16 വർഷം നീണ്ട അപകീർത്തിക്കേസ്: ‘കുമുദം റിപ്പോർട്ടർ’ എഡിറ്ററടക്കം മൂന്ന് പേർക്ക് ജാമ്യമില്ലാ അറസ്റ്റ് വാറണ്ട്, പലതവണ സമൻസ് നൽകിയിട്ടും കോടതിയിൽ ഹാജരായില്ല, ആർഎസ്എസിനെതിരെ ലേഖനം പ്രസിദ്ധീകരിച്ച കേസിൽ നിർണായക നീക്കം

കോയമ്പത്തൂർ: ആർഎസ്എസിനെതിരെ അപകീർത്തികരമായ ലേഖനം പ്രസിദ്ധീകരിച്ചെന്ന കേസിൽ തമിഴ് മാസികയായ ‘കുമുദം റിപ്പോർട്ടർ’ എഡിറ്ററടക്കം മൂന്ന് പേർക്കെതിരെ കോടതി ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചു. കേസിൽ പലതവണ സമൻസ് അയച്ചിട്ടും കോടതിയിൽ ഹാജരാകാത്തതിനെ തുടർന്നാണ് തിരുപ്പൂർ കോടതിയുടെ നടപടി.

മാസികയുടെ പബ്ലിഷർ എം. സെൽവരങ്കൻ, എഡിറ്റർ എസ്. ഇളങ്കോവൻ, പ്രിന്റർ എസ്. പാൽ ആന്റണി രാജ് എന്നിവർക്കെതിരെയാണ് ജസ്റ്റിസ് സെന്തിൽ രാജ വാറണ്ട് പുറപ്പെടുവിച്ചത്. ഇവരെ അറസ്റ്റ് ചെയ്ത് കോടതിയിൽ ഹാജരാക്കാനും പോലീസിന് നിർദേശം നൽകിയിട്ടുണ്ട്.

ചെന്നൈയിൽനിന്ന് പ്രസിദ്ധീകരിക്കുന്ന ‘കുമുദം റിപ്പോർട്ടറി’ൽ 2009 മാർച്ച് ഒന്നിന് സോലൈ എഴുതിയ ‘ഇന്ത്യൻ താലിബാൻ’ എന്ന ലേഖനമാണ് കേസിന് ആധാരം. ആർഎസ്എസിനെയും ബിജെപിയെയും താലിബാനുമായി താരതമ്യം ചെയ്യുന്നതടക്കമുള്ള പരാമർശങ്ങൾ ലേഖനത്തിലുണ്ടായിരുന്നുവെന്നാണ് പരാതി.

ഇതിനെതിരെ ആർഎസ്എസ് പ്രവർത്തകനായ സി.കെ. ദണ്ഡപാണി തിരുപ്പൂർ ജെ.എം.-1 കോടതിയിൽ അപകീർത്തി കേസ് ഫയൽ ചെയ്യുകയായിരുന്നു. 1925 മുതൽ സേവന പ്രവർത്തനങ്ങൾ മുഖമുദ്രയാക്കി പ്രവർത്തിക്കുന്ന ആർഎസ്എസിനെ സ്ത്രീവിരുദ്ധരും ഭീകരവാദികളുമായി ചിത്രീകരിക്കുന്ന തരത്തിലാണ് ലേഖനം പ്രസിദ്ധീകരിച്ചതെന്ന് പരാതിയിൽ ആരോപിച്ചു. ലേഖനത്തിൽ ഖേദം പ്രകടിപ്പിച്ച് തിരുത്ത് പ്രസിദ്ധീകരിക്കണമെന്നും 10 ലക്ഷം രൂപ നഷ്ടപരിഹാരം നൽകണമെന്നും ഹർജിയിൽ ആവശ്യപ്പെട്ടിരുന്നു.

ലേഖനത്തിന്റെ എഴുത്തുകാരൻ സോലൈ, പബ്ലിഷർ എം. സെൽവരങ്കൻ, എഡിറ്റർ എസ്. ഇളങ്കോവൻ, പ്രിന്റർ എസ്. പാൽ ആന്റണി രാജ്, ഷെയർഹോൾഡർമാരായ എ. ജവഹർ പഴനിയപ്പൻ, എ. കോതൈ എന്നിവരെയാണ് കേസിൽ പ്രതികളാക്കിയത്.

പിന്നീട് ജവഹർ പഴനിയപ്പനും കോതൈയും ഹൈക്കോടതിയെ സമീപിച്ചതിനെ തുടർന്ന് ഇവരെ കേസിൽനിന്ന് ഒഴിവാക്കുകയായിരുന്നു. എന്നാൽ മറ്റുള്ളവർക്കെതിരായ കേസ് തുടരാൻ കോടതി ഉത്തരവിട്ടു. ഇതിനിടെ, 16 വർഷമായി തുടരുന്ന വിചാരണയ്ക്കിടയിൽ ലേഖനത്തിന്റെ രചയിതാവായ സോലൈ മരണപ്പെട്ടു.

ഇപ്പോഴിതാ, കേസിൽ ഹാജരാകാത്തതിനെ തുടർന്ന് എഡിറ്ററടക്കം മൂന്ന് പേർക്കെതിരെ ജാമ്യമില്ലാ അറസ്റ്റ് വാറണ്ട് പുറപ്പെടുവിച്ചതോടെ 2009ൽ ആരംഭിച്ച അപകീർത്തിക്കേസ് വീണ്ടും ശ്രദ്ധ നേടുകയാണ്.