ബംഗാൾ വോട്ടെണ്ണൽ! സുപ്രീം കോടതിയിൽ തൃണമൂലിനും മമതയുടെ വ്യാമോഹങ്ങൾക്കും തിരിച്ചടി; കേന്ദ്ര ഉദ്യോഗസ്ഥരുടെ മേൽനോട്ടത്തിൽ മാറ്റമില്ല

ദില്ലി : പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ വോട്ടെണ്ണൽ നടപടികളിൽ കേന്ദ്ര സർക്കാർ ഉദ്യോഗസ്ഥരെയും പൊതുമേഖലാ സ്ഥാപനങ്ങളിലെ ജീവനക്കാരെയും മാത്രം സൂപ്പർവൈസർമാരായി നിയമിക്കാനുള്ള തെരഞ്ഞെടുപ്പ് കമ്മീഷന്റെ തീരുമാനത്തിൽ ഇടപെടാൻ സുപ്രീം കോടതി വിസമ്മതിച്ചു. തിരഞ്ഞെടുപ്പ് കമ്മീഷന്റെ നിർദ്ദേശം പൂർണ്ണമായും നടപ്പിലാക്കുമെന്ന് ഉറപ്പ് ലഭിച്ചതിനെത്തുടർന്ന് ജസ്റ്റിസുമാരായ പി.എസ്. നരസിംഹ, ജോയ്മാല്യ ബാഗ്ചി എന്നിവരടങ്ങിയ പ്രത്യേക ബെഞ്ച് തൃണമൂൽ കോൺഗ്രസിന്റെ ഹർജിയിൽ ഉത്തരവുകളൊന്നും പുറപ്പെടുവിച്ചില്ല. സംസ്ഥാന സർക്കാർ ഉദ്യോഗസ്ഥരെ ഒഴിവാക്കി കേന്ദ്ര ജീവനക്കാരെ വോട്ടെണ്ണലിന് നിയോഗിക്കുന്നതിനെതിരെ നൽകിയ ഹർജി കൊൽക്കത്ത ഹൈക്കോടതി നേരത്തെ തള്ളിയിരുന്നു. ഇതിനെതിരെയുള്ള അടിയന്തര അപ്പീലാണ് സുപ്രീം കോടതി പരിഗണിച്ചത്.

മുതിർന്ന അഭിഭാഷകൻ കപിൽ സിബലാണ് തൃണമൂൽ കോൺഗ്രസിന് വേണ്ടി കോടതിയിൽ ഹാജരായത്. സംസ്ഥാന ജീവനക്കാരെ വോട്ടെണ്ണൽ മേൽനോട്ടത്തിൽ നിന്ന് മാറ്റിനിർത്താനുള്ള കമ്മീഷന്റെ തീരുമാനത്തെ അദ്ദേഹം ശക്തമായി എതിർത്തു. അപാകതകൾ നടക്കുമെന്ന് കമ്മീഷൻ ആരോപിക്കുന്നുണ്ടെങ്കിലും അതിന്റെ അടിസ്ഥാനമെന്താണെന്ന് അദ്ദേഹം ചോദിച്ചു. ഏപ്രിൽ 13-ന് പുറത്തിറക്കിയ സർക്കുലർ 29-ാം തീയതി മാത്രമാണ് തങ്ങളുടെ ശ്രദ്ധയിൽപ്പെട്ടതെന്നും ടിഎംസി കോടതിയെ അറിയിച്ചു. എന്നാൽ, വോട്ടെണ്ണൽ പ്രക്രിയയിൽ കേന്ദ്ര ഉദ്യോഗസ്ഥരെ നിയോഗിക്കുന്നതിൽ അസ്വാഭാവികതയോ നിയമലംഘനമോ ഇല്ലെന്ന ഹൈക്കോടതിയുടെ നിലപാട് സുപ്രീം കോടതിയും ശരിവെക്കുകയായിരുന്നു. മെയ് 4-നാണ് സംസ്ഥാനത്തെ 294 മണ്ഡലങ്ങളിലെയും വോട്ടെണ്ണൽ നടക്കുന്നത്.

അതേസമയം, വോട്ടിംഗ് യന്ത്രങ്ങളിൽ കൃത്രിമം നടന്നുവെന്ന പരാതിയെത്തുടർന്ന് സൗത്ത് 24 പർഗാനാസ് ജില്ലയിലെ 15 ബൂത്തുകളിൽ ഇന്ന് പുനർവോട്ടിംഗ് പുരോഗമിക്കുകയാണ്. മഗ്രാഹട്ട് പശ്ചിമിലെ 11 ബൂത്തുകളിലും ഡയമണ്ട് ഹാർബറിലെ നാല് ബൂത്തുകളിലുമാണ് വോട്ടെടുപ്പ് നടക്കുന്നത്. കനത്ത സുരക്ഷാ സജ്ജീകരണങ്ങളാണ് ഈ മേഖലകളിൽ ഒരുക്കിയിരിക്കുന്നത്. റാപ്പിഡ് ആക്ഷൻ ഫോഴ്സിനെ (RAF) ഉൾപ്പെടെ പോളിംഗ് സ്റ്റേഷനുകളിൽ വിന്യസിച്ചിട്ടുണ്ട്. രണ്ടാം ഘട്ട വോട്ടെടുപ്പിൽ ഡയമണ്ട് ഹാർബറിൽ ബിജെപിയുടെ വോട്ടുകൾ തടയാൻ ഇവിഎമ്മിൽ ടേപ്പ് ഒട്ടിച്ചുവെന്ന ആരോപണം ബിജെപി ഉന്നയിച്ചിരുന്നു. രണ്ടാം ഘട്ടത്തിൽ 92.67 ശതമാനം എന്ന റെക്കോർഡ് പോളിംഗാണ് ബംഗാളിൽ രേഖപ്പെടുത്തിയത്. വോട്ടെണ്ണൽ സുതാര്യമായി പൂർത്തിയാക്കാൻ ആവശ്യമായ എല്ലാ ക്രമീകരണങ്ങളും ഒരുക്കിയിട്ടുണ്ടെന്ന് തിരഞ്ഞെടുപ്പ് കമ്മീഷൻ വ്യക്തമാക്കി.