അയോദ്ധ്യ രാമക്ഷേത്രത്തിൽ നുഴഞ്ഞുകയറി നിസ്കരിക്കാൻ ശ്രമം! കശ്മീർ സ്വദേശി കസ്റ്റഡിയിൽ, സുരക്ഷാ ഏജൻസികൾ ചോദ്യം ചെയ്യുന്നു

അയോദ്ധ്യ ശ്രീരാമക്ഷേത്ര സമുച്ചയത്തിനുള്ളിൽ നുഴഞ്ഞുകയറി നിസ്കരിക്കാൻ ശ്രമിച്ച കശ്മീർ സ്വദേശിയെ സുരക്ഷാ ഉദ്യോഗസ്ഥർ പിടികൂടി. കശ്മീരിലെ ഷോപ്പിയാൻ ജില്ലയിൽ നിന്നുള്ള അഹമ്മദ് ഷെയ്ഖ് (55) എന്നയാളാണ് പിടിയിലായത്. വെള്ളിയാഴ്ച ക്ഷേത്ര ദർശനം നടത്തിയ ശേഷം പുറത്തിറങ്ങിയ ഇയാൾ സീതാ രസോയി ഭാഗത്ത് ഇരുന്നു നിസ്കരിക്കാൻ തുനിയുകയായിരുന്നു എന്നാണ് പ്രാഥമിക വിവരം. ഉടൻ തന്നെ സ്ഥലത്തുണ്ടായിരുന്ന സുരക്ഷാ ഉദ്യോഗസ്ഥർ ഇടപെടുകയും ഇയാളെ തടയുകയും ചെയ്തു.

തടയാൻ ശ്രമിച്ചപ്പോൾ ഇയാൾ മുദ്രാവാക്യം വിളിച്ചതായി സൂചനയുണ്ടെങ്കിലും ഔദ്യോഗികമായി ഇത് സ്ഥിരീകരിച്ചിട്ടില്ല. ക്ഷേത്രത്തിലെ സുരക്ഷാ വിഭാഗം കസ്റ്റഡിയിലെടുത്ത ഇയാളെ പിന്നീട് കൂടുതൽ ചോദ്യം ചെയ്യലിനായി പ്രാദേശിക പോലീസിന് കൈമാറി. രഹസ്യാന്വേഷണ ഏജൻസികളും പോലീസും സംയുക്തമായാണ് ഇയാളെ ചോദ്യം ചെയ്യുന്നത്. അയോദ്ധ്യ സന്ദർശിക്കാനുള്ള യഥാർത്ഥ ലക്ഷ്യം എന്താണെന്നും ഇയാൾക്കൊപ്പം മറ്റാരെങ്കിലും ഉണ്ടോ എന്നും അധികൃതർ പരിശോധിച്ചുവരികയാണ്. പരിശോധനയിൽ ഇയാളുടെ പക്കൽ നിന്ന് കശുവണ്ടി, ഉണക്കമുന്തിരി തുടങ്ങിയവ കണ്ടെടുത്തു. താൻ അജ്മീറിലേക്ക് പോകുകയായിരുന്നു എന്നാണ് ഇയാൾ പോലീസിനോട് പറഞ്ഞിട്ടുള്ളത്.

അടുത്ത ആഴ്ച നടക്കാനിരിക്കുന്ന മകരസംക്രാന്തി ആഘോഷങ്ങൾക്കും രാമക്ഷേത്ര പ്രതിഷ്ഠയുടെ രണ്ടാം വാർഷികത്തിനും മുന്നോടിയായി അയോദ്ധ്യയിൽ അതീവ ജാഗ്രത നിലനിൽക്കുന്ന സാഹചര്യത്തിലാണ് ഈ സംഭവം. അതീവ സുരക്ഷാ മേഖലയിലുണ്ടായ ഈ വീഴ്ചയെ ഗൗരവത്തോടെയാണ് അധികൃതർ കാണുന്നത്. സംഭവത്തെത്തുടർന്ന് ക്ഷേത്ര സമുച്ചയത്തിലെ സുരക്ഷാ ക്രമീകരണങ്ങൾ മുതിർന്ന പോലീസ് ഉദ്യോഗസ്ഥരും രഹസ്യാന്വേഷണ വിഭാഗവും പുനഃപരിശോധിച്ചു. അയോദ്ധ്യ ജില്ലാ ഭരണകൂടമോ രാമക്ഷേത്ര ട്രസ്റ്റോ സംഭവത്തിൽ ഔദ്യോഗികമായി ഇതുവരെ പ്രതികരിച്ചിട്ടില്ല.