ശ്രീകൃഷ്ണ ജന്മാഷ്ടമി ആഘോഷിക്കാൻ ബാപ്‌സ് ഹിന്ദു മന്ദിർ; ക്ഷേത്രത്തിൽ ഒരുക്കുന്നത് വിപുലമായ പരിപാടികൾ !

അബുദാബി: ശ്രീകൃഷ്ണ ജന്മാഷ്ടമി ആഘോഷിക്കാൻ ഒരുങ്ങി അബുദാബിയിലെ ബാപ്‌സ് ഹിന്ദു മന്ദിർ. ഓഗസ്റ്റ് 26 (തിങ്കളാഴ്ച) നാണ് വിപുലമായ ഒരുക്കങ്ങളോടെ ശ്രീകൃഷ്ണ ജന്മാഷ്ടമി ആഘോഷിക്കാൻ ക്ഷേത്രം ഒരുങ്ങുന്നത്. ആഴത്തിലുള്ള ഇന്ത്യ-യുഎഇ ബന്ധത്തിൻ്റെയും സാംസ്കാരികത്തിൻ്റെയും പ്രതീകമായി നിലകൊള്ളുന്ന ക്ഷേത്രം ആണ് ബാപ്‌സ് ഹിന്ദു മന്ദിർ. ഈ കഴിഞ്ഞ ഫെബ്രുവരി 14 നാണ് പ്രധാനമന്ത്രി നരേന്ദ്രമോദി ബാപ്‌സ് ക്ഷേത്രം ഉദ്ഘാടനം ചെയ്തത്. യുഎഇ ഭരണാധികാരി ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ നല്‍കിയ 27 ഏക്കര്‍ സ്ഥലത്ത് പണികഴിപ്പിച്ച അബുദബിയിലെ ആദ്യത്തെ ഹിന്ദു ശിലാ ക്ഷേത്രമാണിത്. ബാപ്സ് എന്നറിയപ്പെടുന്ന ‘ബോച്ചസന്‍വാസി അക്ഷര പുരുഷോത്തം സ്വാമിനാരായണന്‍ സന്‍സ്ത’ ആണ് ക്ഷേത്രം നിർമ്മിച്ചത്. ഇന്ത്യയുടെ സമ്പന്നമായ കലയും മൂല്യങ്ങളും സംസ്‌കാരവും ഉള്‍ക്കൊള്ളിച്ചാണ് ക്ഷേത്രത്തിന്റെ നിര്‍മ്മാണം. എല്ലാ മതസ്ഥരേയും സ്വാഗതം ചെയ്യുന്ന ക്ഷേത്രത്തില്‍ ദിനംപ്രതി തീര്‍ത്ഥാടകരുടെ വൻ തിരക്കാണ് അനുഭവപ്പെടാറുള്ളത്.

ശ്രീകൃഷ്ണ ജന്മാഷ്ടമി ദിനത്തിൽ ധാരാളം ഭക്തരെയും സന്ദർശകരെയും ആകർഷിക്കുമെന്ന് പ്രതീക്ഷിക്കുന്ന ചടങ്ങുകളുടെ ഭാഗമായി നിരവധി ഭക്തിപരവും സാംസ്കാരികവുമായ പരിപാടികളുടെയും ഒരു പരമ്പര തന്നെ കമ്മറ്റി ആസൂത്രണം ചെയ്തിട്ടുണ്ട്. ശ്രീകൃഷ്ണ ജന്മോത്സവം 2024 ഓഗസ്റ്റ് 26ന് രാത്രി 8:30 മുതൽ ആണ് ആരംഭിക്കുക. ശ്രീകൃഷ്ണ ജന്മോത്സവത്തിലെ പ്രധാന ചടങ്ങായ അഷ്ടമി പൂജയിൽ പങ്കെടുക്കാൻ ഭക്തർക്ക് അവസരമുണ്ട്. അഷ്ടമി പൂജയിൽ പങ്കെടുക്കുന്നതിനുള്ള സേവ 51 ദിർഹമായി സജ്ജീകരിച്ചിട്ടുണ്ടെന്ന് ക്ഷേത്രം അറിയിച്ചു. താൽപ്പര്യമുള്ള വ്യക്തികൾക്ക് ക്ഷേത്രത്തിൻ്റെ ഔദ്യോഗിക വെബ്‌സൈറ്റിൽ ഓൺലൈനായി രജിസ്റ്റർ ചെയ്യാവുന്നതാണ്. ക്ഷേത്രത്തിന്റെ ദർശന സമയം രാവിലെ 9 മണി മുതൽ രാത്രി 9 വരെ ആണ്. 3 ദിവസം നീളുന്ന ശ്രീമതി ഭഗവത് പാരായണം 2024 ഓഗസ്റ്റ് 23-24 തീയ്യതികളിൽ (വെള്ളി-ശനി) രാത്രി 8:30 മുതലും 2024 ഓഗസ്റ്റ് 25 (ഞായർ) വൈകുന്നേരം 4:30 മുതൽ 6:00 വരെ നടക്കും. കൂടാതെ ഭക്തി ഭജനിൽ 2024 ഓഗസ്റ്റ് 25 (ഞായർ) രാവിലെ 10 മണി മുതൽ വൈകുന്നേരം 6 വരെ പങ്കെടുക്കാം.

ജന്മാഷ്ടമി ദിനത്തിൽ ക്ഷേത്രം ദർശനത്തിനായി തുറന്നിരിക്കും, ആഘോഷങ്ങളിൽ പങ്കെടുക്കാൻ ഭക്തർക്ക് രാവിലെ 9:00 മുതൽ രാത്രി 9:00 വരെ വിപുലമായ ഒരുക്കങ്ങളാണ് നടത്തിയിരിക്കുന്നത് എന്ന് അധികൃതർ അറിയിച്ചു. ജന്മാഷ്ടമി പൂജയ്ക്ക് പങ്കെടുക്കാൻ ആഗ്രഹിക്കുന്ന ഭക്തർക്ക് ക്ഷേത്രത്തിൻ്റെ ഔദ്യോഗിക വെബ്‌സൈറ്റ് ആയ https://www.mandir.ae/events/janmashthami സന്ദർശിച്ച് അത് രജിസ്റ്റർ ചെയ്യാവുന്നതാണ്.