പ്രകൃതി സംരക്ഷണ പ്രവർത്തനങ്ങൾക്ക് ഗോവ ഗവർണർ മികച്ച മാതൃകയെന്ന് ആർട്ട് ഓഫ് ലിവിങ് ആചാര്യൻ ഗുരുദേവ് ശ്രീ ശ്രീ രവിശങ്കർ ; ഗവർണർ പി എസ് ശ്രീധരൻ പിള്ളയുടെ 246-ാമത് പുസ്തകമായ 1008 വാമൻവൃക്ഷാസ് പ്രകാശനം ചെയ്തു

സുപ്രസിദ്ധ എഴുത്തുകാരനും ഗോവ ഗവർണറുമായ പി എസ് ശ്രീധരൻ പിള്ളയുടെ 246-ാമത് പുസ്തകമായ 1008 വാമൻവൃക്ഷാസ് പ്രകാശനം ചെയ്ത് ആർട്ട് ഓഫ് ലിവിങ് ആചാര്യൻ ഗുരുദേവ് ശ്രീ ശ്രീ രവിശങ്കർ. അദ്ദേഹത്തിന്റെ ശിഷ്യഗണങ്ങളും ആർട്ട് ഓഫ് ലിവിങ് ആരാധകരും തിങ്ങിനിറഞ്ഞ രാജ്ഭവൻ ദർബാർ ഹാളിൽ വച്ചായിരുന്നു പ്രകാശന കർമ്മം നടന്നത്.

പ്രകൃതി സംരക്ഷണ പ്രവർത്തനങ്ങൾക്ക് മികച്ച മാതൃകയാണ് ഗോവ ഗവർണർ പി എസ് ശ്രീധരൻപിള്ളയെന്ന് പുസ്തക പ്രകാശന കർമ്മം നിവഹിച്ചു കൊണ്ട് ഗുരുദേവ് ശ്രീ ശ്രീ രവിശങ്കർ അഭിപ്രായപ്പെട്ടു. ഗവർണർ ശ്രീധരൻപിള്ള തന്റെ ഏറെ തിരക്കുപിടിച്ച ഔദ്യോഗിക ചുമതലകൾക്കും ഭാരിച്ച ഉത്തരവാദിത്വങ്ങൾക്കുമിടയിൽ മരങ്ങളെയും ചെടികളെയും സംരക്ഷിക്കുവാൻ അത്യധ്വാനം ചെയ്യുന്നതിനെ ഗുരുദേവ് പ്രശംസിച്ചു.

” ഗവർണർ പി എസ് ശ്രീധരൻ പിള്ള 1008 വാമന വൃക്ഷങ്ങളും അപൂർവ്വയിനം ചെടികളും അടങ്ങിയ ഉദ്യാനം നിർമ്മിച്ചതും വാർദ്ധക്യവും രോഗവും ബാധിച്ച മരങ്ങളുടെ സംരക്ഷണത്തിനായി വൃക്ഷയുർവേദ ചികിത്സ നടപ്പിലാക്കിയതും മാതൃകയാക്കേണ്ടതാണ്. ആദരണീയനായ ഗവർണറുടെ പരിസ്ഥിതി സംബന്ധമായ പുസ്തകങ്ങൾ വരും തലമുറകളെ കൂടി മനസ്സിൽ കണ്ടിട്ടുള്ളതാണ്. രാജ്ഭവനിൽ പുതുതായി വളർന്നുവരുന്ന ആയിരക്കണക്കിന് ചെടികളും മരങ്ങളും പുറത്തുവിടുന്ന ഓക്സിജൻ അന്തരീക്ഷത്തെ ശുദ്ധമാക്കി ജീവൻ നിലനിർത്താനുള്ള മഹത്തായ ഉദ്യമമാണ്. പൂർവ്വതലമുറകൾ നമ്മോട് പറഞ്ഞിട്ടുള്ളത് പോലെ ഒരാൾ ജീവിതത്തിൽ അഞ്ച് മരങ്ങൾ എങ്കിലും നട്ടുപിടിപ്പിക്കണമെന്ന പാഠത്തെ വീണ്ടും ഗവർണർ ശ്രീധരൻപിള്ളയിൽ നിന്നും ഉൾക്കൊള്ളാം”- ഗുരുദേവ് ശ്രീ ശ്രീ രവിശങ്കർ പറഞ്ഞു.