കേരളം തീവ്രവാദികളുടെ സുരക്ഷിത കേന്ദ്രമായി മാറുന്നുവന്ന അഭിപ്രായം സമൂഹ മാദ്ധ്യമങ്ങളിൽ പങ്കുവച്ച കേന്ദ്ര മന്ത്രി രാജീവ് ചന്ദ്രശേഖറിനെതിരെയും കേസ് ! ‘വിദ്വേഷ പ്രചാരണം’ വീണ്ടും ആയുധമാക്കി പിണറായി സർക്കാർ; കേസ് ജാമ്യമില്ലാ വകുപ്പുകൾ പ്രകാരം

കൊച്ചി: കേന്ദ്രമന്ത്രി രാജീവ് ചന്ദ്രശേഖറിനെതിരെ കേസെടുത്ത് പോലീസ്. കളമശ്ശേരി സ്‌ഫോടനവുമായി ബന്ധപ്പെട്ട് വിദ്വേഷ പ്രചാരണം നടത്തിയെന്ന് ആരോപിച്ചാണ് എറണാകുളം സെൻട്രൽ പോലീസ് കേസെടുത്തത്. ജാമ്യമില്ലാ വകുപ്പുകൾ പ്രകാരമാണ് കേസെടുത്തത് എന്നാണ് സൂചന. ഐ പി സി 153, 153 എ വകുപ്പുകൾ ചുമത്തി. തീവ്രവാദ ശക്തികൾക്ക് സർക്കാർ എല്ലാവിധ ഒത്താശയും ചെയ്തുകൊടുന്നുവെന്ന വിമർശനം സംസ്ഥാന സർക്കാരിനെതിരെ കളമശ്ശേരി സ്ഫോടനത്തിന്റെ പശ്ചാത്തലത്തിൽ കേന്ദ്രമന്ത്രി സമൂഹ മാദ്ധ്യമങ്ങളിൽ നടത്തിയിരുന്നു. ഈ അഭിപ്രായ പ്രകടനത്തിനെതിരെ മുഖ്യമന്ത്രി തന്നെ ഇന്നലെ രംഗത്തെത്തിയിരുന്നു. പിന്നാലെയാണ് പോലീസ് കേസ് രജിസ്റ്റർ ചെയ്‌തത്‌.

കേന്ദ്രമന്ത്രിക്കെതിരെ നടപടിയ്ക്ക് നിയമോപദേശം ലഭിച്ചിട്ടുണ്ടെന്നാണ് സർക്കാരിന്റെ വാദം. കളമശ്ശേരി സ്‌ഫോടനവുമായി ബന്ധപ്പെട്ട് വിദ്വേഷ പ്രചാരണം നടത്തുന്നവർക്കെതിരെ നിയമ നടപടിയുണ്ടാകുമെന്ന മുന്നറിയിപ്പ് സർക്കാർ നൽകിയിരുന്നു. ഇതിന്റെ മറവിലാണ് സർക്കാരിനെതിരെ വിമർശനം ഉന്നയിച്ച മന്ത്രിക്കെതിരെ ഇപ്പോൾ കേസ് എടുത്തിരിക്കുന്നത്. അതെസമയം ഹമാസ് നേതാവ് സോളിഡാരിറ്റിയുടെ പലസ്‌തീൻ ഐക്യദാർഢ്യ സമ്മേളനത്തിൽ പ്രസംഗിച്ചതിനെതിരെ കേസെടുക്കാനാവില്ലെന്ന് പോലീസ് ഇന്നലെ അറിയിച്ചിരുന്നു.