അയോദ്ധ്യ ശ്രീരാമക്ഷേത്രം ഭാരതത്തിൽ തരംഗമാകുന്നു; ക്ഷേത്ര ദർശനത്തിന് തയ്യാറെടുത്ത് ബിജെപി മന്ത്രി സഭകൾ; അതീവ സുരക്ഷയിൽ ക്ഷേത്ര നഗരി

ദില്ലി: അയോദ്ധ്യയിൽ പ്രാണപ്രതിഷ്ഠ കഴിഞ്ഞതോടെ ദർശനത്തിന് തയ്യാറെടുത്ത് പ്രമുഖർ. പ്രാണപ്രതിഷ്ഠ ചടങ്ങിൽ പങ്കെടുക്കാൻ കഴിയാത്ത കേന്ദ്ര മന്ത്രിമാർ കുടുംബസമേതം ദർശനം തുടങ്ങിക്കഴിഞ്ഞു. പാർട്ടി മുൻകൈയെടുത്ത് എല്ലാ മണ്ഡലങ്ങളിൽ നിന്നും ഭക്തരെ അയോദ്ധ്യയിലേക്കെത്തിക്കുമെന്ന് ബിജെപി പ്രഖ്യാപിച്ചിരുന്നു. പിന്നാലെ ബിജെപി ഭരിക്കുന്ന സംസ്ഥാനങ്ങളിലെ മന്ത്രിസഭകൾ ഒരുമിച്ച് രാമക്ഷേത്ര ദർശനത്തിന് ഒരുങ്ങുകയാണ്. യു പി മുഖ്യമന്ത്രി യോഗി ആദിത്യനാഥും മന്ത്രിമാരും ഫെബ്രുവരി ആദ്യവാരം ക്ഷേത്ര ദർശനം നടത്തും. ഗുജറാത്ത് മന്ത്രിസഭ മുഖ്യമന്ത്രിയുടെ നേതൃത്വത്തിൽ ഫെബ്രുവരി 22 ന് ക്ഷേത്രം സന്ദർശിക്കും. കൂടാതെ മഹാരാഷ്ട്ര, മദ്ധ്യപ്രദേശ്, അസം മന്ത്രിസഭകളും രാമക്ഷേത്രത്തിൽ ദർശനം നടത്തും. മഹാരാഷ്ട്ര മുഖ്യമന്ത്രിയും മന്ത്രിമാരും എം എൽ എ മാരോടും എം പി മാരോടും ഒപ്പമാകും ദർശനം നടത്തുക.

പ്രാണപ്രതിഷ്ഠ കഴിഞ്ഞ് ക്ഷേത്രം പൊതുജനങ്ങൾക്കായി തുറന്നു കൊടുത്ത ശേഷം വൻ ഭക്തജനത്തിരക്കാണ് അയോദ്ധ്യയിൽ അനുഭവപ്പെടുന്നത്. കൊടും ശൈത്യത്തെ അവഗണിച്ച് പതിനായിരക്കണക്കിന് രാമഭക്തർ അയോദ്ധ്യയിലേക്ക് ഒഴുകുകയാണ്. ദിനംപ്രതി ഒരുലക്ഷം ഭക്തർക്ക് ദർശനം നൽകാനാണ് അധികൃതർ ശ്രമിക്കുന്നത്. നേരത്തെ ഈ മാസം 25 മുതൽ അടുത്ത മാസം 25 വരെ ദിവസം 50000 ഭക്തരെ രാമജന്മഭുമിയിൽ എത്തിക്കുമെന്ന് ബിജെപി പ്രഖ്യാപിച്ചിരുന്നു. അയോദ്ധ്യ പോരാട്ടത്തിൽ പങ്കെടുത്തിട്ടുള്ള കർസേവകർക്കും പ്രത്യേക ദർശന സൗകര്യമൊരുക്കാൻ അധികൃതർ ശ്രമിക്കുകയാണ്.