തോക്കേന്തിയ കമ്മ്യൂണിസ്റ്റ് ഭീകരർ കാടുകളിൽ നിന്ന് ഇല്ലാതായി, എങ്കിലും സമൂഹത്തിൽ അശാന്തിയും വിഘടനവാദവും സൃഷ്ടിക്കാൻ തക്കം പാർത്തിരിക്കുന്ന നക്സൽ ചിന്താഗതിക്കാർ ഇപ്പോഴും സജീവം! ജാഗ്രത വേണം!! സ്വാതന്ത്ര്യദിന പ്രസംഗത്തിൽ മുന്നറിയിപ്പുമായി പ്രധാനമന്ത്രി നരേന്ദ്രമോദി

ദില്ലി : രാജ്യത്ത് സായുധ നക്‌സലിസവും മാവോയിസ്റ്റ് അക്രമങ്ങളും അവസാന ഘട്ടത്തിലാണെന്നും എന്നാൽ ‘കമ്മ്യൂണിസ്റ്റ് ഭീകര’ ആശയങ്ങളെ ചിന്തയിൽ കൊണ്ട് നടക്കുന്നവരെ തിരിച്ചറിഞ്ഞ് ഒറ്റപ്പെടുത്തേണ്ടതുണ്ടെന്നും പ്രധാനമന്ത്രി നരേന്ദ്രമോദി. എൺപതാം സ്വാതന്ത്ര്യദിനത്തിൽ ചെങ്കോട്ടയിൽ വെച്ച് രാജ്യത്തെ അഭിസംബോധന ചെയ്യവേയാണ് പ്രധാനമന്ത്രി നിർണായകമായ ഈ മുന്നറിയിപ്പ് നൽകിയത്. തോക്കേന്തിയ കമ്മ്യൂണിസ്റ്റ് ഭീകരർ കാടുകളിൽ നിന്ന് ഇല്ലാതായെങ്കിലും സമൂഹത്തിൽ അശാന്തിയും വിഘടനവാദവും സൃഷ്ടിക്കാൻ തക്കം പാർത്തിരിക്കുന്ന നക്സൽ ചിന്താഗതിക്കാരെ കുറിച്ച് രാജ്യം ജാഗ്രത പാലിക്കണമെന്ന് അദ്ദേഹം ഓർമ്മിപ്പിച്ചു.

നക്‌സലിസവും കമ്മ്യൂണിസ്റ്റ് ഭീകരതയും പതിറ്റാണ്ടുകളായി രാജ്യത്തിന്റെ വികസനത്തെ പിന്നോട്ടടിക്കുകയും ലക്ഷക്കണക്കിന് യുവാക്കളുടെ ഭാവി തകർക്കുകയും ചെയ്തതായി പ്രധാനമന്ത്രി ചൂണ്ടിക്കാട്ടി. നാല് പതിറ്റാണ്ടോളം തോക്കിൻമുനയിൽ രാജ്യത്തിന്റെ വലിയൊരു ഭാഗം ഭീതിയിലായിരുന്നുവെന്നും സാധാരണക്കാരെ സംരക്ഷിക്കുന്നതിനായി മൂവായിരത്തിയഞ്ഞൂറിലധികം സുരക്ഷാ ഉദ്യോഗസ്ഥർക്ക് ജീവൻ ബലിയർപ്പിക്കേണ്ടി വന്നിട്ടുണ്ടെന്നും അദ്ദേഹം പറഞ്ഞു.

2014-ൽ അധികാരത്തിലേറിയപ്പോൾ തന്നെ രാജ്യം കമ്മ്യൂണിസ്റ്റ് ഭീകര മുക്തമാക്കുമെന്ന് പ്രതിജ്ഞയെടുത്തിരുന്നുവെന്ന് വ്യക്തമാക്കിയ പ്രധാനമന്ത്രി, ഇന്ന് കമ്മ്യൂണിസ്റ്റ് ഭീകരാക്രമണങ്ങൾ അന്ത്യശ്വാസം വലിക്കുകയാണെന്നും ചോര വീണ മണ്ണിൽ ഇപ്പോൾ വികസനത്തിന്റെയും പ്രതീക്ഷയുടെയും ത്രിവർണ്ണ പതാകയാണ് പറക്കുന്നതെന്നും കൂട്ടിച്ചേർത്തു. ഇത്തരം ചിന്താഗതികളിൽ നിന്നും യുവാക്കളെ മോചിപ്പിച്ച് അവരെ രാജ്യത്തിന്റെ മുഖ്യധാരയിലേക്ക് കൊണ്ടുവരേണ്ടതുണ്ടെന്നും വികസിത ഭാരതം കെട്ടിപ്പടുക്കുന്നതിന് ഇത്തരം വെല്ലുവിളികളെ ഇല്ലായ്മ ചെയ്യേണ്ടത് അനിവാര്യമാണെന്നും അദ്ദേഹം തന്റെ പ്രസംഗത്തിൽ വ്യക്തമാക്കി.

