കടുത്തുരുത്തിയിലെ ആതിരയുടെ ആത്മഹത്യ;പ്രതിക്കായി ലുക്ക് ഔട്ട് നോട്ടീസ് പുറപ്പെടുവിച്ച് പോലീസ്

കോട്ടയം: സൈബര്‍ ആക്രമണത്തെ തുടര്‍ന്ന് കടുത്തുരുത്തി സ്വദേശി ആതിര ആത്മഹത്യ ചെയ്ത സംഭവത്തില്‍ പ്രതിയെ കണ്ടെത്താന്‍ ലുക്ക് ഔട്ട് നോട്ടീസ് പുറത്തുവിട്ട് പോലീസ്. പരാതി ലഭിച്ച് നാലു ദിവസമായിട്ടും പ്രതി അരുണ്‍ വിദ്യാധരനെ പൊലീസിന് പിടികൂടാനായിട്ടില്ല. ഇതോടെയാണ് പൊലീസ് ലുക്ക് ഔട്ട് നോട്ടീസ് പുറത്തുവിട്ടിരിക്കുന്നത്. അതേസമയം, അരുണ്‍ വിദ്യാധരനായുള്ള തിരച്ചിൽ തമിഴ്‌നാട് കേന്ദ്രീകരിച്ചും തുടരുകയാണ്.

സൈബര്‍ ആക്രമണത്തെ തുടര്‍ന്ന് ആതിര ആത്മഹത്യ ചെയ്തത് കഴിഞ്ഞ ഞായറാഴ്ചയായിരുന്നു. അരുണ്‍ വിദ്യാധരന്‍ കോയമ്പത്തൂരില്‍ ഒളിവില്‍ കഴിയുകയാണെന്നാണ് പോലീസിന്റെ നിഗമനം. ഇതിന്റെ അടിസ്ഥാനത്തിൽ തമിഴ്‌നാട് പൊലീസിന്റെ സഹായത്തോടെ അന്വേഷണം നടക്കുകയാണ്.