‘ബ്രഹ്മാസ്ത്ര’; ചിത്രത്തിനെതിരെ ബഹിഷ്കരണാഹ്വാനം; വഴിയൊരുക്കിയത് തന്റെ ഇഷ്ട ഭക്ഷണത്തെ കുറിച്ച് രൺബീർ കപൂർ പറയുന്ന പഴയ വിഡിയോ

ബോളിവുഡ് ആരാധകർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ‘ബ്രഹ്മാസ്ത്ര’. രൺബീർ കപൂറും ആലിയ ഭട്ടും കേന്ദ്രകഥാപാത്രങ്ങളായി എത്തുന്ന ചിത്രം സെപ്തംബർ 9ന് തിയറ്ററുകളിൽ എത്തും. ഇപ്പോഴിതാ ബോളിവുഡിൽ ബഹിഷ്കരണാഹ്വാനങ്ങൾ സർവസാധാരണമാകുന്ന സാഹചര്യത്തിൽ, അവസാനത്തേതായി മാറിയിരിക്കുകയാണ് ‘ബ്രഹ്മാസ്ത്ര’യും. തന്റെ ഇഷ്ട ഭക്ഷണത്തെ കുറിച്ച് രൺബീർ കപൂർ പറയുന്ന പഴയൊരു വീഡിയോയാണ് ബഹിഷ്കരണാഹ്വാനത്തിന് വഴിയൊരുക്കിയത്.

പഴയൊരു അഭിമുഖത്തിന്റെ വീഡിയോ കട്ടിങ്ങാണ് പുറത്തുവന്നിരിക്കുന്നത്. ഇതിൽ ഇഷ്ട ഭക്ഷണങ്ങൾ ഏതൊക്കെയാണെന്ന് ആരാധകർ ചോദിക്കുന്നുണ്ട്. റെഡ് മീറ്റ് ഭക്ഷണങ്ങൾ ഇഷ്ടമാണെന്നും ബീഫിന്റെ ആരാധകനാണ് താനെന്നും ആയിരുന്നു രൺബീറിന്റെ മറുപടി. ഈ ഭാ​ഗം മാത്രം കട്ട് ചെയ്ത് ട്വിറ്ററിലിട്ടാണ് ചിത്രത്തിനെതിരെ ബോയ്കോട്ട് ക്യാംപെയ്ൻ നടക്കുന്നത്. വർഷങ്ങൾക്ക് മുമ്പ് റോക്ക്സ്റ്റാർ എന്ന ചിത്രത്തിന്റെ ബന്ധപ്പെട്ട് നടന്ന അഭിമുഖമായിരുന്നു ഇത്.

ലൈ​ഗർ, ലാൽ സിം​ഗ് ഛദ്ദ, രക്ഷാബന്ധൻ തുടങ്ങിയ ബോളിവുഡ് ചിത്രങ്ങൾക്ക് എതിരെയും അടുത്തിടെ ബഹിഷ്കരണാഹ്വാനങ്ങൾ നടന്നിരുന്നു. വെയ്ക്ക് അപ് സിദ്ദ്, യെ ജവാനി ഹെ ദിവാനി എന്നീ ചിത്രങ്ങൾക്കു ശേഷം അയാൻ മുഖർജി സംവിധാനം ചെയ്യുന്ന ബ്രഹ്മാത്രയിൽ അമിതാഭ് ബച്ചൻ, നാഗാർജുന, മൗനി റോയ് എന്നിവരും പ്രധാന വേഷത്തിലെത്തുന്നുണ്ട്. ചിത്രം ഹിന്ദി, തമിഴ്, തെലുങ്ക്, കന്നഡ, മലയാളം ഭാഷകളിലായി റിലീസ് ചെയ്യും.