2014-ൽ നരേന്ദ്ര മോദി സർക്കാർ അധികാരമേറ്റതിനു ശേഷം രാജ്യത്തെ കമ്മ്യൂണിസ്റ്റ് തീവ്രവാദത്തിനെതിരെ സ്വീകരിച്ച ശക്തമായ നയങ്ങൾ ഈ മേഖലയിൽ നിർണായക വഴിത്തിരിവാണ് ഉണ്ടാക്കിയത്. ആഭ്യന്തര സുരക്ഷാ ചരിത്രത്തിൽ ഏറ്റവും വലിയ വെല്ലുവിളിയായി മാറിയിരുന്ന ‘റെഡ് കോറിഡോർ’ സംവിധാനത്തെ സമഗ്രമായ ‘സമാധാൻ’ തന്ത്രത്തിലൂടെയും സുരക്ഷാ-വികസന സംയോജനത്തിലൂടെയും തകർക്കാൻ കേന്ദ്ര സർക്കാരിനായി.
ഭൂമിശാസ്ത്രപരമായ സ്വാധീനത്തിലും അക്രമ സംഭവങ്ങളിലും വലിയ ഇടിവാണ് ഈ കാലയളവിൽ ഉണ്ടായത്. 2013-14 കാലഘട്ടത്തിൽ രാജ്യത്തെ പത്തിലേറെ സംസ്ഥാനങ്ങളിലായി 126-ലധികം ജില്ലകളിൽ കമ്മ്യൂണിസ്റ്റ് ഭീകര സാന്നിധ്യം ശക്തമായിരുന്നിടത്ത്, ശക്തമായ പ്രതിരോധ നടപടികളിലൂടെ അത് നാമമാത്രമായ ചില ഉൾപ്രദേശങ്ങളിലേക്ക് മാത്രമായി ചുരുങ്ങി. ബിഹാർ, ഝാർഖണ്ഡ്, ഒഡീഷ, ആന്ധ്രാപ്രദേശ്, മഹാരാഷ്ട്ര തുടങ്ങിയ സംസ്ഥാനങ്ങളിലെ ഭൂരിഭാഗം മേഖലകളും നക്സൽ സ്വാധീനത്തിൽ നിന്ന് പൂർണ്ണമായും മോചിപ്പിക്കപ്പെട്ടു.
സുരക്ഷാ സേനകളുടെ ശക്തമായ മുന്നേറ്റവും പുതിയ ക്യാമ്പുകളുടെ സ്ഥാപനവും കമ്മ്യൂണിസ്റ്റ് ഭീകര താവളങ്ങളെ ഇല്ലാതാക്കി. ഛത്തീസ്ഗഢിലെ ബസ്തർ, അബുജ്മദ് തുടങ്ങിയ വനമേഖലകളിൽ സി.ആർ.പി.എഫ്, കോബ്ര കമാൻഡോകൾ, സംസ്ഥാന പോലീസ് സേനകൾ എന്നിവയുടെ സംയുക്ത നീക്കങ്ങളിലൂടെ കമ്മ്യൂണിസ്റ്റ് ഭീകര നേതാക്കൾ കൊല്ലപ്പെടുകയോ അറസ്റ്റിലാവുകയോ ചെയ്തു. ആയിരക്കണക്കിന് സായുധ ഭീകരർ ആയുധം വെച്ച് കീഴടങ്ങി മുഖ്യധാരയിലേക്ക് മടങ്ങിയെത്തി.
ആയുധ നടപടികൾക്കൊപ്പം ആദിവാസി-വനമേഖലകളിൽ നടപ്പിലാക്കിയ വികസന പ്രവർത്തനങ്ങൾ കമ്മ്യൂണിസ്റ്റ് ഭീകര വിരുദ്ധ പോരാട്ടത്തിൽ വലിയ പങ്കുവഹിച്ചു. പതിനായിരക്കണക്കിന് കിലോമീറ്റർ റോഡുകൾ, പാലങ്ങൾ, മൊബൈൽ ടവറുകൾ, സ്കൂളുകൾ, ബാങ്കിംഗ് സേവനങ്ങൾ എന്നിവ മേഖലകളിൽ എത്തിച്ചതോടെ പ്രാദേശിക ജനതയ്ക്ക് ഭരണകൂടത്തിലുള്ള വിശ്വാസം വർദ്ധിക്കുകയും ഭീകരവാദികളുടെ സ്വാധീനം ദുർബലമാവുകയും ചെയ്തു.
കമ്മ്യൂണിസ്റ്റ് ഭീകരരുടെ സാമ്പത്തിക സ്രോതസ്സുകൾ തടയാൻ എൻ.ഐ.എ (NIA), എൻഫോഴ്‌സ്‌മെന്റ് ഡയറക്‌ടറേറ്റ് (ED) തുടങ്ങിയ കേന്ദ്ര ഏജൻസികളെ ഉപയോഗിച്ച് നടത്തിയ നിയമനടപടികൾ അവരുടെ വിഭവ സമാഹരണത്തെയും തകർത്തു. സുരക്ഷാ മുൻകൈകളും ക്ഷേമപദ്ധതികളും ഒരുമിച്ച് കൊണ്ടുപോയതിലൂടെ പതിറ്റാണ്ടുകളായി രാജ്യത്തിന്റെ ആഭ്യന്തര സുരക്ഷയ്ക്ക് ഭീഷണിയായിരുന്ന കമ്മ്യൂണിസ്റ്റ് ഭീകര പ്രസ്ഥാനം അന്ത്യഘട്ടത്തിലേക്ക് എത്തിച്ചേർന്നു.