മദ്ധ്യപ്രദേശിലെ ഭോജശാല കോംപ്ലക്‌സ് തർക്ക കേസ് ! ഹൈക്കോടതി ഉത്തരവ് പ്രകാരം പുരാവസ്തു വകുപ്പ് നടത്തിയ സർവ്വേയിൽ പുറത്ത് വന്നത് നിർണ്ണായക വിവരങ്ങൾ ; പരിശോധനയിൽ കണ്ടെത്തിയത് ഹിന്ദു ദേവന്മാരുടെ വിഗ്രഹങ്ങൾ; മസ്ജിദ്‌ നിർമ്മിച്ചത് സരസ്വതി ക്ഷേത്രം തകർത്തിട്ടെന്ന വാദം വാസ്തവം !

ഭോപ്പാൽ : മദ്ധ്യപ്രദേശിലെ ഭോജശാല കോംപ്ലക്‌സ് തർക്ക കേസിൽ നിർണായകമായ സർവ്വേ റിപ്പോർട്ട് പുറത്തു വിട്ട് പുരാവസ്തു വകുപ്പ്. നിലവിലെ മന്ദിരം ക്ഷേത്രമായിരുന്നുവെന്നതിന്റെ വ്യക്തമായ തെളിവുകളടങ്ങിയ റിപ്പോർട്ട് പുരാവസ്തുവകുപ്പ് മദ്ധ്യപ്രദേശ് ഹൈക്കോടതിയിൽ സമർപ്പിച്ചു. ഹൈക്കോടതി ഉത്തരവ് പ്രകാരം ഫെബ്രുവരി- മാർച്ച് മാസത്തിലായിരുന്നു ഭോജശാലയിൽ പുരാവസ്തുവകുപ്പ് പരിശോധന നടത്തിയത്.

മന്ദിരത്തിൽ നടത്തിയ പരിശോധനയിൽ വെള്ളി, ചെമ്പ്, അലുമിനിയം, സ്റ്റീൽ എന്നിവ കൊണ്ട് നിർമ്മിച്ച നാണയങ്ങൾ കണ്ടെത്തിയിരുന്നു. ഇവയിൽ പത്താം നൂറ്റാണ്ടു മുതൽ ഇരുപതാം നൂറ്റാണ്ടു വരെയുള്ള കാലഘട്ടങ്ങളിൽ നിർമ്മിക്കപ്പെട്ടവയാണിവ. ബ്രഹ്‌മാവ്, ഗണപതി, നരസിംഹം ഭൈരവൻ എന്നീ ദേവന്മാരുടേതുൾപ്പെടെ 94 വിഗ്രഹങ്ങളും കണ്ടെത്തിയിട്ടുണ്ട്. ഇതിന് പുറമെ ആന, കുതിര, കുരങ്ങൻ, പാമ്പ്, ആമ, അരയന്നം, സിംഹം എന്നീ മൃഗങ്ങളുടെ പ്രതിമകൾ, മനുഷ്യരുടെ പ്രതിമകൾ എന്നിവയും ഭോജശാലയിൽ നിന്നും കണ്ടെടുത്തിട്ടുണ്ട്. ഇവയ്ക്ക് പുറമേ കൊത്തുപണികൾ ചെയ്ത ശിലാഫലകങ്ങൾ കണ്ടെടുത്തിട്ടുണ്ട്. ഇവയിൽ ഭൂരിഭാഗവും സംസ്‌കൃതത്തിൽ ശ്ലോകങ്ങൾ കൊത്തിവച്ച ശിലാഫലകങ്ങൾ ആണെന്നും റിപ്പോർട്ടിൽ പറയുന്നു. ഇത് ഭോജശാല കോംപ്ലക്‌സ് ഹൈന്ദവ ക്ഷേത്രം ആയിരുന്നുവെന്നതിന്റെ സൂചനയാണ് നൽകുന്നത്.

എഡി 1094 മുതൽ 1133 വരെ പ്രദേശം ഭരിച്ച നരവർമ്മൻ രാജാവിനെക്കുറിച്ചുള്ള വിവരങ്ങൾ ആലേഖനം ചെയ്ത ഫലകം പരിശോധനയ്ക്കിടെ ലഭിച്ചിട്ടുണ്ട്. ഭോജശാല പ്രമുഖ വിദ്യാഭ്യാസ സ്ഥാപനം ആയിരുന്നു എന്നതിന്റെ തെളിവുകളും സ്ഥലത്ത് നിന്നും ലഭിച്ചിട്ടുണ്ടെന്നും പുരാവസ്തു വകുപ്പ് റിപ്പോർട്ടിൽ അറിയിച്ചിട്ടുണ്ട്. കോടതി ഈ മാസം 22 ന് ഹർജി പരിഗണിക്കും. നിലവിൽ ഹിന്ദുക്കളും ഇസ്ലാംമത വിശ്വാസികളും ഒരു പോലെ ആരാധന നടത്തുന്ന ഭോജശാല മസ്ജിദ് ആണെന്നാണ് മുസ്ലീങ്ങൾ പറയുന്നത്. എന്നാൽ സരസ്വതി ക്ഷേത്രം തകർത്താണ് മസ്ജിദ്‌ നിർമ്മിച്ചത് എന്നാണ് ഹിന്ദു വിഭാഗം പറയുന്നത്