‘ബാറ്റിൽ ഓഫ് ഗാൽവാൻ’: സൽമാൻ ഖാൻ ചിത്രത്തിനെതിരെ മുഖം കറുപ്പിച്ച്‌ ചൈന; വസ്‌തുതകൾ വളച്ചൊടിക്കുന്നുവെന്ന് ചൈനീസ് മാദ്ധ്യമങ്ങൾ

ദില്ലി : കിഴക്കൻ ലഡാക്കിലെ ഗാൽവാൻ താഴ്വരയിൽ 2020-ൽ നടന്ന ഇന്ത്യ-ചൈന സൈനിക ഏറ്റുമുട്ടലിനെ ആസ്പദമാക്കി ഒരുങ്ങുന്ന ‘ബാറ്റിൽ ഓഫ് ഗാൽവാൻ’ എന്ന ചിത്രത്തിന്റെ ടീസർ പുറത്തുവന്നതിന് പിന്നാലെ മുഖം കറുപ്പിച്ച് ചൈന. സൽമാൻ ഖാൻ നായകനാകുന്ന ഈ യുദ്ധചിത്രം യഥാർത്ഥ വസ്തുതകളെ വളച്ചൊടിക്കുകയാണെന്നാണ് ചൈനീസ് ഔദ്യോഗിക മാദ്ധ്യമമായ ഗ്ലോബൽ ടൈംസ് ആരോപിച്ചത്. അപ്പൂർവ ലാഖിയ സംവിധാനം ചെയ്യുന്ന ചിത്രത്തിൽ, ചൈനീസ് സൈന്യത്തിന്റെ കടന്നുകയറ്റത്തെ ധീരമായി പ്രതിരോധിക്കുന്നതിനിടെ വീരമൃത്യു വരിച്ച 16 ബിഹാർ റെജിമെന്റ് കമാൻഡിംഗ് ഓഫീസർ കേണൽ ബിക്കുമല്ല സന്തോഷ് ബാബുവായാണ് സൽമാൻ ഖാൻ വേഷമിടുന്നത്. ചിത്രത്തിൽ ചിത്രംഗദ സിംഗ്, സെയ്ൻ ഷാ, അങ്കുർ ഭാട്ടിയ തുടങ്ങിയവരും പ്രധാന വേഷങ്ങളിൽ എത്തുന്നുണ്ട്.

സിനിമയിലെ സംഭവങ്ങൾ യാഥാർത്ഥ്യവുമായി പൊരുത്തപ്പെടുന്നില്ലെന്നും ഇന്ത്യൻ സൈനികരുടെ ധീരതയെ അമിതമായി പുകഴ്ത്താനാണ് ചിത്രം ശ്രമിക്കുന്നതെന്നുമാണ് ചൈനീസ് മാദ്ധ്യമത്തിന്റെ വാദം. ഗാൽവാൻ താഴ്വര തങ്ങളുടെ പ്രദേശമാണെന്ന തെറ്റായ വാദം ആവർത്തിക്കുന്ന ഗ്ലോബൽ ടൈംസ്, 2020-ലെ സംഘർഷത്തിന് കാരണം ഇന്ത്യൻ സൈനികർ നിയന്ത്രണരേഖ ലംഘിച്ചതാണെന്നും കുറ്റപ്പെടുത്തുന്നു.
എന്നാൽ ചൈനയുടെ ഈ വാദങ്ങളെ ഇന്ത്യൻ സിനിമാ ലോകം ശക്തമായി അപലപിച്ചു. ചൈനീസ് മാദ്ധ്യമങ്ങളുടെ പ്രതികരണം അവരുടെ അരക്ഷിതാവസ്ഥയാണ് വ്യക്തമാക്കുന്നതെന്ന് സംവിധായകൻ അശോക് പണ്ഡിറ്റ് പ്രതികരിച്ചു. ശത്രുരാജ്യത്തിന്റെ കുടിലതന്ത്രങ്ങൾ തുറന്നുകാട്ടപ്പെടുമ്പോൾ ഇത്തരം പ്രതികരണങ്ങൾ സ്വാഭാവികമാണെന്നും അദ്ദേഹം കൂട്ടിച്ചേർത്തു. അപ്പൂർവ ലാഖിയയെയും സൽമാൻ ഖാനെയും പോലുള്ള പ്രമുഖർ കൃത്യമായ ഗവേഷണങ്ങൾക്ക് ശേഷമേ ഇത്തരമൊരു ചിത്രം നിർമ്മിക്കൂവെന്നും, വസ്തുതകൾ വളച്ചൊടിക്കേണ്ട സാഹചര്യം അവർക്കില്ലെന്നും നടനും നിർമ്മാതാവുമായ രാഹുൽ മിത്ര വ്യക്തമാക്കി. ഗ്ലോബൽ ടൈംസ് കേവലം ഒരു സർക്കാർ മുഖപത്രം മാത്രമാണെന്നും അദ്ദേഹം പരിഹസിച്ചു.

ഏറ്റുമുട്ടലിൽ 20 ഇന്ത്യൻ സൈനികർ വീരമൃത്യു വരിച്ചതായി ഇന്ത്യ ഔദ്യോഗികമായി സ്ഥിരീകരിച്ചിരുന്നു. എന്നാൽ സ്വന്തം ഭാഗത്തെ നാശനഷ്ടങ്ങൾ ആദ്യം പൂർണ്ണമായും നിഷേധിച്ച ചൈന, പിന്നീട് നാല് സൈനികർ മാത്രമാണ് കൊല്ലപ്പെട്ടതെന്ന വാദമാണ് ഉയർത്തിയത്. ബോളിവുഡ് ചിത്രങ്ങളിലൂടെ ഇന്ത്യ ദേശീയവികാരം ഇളക്കിവിടാൻ ശ്രമിക്കുകയാണെന്ന ചൈനയുടെ ആരോപണം അടിസ്ഥാനരഹിതമാണെന്നും, രാജ്യത്തിന്റെ പരമാധികാരം സംരക്ഷിക്കാൻ സൈന്യം നടത്തിയ പോരാട്ടത്തിന്റെ സത്യസന്ധമായ ആവിഷ്കാരമാണ് സിനിമയെന്നും അണിയറപ്രവർത്തകർ അവകാശപ്പെടുന്നു.