പ്രവാചകനെ അപമാനിച്ചെന്നാരോപിച്ച് പൊലീസ് സ്റ്റേഷന് നേരെ ആക്രമണം ! പ്രതികളായ ഇസ്ലാമിസ്റ്റുകളുടെ വീടുകൾക്ക് നേരെ ബുൾഡോസർ നടപടിയുമായി മദ്ധ്യപ്രദേശ് സർക്കാർ

മദ്ധ്യപ്രദേശ് : പ്രവാചകനെ അപമാനിച്ചെന്നാരോപിച്ച് കലാപം ഉണ്ടാക്കാൻ ശ്രമിച്ച ഇസ്ലാമിസ്റ്റുകൾക്കെതിരെ ബുൾഡോസർ നടപടിയുമായി മദ്ധ്യപ്രദേശ് സർക്കാർ. മഹാരാഷ്‌ട്രയിൽ നിന്നുള്ള രാമഗിരി മഹാരാജ്, പ്രവാചകനെതിരെ പ്രസംഗിച്ചെന്നാരോപിച്ച് ഇസ്ലാമിസ്റ്റുകൾ പോലീസ് സ്റ്റേഷൻ ആക്രമിച്ചിരുന്നു. പിന്നാലെയാണ് പോലീസിന് നേരെ കല്ലെറിഞ്ഞ പ്രതികളുടെ വീടുകൾ അധികൃതർ ബുൾഡോസർ ഉപയോഗിച്ച് പൊളിക്കാൻ ആരംഭിച്ചത്.

ഛത്തർപൂർ കോട്വാലി പോലീസ് സ്റ്റേഷനാണ് ഇസ്ലാമിസ്റ്റുകൾ തല്ലി തകർക്കുകയും പോലീസുകാർക്കെതിരെ കല്ലെറിയുകയും ചെയ്തത്. ഈ പ്രതികൾക്കെതിരെ കർശന നടപടിയെടുക്കാൻ മുഖ്യമന്ത്രി മോഹൻ യാദവ് ഉത്തരവിട്ടിരുന്നു. തുടർന്നാണ് സംഘർഷത്തിൽ ഉൾപ്പെട്ട 150 പേർക്കെതിരെ പോലീസ് കേസെടുത്തതും ബുൾഡോസർ നടപടി സ്വീകരിച്ചതും. മുഖ്യപ്രതി ഷെഹ്‌സാദ് ഹാജിയുടെ വീട്ടിലാണ് ബുൾഡോസർ നടപടി ആദ്യമുണ്ടായത്. അതേസമയം, സംഘർഷമുണ്ടാകാൻ സാധ്യതയുള്ളതിനാൽ സ്ഥലത്ത് കനത്ത പോലീസ് സന്നാഹത്തെ വിന്യസിച്ചിട്ടുണ്ട്.