അതിരാത്രവേദിയെ ഭക്തിസാന്ദ്രമാക്കി അവഭൃതസ്നാനവും സൗത്രാമണിയാഗവും; അനുഷ്ഠാന പൂർണ്ണതയിൽ കോഴിക്കോട് നഗരം; തത്ത്വമയി ഒരുക്കിയ തത്സമയ സംപ്രേക്ഷണത്തിലൂടെ അതിരാത്രം ഇതിനോടകം വീക്ഷിച്ചത് ലോകമെമ്പാടുമുള്ള ഭക്തലക്ഷങ്ങൾ

കോഴിക്കോട് : കക്കോടിയിലെ വേദമഹാമന്ദിരത്തിൽ പുരോഗമിക്കുന്ന അതിരാത്രത്തെ പവിത്രമാക്കിക്കൊണ്ട് അവഭൃതസ്നാനവും സൗത്രാമണിയാഗവും ഇന്ന് നടക്കും. യാഗത്തിന്റെ പൂർത്തീകരണ സമയത്ത് യജമാനനും മറ്റ് ഋത്വിക്കുകളും നദിയിൽ മുങ്ങി ശുദ്ധിയാകുന്ന ചടങ്ങാണ് അവഭൃതസ്നാനം. അതിരാത്രം പോലുള്ള സോമയാഗങ്ങളിൽ സോമരസം ഉപയോഗിക്കുന്നതിനാൽ, അതിന്റെ ദോഷങ്ങളെ പരിഹരിക്കുന്നതിനുള്ള യാഗമാണിത്. പ്രാചീനമായ സൗത്രാമണിയാഗമാണ് ഇന്ന് ആചാര്യശ്രീ രാജേഷിന്റെ നേതൃത്വ ത്തിൽ നടക്കുക. ഏഴ് ഹവിർ യാഗങ്ങളിൽ ഒന്നാണ് സൗത്രാ മണി യാഗം. ഇന്ദ്രനുവേണ്ടി ചെ യ്യുന്ന യാഗം കൂടിയാണിത്. പുലർച്ചെ 4.30 മുതൽ രാത്രി 10 മണി വരെയാണ് ചടങ്ങുകൾ. ഇന്നലെ സോമലത ഇടിച്ചുപിഴിഞ്ഞെടുക്കുന്ന സോമരസം യാഗാഗ്നിയിൽ നാല് നേരങ്ങളിലായി ആഹുതിചെയ്യപ്പെട്ടു.

യാഗചടങ്ങുകളോട് അനുബന്ധിച്ച് പ്രമുഖ വ്യക്തിത്വങ്ങൾ പങ്കെടുത്ത പ്രത്യേക പരിപാടികളും അതിരാത്രവേദിയിൽ സംഘടിപ്പിച്ചിരുന്നു. എട്ടാം ദിനത്തെ വിഷ്വൽ സദസ് ഉദ്ഘാടനം ദില്ലി ആസ്ഥാനമായുള്ള സർവേ ഭവന്തു സുഖിനോ ട്രസ്റ്റ് അദ്ധ്യക്ഷൻ ജിതേന്ദ്ര ഭാട്ടിയ നിർവഹിച്ചു. ആര്യ സമാജം പ്രസിഡന്റ് രംഗലാൽ ഉൾപ്പെടെയുള്ള നിരവധി പ്രമുഖരും സദസ്സിൽ പങ്കെടുത്തു. ഷീനാ ചിത്രാംഗദൻ അദ്ധ്യക്ഷത വഹിച്ചു ആചാര്യശ്രീ രാജേഷ് അനുഗ്രഹ പ്രഭാഷണം നടത്തി. സി സുരേഷ് വൈദിക്, പി ജയദേവൻ , ശില്പി താജി ,എം ഗംഗാധരൻ നായർ എന്നിവർ സംസാരിച്ചു. മഹർഷി ദയാനന്ദ സരസ്വതിയുടെ ജീവിതദർശനങ്ങളെ ആസ്പദമാക്കി അവതരിപ്പിച്ച രംഗാവിഷ്കാരം ചടങ്ങുകൾക്ക് കൂടുതൽ അർത്ഥവത്തായ മാനങ്ങൾ നൽകി. തത്ത്വമയി ഒരുക്കുന്ന തത്സമയ സംപ്രേക്ഷണത്തിലൂടെ ലോകമെമ്പാടുമുള്ള ലക്ഷക്കണക്കിന് ഭക്തരാണ് അതിരാത്രത്തിന്റെ പുണ്യ നിമിഷങ്ങൾ വീക്ഷിച്ചു കൊണ്ടിരിക്കുന്നത്