ബംഗ്ലാദേശ് വ്യോമസേനാ വിമാനം സ്‌കൂൾ കെട്ടിടത്തിൽ തകർന്നു വീണുണ്ടായ അപകടം !മരണസംഖ്യ 19 ആയി; 150 പേർക്ക് പരിക്ക് ; അപകടമുണ്ടാക്കിയത് ചൈനീസ് നിർമ്മിത യുദ്ധവിമാനം

ധാക്ക: ബംഗ്ലാദേശ് വ്യോമസേനാ വിമാനം സ്‌കൂൾ കെട്ടിടത്തിൽ തകർന്നു വീണുണ്ടായ അപകടത്തിൽ മരണ സംഖ്യ 19 ആയി. മരിച്ചവരിൽ 16 വിദ്യാര്‍ഥികളും രണ്ട് അധ്യാപകരും പൈലറ്റും ഉള്‍പ്പെടുന്നു. അപകടത്തിൽ നൂറ്റന്‍പതിലധികം പേര്‍ക്ക് പരിക്കേറ്റതായും റിപ്പോർട്ടുണ്ട്. ചിലര്‍ക്ക് ഗുരുതരമായി പൊള്ളലേറ്റിട്ടുണ്ട്. ധാക്കയിലെ സ്‌കൂളും കോളേജും പ്രവര്‍ത്തിക്കുന്ന മൈല്‍സ്റ്റോണ്‍ എന്ന വിദ്യാലയത്തിനു മുകളിലാണ് വിമാനം തകർന്നു വീണത്. ചൈനീസ് നിർമ്മിത എഫ്-7 ബിജിഐ യുദ്ധവിമാനമാണ് തകർന്നത് എന്നാണ് വിവരം. പതിവു പരിശീലനത്തിന്റെ ഭാഗമായി കുര്‍മിറ്റോലയിലെ ബംഗ്ലാദേശ് എയര്‍ഫോഴ്‌സ് ബേസ് ബീര്‍ ഉത്തം എകെ ബന്ദേക്കറില്‍നിന്ന് പുറന്നുയര്‍ന്നതായിരുന്നു വിമാനം. നിമിഷങ്ങള്‍ക്കകം സാങ്കേതികത്തകരാര്‍ സംഭവിച്ച് തകര്‍ന്നുവീഴുകയായിരുന്നു. പ്രധാനമായും പരിശീലനത്തിനും ലഘുവായ പോരാട്ടങ്ങള്‍ക്കുമാണ് വിമാനം ഉപയോഗിക്കുന്നത്

ഇന്ന് ഉച്ചയ്ക്ക് ഒരുമണി കഴിഞ്ഞ്, വിമാനം പറന്നുയർന്നതിന് തൊട്ടുപിന്നാലെയാണ് സംഭവം. അപകടം നടന്നയുടന്‍ വിമാനത്തിന് തീപ്പിടിച്ചു. പൊള്ളലേറ്റവരില്‍ ഭൂരിഭാഗവും വിദ്യാര്‍ഥികളാണെന്നാണ് ആശുപത്രി അധികൃതര്‍ വ്യക്തമാക്കുന്നത്. ഇവരുടെയെല്ലാം നില ഗുരുതരവുമാണ്. മരിച്ചവരില്‍ ചിലരെ തിരിച്ചറിഞ്ഞിട്ടില്ല.= സ്‌കൂള്‍ വിട്ട സമയത്തായിരുന്നു അപകടം. ചില കുട്ടികള്‍ കാന്റീനിലും മറ്റുചിലര്‍ പുറത്തും കോണിപ്പടിയിലും ബാല്‍ക്കണിയിലുമൊക്കെയായിരുന്നു. ക്ലാസ് മുറിക്കകത്തെ കുട്ടികളെ ഒരു വിധത്തിലും രക്ഷപ്പെടുത്താന്‍ കഴിഞ്ഞില്ലെന്നാണ് നാട്ടുകാര്‍ പറയുന്നത്.തകര്‍ന്നുവീണ കെട്ടിടത്തില്‍ അഞ്ച്, ആറ്, ഏഴ് ക്ലാസുകളാണ് പ്രവര്‍ത്തിച്ചിരുന്നതെന്ന് അധ്യാപകര്‍ വ്യക്തമാക്കുന്നു. ക്ലാസ് ഉച്ചയ്ക്ക് അവസാനിച്ചിരുന്നെങ്കിലും പല കുട്ടികളും സ്വകാര്യ കോച്ചിങ്ങിനായി കാത്തിരിക്കുകയായിരുന്നുവെന്നും അധ്യാപകന്‍ നൂറുസ്സമാന്‍ മാധ്യമങ്ങളോട് പ്രതികരിച്ചു. ഇംഗ്ലീഷ് മീഡിയം വിഭാഗത്തോടു ചേര്‍ന്നുള്ള കാത്തിരിപ്പു കേന്ദ്രമായി ഉപയോഗിച്ചിരുന്ന ഒരിടത്താണ് വിമാനം തകര്‍ന്നുവീണത്. ഈഭാഗത്ത് പന്ത്രണ്ടോളം ക്ലാസ് മുറികളുമുണ്ട്.

ലെഫ്റ്റനന്റ് തൗകീര്‍ ഇസ്ലാം സാഗര്‍ ആണ് വിമാനം പറത്തിയിരുന്നത്. പരിക്കേറ്റ ഇദ്ദേഹം ധാക്കയിലെ സൈനിക ആശുപത്രിയില്‍ വെച്ച് മരിച്ചതായി അധികൃതര്‍ അറിയിച്ചു.