“വായിച്ച് കഴിഞ്ഞപ്പോഴേക്കും തളര്‍ന്നുപോയി.. പാവം !!” – രാഷ്ട്രപതിയെ അപമാനിച്ച് സോണിയ ഗാന്ധി ! രൂക്ഷവിമർശനവുമായി ബിജെപി

ദില്ലി : ബജറ്റ് സമ്മേളനത്തിലെ രാഷ്ട്രപതി ദ്രൗപദി മുർമുവിന്റെ അഭിസംബോധനയേക്കുറിച്ച് കോണ്‍ഗ്രസ് നേതാവ് സോണിയ ഗാന്ധി നടത്തിയ പ്രതികരണത്തിൽ വിവാദം ആളിക്കത്തുന്നു. രാഷ്ട്രപതിയുടെ പ്രസംഗത്തേക്കുറിച്ച് മാദ്ധ്യമപ്രവര്‍ത്തകര്‍ ചോദിച്ചപ്പോൾ അഭിസംബോധനയില്‍ നിറയെ വ്യാജ വാഗ്ദാനങ്ങളാണെന്നും വായിച്ച് കഴിഞ്ഞപ്പോഴേക്കും പാവം തളര്‍ന്നുപോയെന്നായിരുന്നു സോണിയയുടെ മറുപടി. രാഷ്ട്രപതിയുടെ പദവിയെ ബഹുമാനിക്കാത്ത തരത്തിലാണ് സോണിയയുടെ പരാമര്‍ശം എന്നാണ് ഉയരുന്ന ആരോപണം.

ഗോത്രവര്‍ഗത്തില്‍ നിന്നുള്ള ഒരു സ്ത്രീ രാജ്യത്തിന്റെ രാഷ്ട്രപതിയായത് കോണ്‍ഗ്രസിന്റെ ഫ്യൂഡല്‍ ചിന്താഗതിക്ക് ദഹിക്കുന്നില്ലെന്ന് ബിജെപി എം.പി സുകാന്ത മജുംദാര്‍ പ്രതികരിച്ചു.

“സോണിയയെ പോലുള്ള മുതിര്‍ന്ന നേതാവ് ഇത്തരത്തിലുള്ള പ്രസ്താവനകള്‍ നടത്താന്‍ പാടില്ല. തീർത്തും അപകീർത്തികരമായ പ്രസ്താവനയാണിത്. ഗോത്രവർഗത്തിൽ നിന്നുള്ള സ്ത്രീയായ ദ്രൗപതി മുര്‍മു ഇന്ന് രാജ്യത്തിന്റെ പ്രഥമ പൗരയാണ്. കോണ്‍ഗ്രസിന് ഇത് അംഗീകരിക്കാന്‍ പറ്റുന്നില്ല. അതുകൊണ്ടാണ് അവര്‍ രാഷ്ട്രപതിയുടെ പ്രസംഗത്തെ എതിര്‍ക്കുന്നത്.”- സുകാന്ത മജുംദാര്‍ പറഞ്ഞു.