വിസ്മയമൊരുക്കി ‘ദൃശ്യ നരേന്ദ്രം’ പ്രദർശനം; തിരുവനന്തപുരം ചന്ദ്രശേഖരൻ നായർ സ്റ്റേഡിയം ഹാളിൽഒക്ടോബർ 2 വരെ നീണ്ടുനിൽക്കും

പ്രധാനമന്ത്രി നരേന്ദ്ര മോദിയുടെ 73–ാം ജന്മദിനാഘോഷത്തോടനുബന്ധിച്ച് രണ്ടാഴ്ച നീണ്ടുനിൽക്കുന്ന വിപുലമായ ആഘോഷങ്ങളാണ് വിവിധ മന്ത്രാലയങ്ങളുടെയും ബിജെപിയുടെയും നേതൃത്വത്തിൽ നടക്കുന്നത്. ഇപ്പോഴിതാ പ്രധാനമന്ത്രിയുടെ ജന്മദിനാഘോഷത്തോടനുബന്ധിച്ച് തിരുവനന്തപുരത്ത് അരവിന്ദോ കൾച്ചറൽ സൊസൈറ്റിയുടെ ആഭിമുഖ്യത്തിൽ ‘ദൃശ്യ നരേന്ദ്രം’ എന്ന പ്രദർശനി ആരംഭിച്ചു. സെപ്റ്റംബർ 17ന് മുതൽ ആരംഭിച്ച പരിപാടി ഒക്ടോബർ 2 വരെ ചന്ദ്രശേഖരൻ നായർ സ്റ്റേഡിയം ഹാളിൽ നടക്കും. പ്രദർശിനി മുൻകേന്ദ്ര മന്ത്രി രാജഗോപാലൻ ആണ് ഉദ്ഘാടനം ചെയ്തത്.

സൊസൈറ്റി പ്രസിഡന്റ് രാമൻപിള്ള അധ്യക്ഷനായ ചടങ്ങിൽ വി റ്റി രമ, അശോക് കുമാർ, പ്രൊഫസർ രഘുനാഥ്, കെപി ശ്രീരാമൻ എന്നിവർ പങ്കെടുത്തിരുന്നു. വ്യത്യസ്തമായ ഒരു ജന്മദിന ആദരമാണ് ‘ദൃശ്യ നരേന്ദ്രം’ എന്ന പരിപാടിയിലൂടെ സംഘടകർ നടത്തുന്നത്. നരേന്ദ്രമോദിയുടെ നേതൃത്വത്തിൽ കഴിഞ്ഞ വർഷം കൊണ്ട് ആർജ്ജിച്ച നേട്ടങ്ങളും അന്താരാഷ്ട്ര അംഗീകാരങ്ങളും സാധാരണക്കാരുടെ ഉന്നമനത്തിന് വേണ്ടി നടപ്പിലാക്കിയ വിവിധ പദ്ധതികളും പഠനവിധേയമാക്കി കൊണ്ട് 18 മുതൽ ഒക്ടോബർ 2 വരെ എല്ലാ ദിവസവും വൈകിട്ട് 5 മണിക്ക് സെമിനാറുകൾ നടത്തുന്നുണ്ട്.

ഇത് കൂടാതെ ആരോഗ്യം സാമ്പത്തികം, നയതന്ത്രം, ദേശ സുരക്ഷ, വിദ്യാഭ്യാസം തുടങ്ങിയ എല്ലാ മേഖലകളിലും സെമിനാറുകളിൽ ചർച്ച ചെയ്യപ്പെടും. 18ന് തിങ്കളാഴ്ച 5 30ന് ആരോഗ്യ സർവ്വകലാശാല വൈസ് ചാൻസിലർ ഡോക്ടർ മോഹനൻകുന്നുമ്മേൽ, പ്രദീപ് ജ്യോതി എന്നിവർ ആരോഗ്യഭാരതം എന്ന വിഷയത്തിൽ പ്രഭാഷണം നടത്തിയിരുന്നു. ദൂരദർശൻ, ഐഎസ്ആർഒ, ആർ ജി സിബി തുടങ്ങിയ നിരവധി സ്ഥാപനങ്ങളുടെ പ്രദർശിനികളും ഈ പരിപാടികളുടെ ഭാഗമാണ്. ഇത് കൂടാതെ, വിദ്യാർത്ഥികൾക്ക് മത്സരങ്ങളും പരിപാടിയിൽ നടത്തുന്നുണ്ട്. എല്ലാ ദിവസവും സെമിനാറിനു ശേഷം കലാപരിപാടികളുമുണ്ട്.