അഴുക്കുചാലില്‍ 7 ഭ്രൂണങ്ങള്‍ ഉപേക്ഷിച്ച നിലയില്‍; ലിംഗനിര്‍ണയത്തിന് ശേഷം ഭ്രൂണഹത്യ നടത്തിയതാകാമെന്ന് സംശയം, സംഭവത്തിൽ അന്വേഷണം ആരംഭിച്ച് പോലീസ്

ബംഗളൂരു: നഗരത്തിലെ അഴുക്കുചാലില്‍ 7 ഭ്രൂണങ്ങള്‍ ഉപേക്ഷിച്ച നിലയില്‍ കണ്ടെത്തി. കര്‍ണാടകയിലെ ബെലഗവിയിലാണ് സംഭവം. മുദലഗി ടൗണില്‍ നിന്നാണ് ഭ്രൂണങ്ങള്‍ കണ്ടെത്തിയിരിക്കുന്നത്. അഞ്ച് മാസം പ്രായമുള്ള ഭ്രൂണമാണിത് എന്നാണ് പ്രാഥമിക നിഗമനം. ലിംഗനിര്‍ണയത്തിന് ശേഷം ഗര്‍ഭച്ഛിദ്രം നടത്തിയതാകാം എന്ന് ജില്ലാ ആരോഗ്യവകുപ്പ് ഓഫീസര്‍ സംശയിക്കുന്നു.

ആശുപത്രികളില്‍ നിന്നും ഇവിടെ കൊണ്ടിട്ടതാകാം എന്നും സംശയമുണ്ട്. സംഭവത്തില്‍ പ്രാദേശിക പോലീസ് കേസെടുത്ത് അന്വേഷണം ആരംഭിച്ചു. സംഭവത്തില്‍ സംസ്ഥാന ആരോഗ്യ വകുപ്പ് അന്വേഷണത്തിന് ഉത്തരവിട്ടിട്ടുണ്ട്.

മൂദലഗി ടൗണിലെ ബസ് സ്റ്റോപ്പിന് സമീപത്ത് പ്രദേശവാസികളാണ് ഭ്രൂണങ്ങള്‍ കണ്ടെത്തിയത്. പിന്നീട് നാട്ടുകാര്‍ വിവരം പൊലീസിനെ അറിയിക്കുകയായിരുന്നു. പൊലീസ് സ്ഥലത്തെത്തി പരിശോധന നടത്തി.

‘ഒരു പെട്ടിയില്‍ ഏഴ് ഭ്രൂണങ്ങളാണ് ഉപേക്ഷിച്ച നിലയില്‍ കണ്ടെത്തിയത്. അഞ്ച് മാസം പ്രായമുള്ള ഭ്രൂണങ്ങളെ ലിംഗനിര്‍ണയം നടത്തിയശേഷം ഗര്‍ഭച്ഛിദ്രം ചെയ്യുകയായിരുന്നു. ജില്ലാ അധികാരികളെ അറിയിച്ച ശേഷം ഉടന്‍ തന്നെ പ്രത്യേക സംഘം രൂപീകരിച്ച്‌ അന്വേഷിക്കുമെന്ന് ജില്ലാ ആരോഗ്യ കുടുംബക്ഷേമ ഓഫീസര്‍ ഡോ. മഹേഷ് കോനി മാധ്യമങ്ങളോട് പറഞ്ഞു.

ഭ്രൂണങ്ങള്‍ ആശുപത്രിയില്‍ സൂക്ഷിച്ചിരിക്കുകയാണ്. അത് കുടുതല്‍ പരിശോധനകള്‍ക്കായി ജില്ലാ ഫങ്ഷണല്‍ സയന്‍സ് സെന്ററിലേക്ക് ​കൊണ്ടുപോകുമെന്നും അദ്ദേഹം പറഞ്ഞു. സംഭവത്തില്‍ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.