പാക് സൈനിക ക്യാമ്പുകൾക്ക് നേരെ വീണ്ടും ബലൂച് പോരാളികളുടെ ആക്രമണം ! വനിതാ ചാവേർ പൊട്ടിത്തെറിച്ചു ! നിരവധി പാക് സൈനികർ കൊല്ലപ്പെട്ടു

ഇസ്ളാമാബാദ് : ബലൂചിസ്ഥാനിലെ നുഷ്കി ജില്ലയിലെ അതീവ സുരക്ഷാ സംവിധാനങ്ങളുള്ള സൈനിക ക്യാമ്പിന് നേരെ ബലൂച് പോരാളികൾ നടത്തിയ ആക്രമണത്തിൽ നിരവധി പാക് സൈനികർ കൊല്ലപ്പെട്ടു.
സൈനിക താവളത്തിന്റെ സുരക്ഷാ വലയം തകർക്കുന്നതിനായി ഒരു വനിതാ ചാവേറാണ് പൊട്ടിത്തെറിച്ചതെന്ന് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്തു. സുരക്ഷാ സംവിധാനങ്ങൾ തകർത്തതിനുശേഷം നടന്ന മണിക്കൂറുകൾ നീണ്ട വെടിവെപ്പിൽ നിരവധി പാക് സൈനികർ കൊല്ലപ്പെട്ടതായി ബലൂച് ലിബറേഷൻ ഫ്രണ്ട് അവകാശപ്പെട്ടു. മൂന്ന് പോരാളികളെ വധിച്ചതായും കാര്യമായ ആൾനാശമുണ്ടായിട്ടില്ലെന്നുമാണ് പാക് സൈന്യം ഔദ്യോഗികമായി അറിയിച്ചിട്ടുള്ളത്.

ചഗായ് ജില്ലയിലെ നോക്കുണ്ടി പട്ടണത്തിലുള്ള ഫ്രണ്ടിയർ കോർപ്‌സ് (FC) ആസ്ഥാനത്തിന് നേരെ കഴിഞ്ഞ ദിവസം രാത്രി ചാവേർ ആക്രമണമുണ്ടായതായി പാക് സുരക്ഷാ സേനയുടെ വക്താവ് അറിയിച്ചു. ഇതിന് പുറമെ, പാഞ്ച്ഗുർ മേഖലയിലെ ഗുർമകാനിലുള്ള മറ്റൊരു എഫ്.സി. ഔട്ട്‌പോസ്റ്റിന് നേരെയും ബലൂച് ലിബറേഷൻ ആർമി (BLA) ആക്രമണം നടത്തിയതായും ഏറ്റുമുട്ടൽ നടന്നതായും റിപ്പോർട്ടുകളുണ്ട്. ഈ സംഭവത്തിലും നിരവധി പാക് സൈനികർ കൊല്ലപ്പെട്ടതായി സംശയിക്കുന്നുണ്ടെങ്കിലും ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല.

ബിഎൽഎഫ് പ്രസ്താവനകൾ പ്രകാരം, തന്ത്രപ്രധാനമായ സാണ്ടാക്ക്, റെക്കോ ഡിഖ് ഖനന പദ്ധതികളുടെ കനേഡിയൻ ജോലിക്കാർ താമസിക്കുന്ന സെൻട്രൽ കോമ്പൗണ്ടാണ് ആക്രമണത്തിന് ലക്ഷ്യമിട്ടിരുന്നത്. തങ്ങളുടെ ഏറ്റവും മികച്ചതും അതീവ പരിശീലനം നേടിയതുമായ പ്രത്യേക ഓപ്പറേഷൻ വിഭാഗമായ ‘സാദോ ഓപ്പറേഷണൽ ബറ്റാലിയൻ’ (SOB യൂണിറ്റ്) ആണ് ഈ ഓപ്പറേഷൻ നടത്തിയതെന്നും ബി.എൽ.എഫ്. വ്യക്തമാക്കി.ബിഎൽഎഫിന്റെ ഏറ്റവും കടുപ്പമേറിയതും ഉയർന്ന അപകടസാധ്യതയുള്ളതുമായ ആക്രമണങ്ങൾ നടപ്പിലാക്കുന്നത് സാദോ ഓപ്പറേഷണൽ ബറ്റാലിയനാണ്.

ആരാണ് ‘സാദോ ബറ്റാലിയൻ’?

ബലൂച് ഭാഷയിൽ ‘ഇടി’ അല്ലെങ്കിൽ ‘ഇടിമിന്നൽ’ എന്ന് അർത്ഥം വരുന്ന വാക്കാണ് ‘സാദോ’ (Sado). പെട്ടെന്നുള്ള, അപകടകരമായ ആക്രമണങ്ങളുടെ പ്രതീകമായാണ് ഈ പേര് ഉപയോഗിക്കുന്നത്. 40 മുതൽ 80 വരെ വരുന്ന അതീവ പരിശീലനം നേടിയ പോരാളികൾ ഈ വിഭാഗത്തിൽ ഉൾപ്പെടുന്നതായി കണക്കാക്കുന്നു. നിലവിൽ ഡോ. അല്ലാ നസർ ബലൂചാണ് ബി.എൽ.എഫിനെ നയിക്കുന്നത്. 1960-70 കളിൽ ഷെർ മുഹമ്മദ് മാരിയുടെ കീഴിൽ ഇതേ പേരിലുള്ള ഒരു ഗ്രൂപ്പ് നിലനിന്നിരുന്നെങ്കിലും, ഇന്നത്തെ ബി.എൽ.എഫ്. അതിൽ നിന്ന് വ്യത്യസ്തമായ ഒരു സംഘടനയാണ്.