ചാര്‍ജ് വര്‍ധന; സ്വകാര്യ ബസ് സമരം ഇന്ന് അര്‍ധരാത്രി മുതല്‍

തിരുവനന്തപുരം: ബസ് ചാര്‍ജ് വര്‍ധന വൈകുന്നതിനെ തുടർന്ന് സ്വകാര്യ ബസുടമകള്‍ നടത്തുന്ന അനിശ്ചിതകാല സമരം ഇന്ന് അര്‍ധരാത്രി മുതല്‍ ആരംഭിയ്ക്കും. മിനിമം ചാര്‍ജ് 8 രൂപയില്‍ നിന്ന് 12 രൂപയാക്കണമെന്നാണ് ബസുടമകളുടെ ആവശ്യം.

ഇതേ തുടർന്ന് പലതവണ ചര്‍ച്ച നടത്തിയിരുന്നു. ഓരോ തവണ ചര്‍ച്ച കഴിയുമ്പോഴും ബസ് ചാര്‍ജ് കൂട്ടും എന്നല്ലാതെ എത്ര കൂട്ടും എപ്പോള്‍ നടപ്പിലാക്കും എന്ന ഉറപ്പ് മന്ത്രിയില്‍ നിന്ന് കിട്ടിയിട്ടില്ല. ഇതാണ് ബസുടമകളെ ചൊടിപ്പിച്ചത്. ഇനിയും കാത്തിരിക്കാനാകില്ലെന്നാണ് അവരുടെ മറുപടി. ഇന്ധന കമ്പനികൾ വീണ്ടും ഡീസല്‍ നിരക്ക് വര്‍ധിപ്പിക്കുകയാണ്. ഈ സാഹചര്യത്തിൽ നഷ്ടം സഹിക്കാനാകാത്തതിനാലാണ് സമരം തുടങ്ങുന്നതെന്നും ബസുടമകള്‍ വ്യക്തമാക്കി.

പരീക്ഷ കാലമായതിനാല്‍ വിദ്യാര്‍ത്ഥികളെ പരിഗണിക്കാതെ ബസുടമകള്‍ സമരത്തിലേക്ക് പോകുമെന്ന് വിചാരിച്ചില്ലെന്ന് ഗതാഗതമന്ത്രി ആന്റണി രാജു പ്രതികരിച്ചു. നിരക്ക് നിശ്ചയിക്കുന്നതിന് സമയം വേണ്ടി വരുമെന്നും മന്ത്രി കൂട്ടിച്ചേര്‍ത്തു.