ബാങ്കോക്കിൽനിന്ന് കോടികൾ വിലമതിക്കുന്ന ഹൈഡ്രോപോണിക് കഞ്ചാവ് കടത്താൻ ശ്രമം !!മുൻ മിസ്സിസ് കേരള മത്സരാർത്ഥി മുംബൈ വിമാനത്താവളത്തിൽ അറസ്റ്റിൽ

ബാങ്കോക്കിൽനിന്ന് കോടികൾ വിലമതിക്കുന്ന ലഹരിമരുന്ന് കടത്താൻ ശ്രമിച്ച മുൻ മിസ്സിസ് കേരള മത്സരാർത്ഥി മുംബൈ വിമാനത്താവളത്തിൽ അറസ്റ്റിലായി. വയനാട് സ്വദേശിനിയും 2025-ലെ മിസ്സിസ് കേരള സൗന്ദര്യ മത്സരത്തിൽ മത്സരിക്കുകയും ചെയ്ത ഹർഷ സണ്ണി (28) ആണ് 11.82 കോടി രൂപ വിലമതിക്കുന്ന ഹൈഡ്രോപോണിക് കഞ്ചാവുമായി പിടിയിലായത്. ജൂൺ പത്തിന് രാത്രിയിൽ ബാങ്കോക്കിൽനിന്നുള്ള എയർ ഇന്ത്യ വിമാനത്തിൽ മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിൽ എത്തിയപ്പോഴാണ് കസ്റ്റംസും എയർ ഇന്റലിജൻസ് യൂണിറ്റും ചേർന്ന് ഇവരെ കസ്റ്റഡിയിലെടുത്തത്.

വിമാനത്താവളത്തിലെ പതിവ് നിരീക്ഷണങ്ങൾക്കിടെ യാത്രക്കാരുടെ പ്രൊഫൈലിങ് പരിശോധനയിലാണ് ഹർഷയുടെ പെരുമാറ്റത്തിൽ ഉദ്യോഗസ്ഥർക്ക് സംശയം തോന്നിയത്. തുടർന്ന് ഇവരെ തടഞ്ഞുനിർത്തി ലഗേജുകൾ വിശദമായി പരിശോധിക്കുകയായിരുന്നു. ഹർഷയുടെ ട്രോളി ബാഗിനുള്ളിൽ വാക്വം സീൽ ചെയ്ത് ഒളിപ്പിച്ച നിലയിൽ 12 വലിയ പ്ലാസ്റ്റിക് പാക്കറ്റുകൾ കണ്ടെത്തുകയായിരുന്നു. നാർക്കോട്ടിക് ഡ്രഗ്‌സ് ആൻഡ് സൈക്കോട്രോപിക് സബ്സ്റ്റൻസസ് (NDPS) കിറ്റ് ഉപയോഗിച്ച് നടത്തിയ രാസപരിശോധനയിലാണ് ഇത് പ്രീമിയം ഗുണനിലവാരമുള്ള ഹൈഡ്രോപോണിക് ഇനത്തിൽപ്പെട്ട കഞ്ചാവാണെന്ന് വ്യക്തമായത്. 11 കിലോയിലധികം തൂക്കം വരുന്ന ഈ മയക്കുമരുന്നിന് അന്താരാഷ്ട്ര വിപണിയിൽ ഏകദേശം 11.82 കോടി രൂപ വിലവരുമെന്ന് കസ്റ്റംസ് അധികൃതർ അറിയിച്ചു. ലഹരിമരുന്ന് കടത്താൻ ശ്രമിച്ചതിന് എൻ.ഡി.പി.എസ് നിയമപ്രകാരം ഹർഷ സണ്ണിയെ കസ്റ്റംസ് അറസ്റ്റ് ചെയ്തു. ഇവരെ മുംബൈയിലെ ഫോർട്ട് കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ വിട്ടു. സംഭവത്തിൽ കൂടുതൽ അന്വേഷണം നടന്നുവരികയാണെന്ന് അധികൃതർ വ്യക്തമാക്കി.