൻഗണന നൽകിയത്. ഇതിലൂടെ ഇസ്രായേലുമായി ആദ്യം ബന്ധം സ്ഥാപിക്കുകയും ഫലസ്തീൻ പ്രശ്നത്തെ രണ്ടാമതാക്കി മാറ്റുകയും ചെയ്യാമെന്ന് ട്രംപ് തെളിയിച്ചു.

ഈ ഒരു മാറ്റമാണ് പാകിസ്ഥാനെ ഇപ്പോൾ ചരിത്രത്തിലെ ഏറ്റവും അപകടകരമായ ഒരു വഴിത്തിരിവിൽ എത്തിച്ചിരിക്കുന്നത്. വാഷിംഗ്ടണിൽ നിന്നുള്ള നയതന്ത്രപരമായ അടുപ്പത്തെ തങ്ങളുടെ ആണവായുധങ്ങളുടെയും ഭൂമിശാസ്ത്രപരമായ പ്രാധാന്യത്തിന്റെയും തെളിവായി പാകിസ്ഥാൻ മാധ്യമങ്ങളും ഭരണാധികാരികളും ഇത്രയും കാലം ആഘോഷിക്കുകയായിരുന്നു. എന്നാൽ ട്രംപിന്റെ പുതിയ നീക്കത്തോടെ പാകിസ്ഥാന് മുന്നിൽ രണ്ട് ദുരന്തപൂർണ്ണമായ വഴികൾ മാത്രമാണ് അവശേഷിക്കുന്നത്. ഒന്നുകിൽ അമേരിക്കൻ സമ്മർദ്ദത്തിന് വഴങ്ങി ഇസ്രായേലിനെ അംഗീകരിക്കുക, അല്ലെങ്കിൽ ട്രംപിന്റെ ആവശ്യത്തെ ശക്തമായി എതിർക്കുക.

അമേരിക്കൻ സമ്മർദ്ദത്തിന് വഴങ്ങി ഇസ്രായേലുമായി ബന്ധം സ്ഥാപിക്കാൻ പാകിസ്ഥാൻ തയ്യാറായാൽ, അത് രാജ്യത്തിനകത്ത് വലിയൊരു ആഭ്യന്തര പൊട്ടിത്തെറിക്ക് കാരണമാകും. കാരണം ഗൾഫ് രാജ്യങ്ങളെപ്പോലെയല്ല പാകിസ്ഥാൻ. ഇസ്ലാമിക ഐഡന്റിറ്റിയും, ഇസ്രായേൽ വിരുദ്ധ പ്രൊപ്പഗണ്ടകളും , ജിഹാദി ചിഹ്നങ്ങളും മുൻനിർത്തിയാണ് പാകിസ്ഥാൻ പൊതുസമൂഹത്തെയും തങ്ങളുടെ സുരക്ഷാ സിദ്ധാന്തങ്ങളെയും വാർത്തെടുത്തിട്ടുള്ളത്. പാഠപുസ്തകങ്ങളിലും പള്ളികളിലും ടെലിവിഷൻ ചർച്ചകളിലും ഇസ്രായേലിനെ ഒരു നിത്യശത്രുവായിട്ടാണ് ചിത്രീകരിച്ചിരിക്കുന്നത്. പെട്ടെന്നൊരു ദിവസം ഇസ്രായേലുമായി ബന്ധം സ്ഥാപിച്ചാൽ, രാജ്യത്തെ തീവ്രവാദ സംഘടനകൾ ഇതിനെ പ്രത്യയശാസ്ത്രപരമായ കീഴടങ്ങലായി കാണുകയും ഭരണകൂടത്തിനെതിരെ ആയുധമെടുക്കുകയും ചെയ്യും. സാമ്പത്തികമായി തകർന്നതും രാഷ്ട്രീയമായി അസ്ഥിരവുമായ പാകിസ്ഥാന് ഇത്തരം ആഭ്യന്തര പ്രക്ഷോഭങ്ങളെ താങ്ങാനുള്ള ശേഷിയില്ല.

എന്നാൽ ട്രമ്പിന്റെ ആവശ്യത്തെ നിരസിച്ചാൽ അതിലും വലിയ സാമ്പത്തിക, ഭൗമരാഷ്ട്രീയ പ്രതിസന്ധിയാകും പാകിസ്ഥാനെ തേടിയെത്തുക. അന്താരാഷ്ട്ര നാണയ നിധിയിൽ (IMF) നിന്നുള്ള സാമ്പത്തിക സഹായങ്ങൾക്കും ഗൾഫ് രാജ്യങ്ങളുടെ ഫണ്ടിംഗിനും കടം പുനഃക്രമീകരിക്കുന്നതിനും പാകിസ്ഥാൻ പൂർണ്ണമായും അമേരിക്കയെ ആശ്രയിക്കുന്നുണ്ട്. അമേരിക്ക നേരിട്ട് ഉപരോധം ഏർപ്പെടുത്തിയില്ലെങ്കിൽ പോലും അന്താരാഷ്ട്ര സാമ്പത്തിക സ്ഥാപനങ്ങളെ സ്വാധീനിച്ചുകൊണ്ട് പാകിസ്ഥാനെ പൂർണ്ണമായ തകർച്ചയിലേക്ക് തള്ളിവിടാൻ വാഷിംഗ്ടണിന് സാധിക്കും. സൈനികപരമായി ആണവായുധം ഉണ്ടെങ്കിൽപ്പോലും പ്രതിരോധ ആവശ്യങ്ങൾക്കായി വിദേശ ഫണ്ടിംഗിനെ ആശ്രയിക്കുന്ന പാകിസ്ഥാൻ അന്താരാഷ്ട്രതലത്തിൽ ഒറ്റപ്പെടാൻ ഇത് കാരണമാകും.

ഇത്രയും കാലം അന്താരാഷ്ട്ര തലത്തിൽ പാശ്ചാത്യ രാജ്യങ്ങളുമായി സഹകരിക്കുകയും ആഭ്യന്തരമായി ഇസ്ലാമിക തീവ്രവാദ നിലപാടുകളെ പ്രോത്സാഹിപ്പിക്കുകയും ചെയ്ത പാകിസ്ഥാന്റെ ഇരട്ടത്താപ്പാണ് ട്രമ്പിന്റെ ഈ ഒറ്റ പ്രഖ്യാപനത്തോടെ ഇല്ലാതായിരിക്കുന്നത്. മുൻകാലങ്ങളെപ്പോലെ അഫ്ഗാനിസ്ഥാനെ മുൻനിർത്തി അമേരിക്കയുമായി തന്ത്രപരമായ ചർച്ചകൾ നടത്താനുള്ള അവസരവും ഇപ്പോൾ പാകിസ്ഥാന് മുന്നിലില്ല. അമേരിക്കയെ അനുസരിച്ചാൽ ആഭ്യന്തരമായ പ്രത്യയശാസ്ത്ര തകർച്ചയും, എതിർത്താൽ അമേരിക്കയുടെ കടുത്ത സാമ്പത്തിക ശിക്ഷാനടപടികളും നേരിടേണ്ടി വരുന്ന ഈ പ്രതിസന്ധി പാകിസ്ഥാൻ എന്ന രാജ്യത്തിന്റെ നിലനിൽപ്പിന് തന്നെ ഭീഷണിയുയർത്തുന്ന ഒന്നാണ്