കോന്നിയിൽ എസ്ഐക്കെതിരെ ആക്രമണം; സംഭവം ഹോട്ടലിൽ വച്ച്, ഒരാള്‍ അറസ്റ്റില്‍, പ്രതിക്ക് മുന്‍വൈരാഗ്യമെന്ന് സൂചന

പത്തനംതിട്ട: കോന്നിയിൽ പോലീസ് ഉദ്യോഗസ്ഥന് നേരെ ആക്രമണം. കോന്നി സ്റ്റേഷനിലെ എസ്ഐ സജു എബ്രഹാമിന് നേരെയാണ് ഹോട്ടലിനുള്ളിൽ വച്ച് ആക്രമണം നടന്നത്. സംഭത്തിൽ എലിയറക്കൽ സ്വദേശി മാഹീനെ പോലീസ് അറസ്റ്റ് ചെയ്തു.

നഗരത്തിലെ ഹോട്ടലിൽ ഭക്ഷണം കഴിക്കാൻ എത്തിയ സബ് ഇന്‍സ്പെക്ടര്‍ സജു എബ്രഹാമിനെ പ്രതി മാഹീൻ ആക്രമിക്കുകയായിരുന്നു. ഹോട്ടലിന് മുന്നില്‍ റോഡ് ഗതാഗതം പ്രതി തടസപ്പെടുത്തിയിരുന്നു. ഇത് ചോദ്യം ചെയ്തപ്പോഴാണ് മാഹീന്‍ എസ്ഐയെ മര്‍ദ്ദിച്ചത്. വാഹനം മാറ്റിയിടാൻ ആവശ്യപ്പെട്ട എസ്ഐയോട് മാഹീൻ ദേഷ്യപ്പെടുകയായിരുന്നു. തർക്കത്തിൽ തുടങ്ങി പിന്നെ കയ്യാങ്കളിയിൽ അവസാനിക്കുകയായിരുന്നു. ആദ്യ ഘട്ടത്തിൽ തർക്കം മാത്രമാണുണ്ടായിരുന്നത്. ശേഷം ഹോട്ടലിന് പുറത്തേക്ക് പോയ പ്രതി പിന്നീട് വീണ്ടും ഹോട്ടലിന് ഉള്ളിൽ കയറി പോലീസുകാരനെ ആക്രമിക്കുകയായിരുന്നു.

സംഭവം നടക്കുമ്പോള്‍ പ്രതി മദ്യ ലഹരിയിലായിരുന്നു. ഇക്കഴിഞ്ഞ ഞായറാഴ്ച മാഹീനെ മദ്യപിച്ച് വാഹനം ഓടിച്ചതിന് എസ്ഐ പിഴ ഈടാക്കിയിരുന്നു. ഇതിന്റെ വൈരാഗ്യത്തിലാണ് എസ്ഐയെ ഇയാൾ മർദ്ദിച്ചത്. എസ്ഐയെ മർദ്ദിച്ചതിന് ശേഷം പ്രതി ഓടിരക്ഷപ്പെട്ടു. ഇന്ന് രാവിലെയാണ് മാഹിനെ പിടികൂടിയത്. ഇയാളുടെ അറസ്റ്റ് രേഖപ്പെടുത്തി സ്റ്റേഷൻ ജാമ്യത്തിൽ വിട്ടു.