നിപയിൽ ജാഗ്രത ! പെരിന്തൽമണ്ണയിലെ യുവാവിന്റെ സമ്പർക്ക പട്ടികയിൽ 151 പേർ ! 3 പേർക്ക് രോഗലക്ഷണം

മലപ്പുറം : പെരിന്തൽമണ്ണയിൽ നിപ്പ ബാധിച്ച് മരിച്ചെന്ന് സംശയിക്കുന്ന യുവാവിന്റെ പുതുക്കിയ സമ്പർക്ക പട്ടിക പുറത്ത് വിട്ട് ആരോഗ്യവകുപ്പ്. 151 പേരാണ് പുതുക്കിയ സമ്പർക്കപ്പട്ടികയിലുള്ളത്. ഇതിൽ മൂന്നു പേർക്ക് നിപ്പ ലക്ഷണങ്ങൾ ഉണ്ട്. ഇതിൽ രണ്ടു പേരെ മഞ്ചേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. കോഴിക്കോട് മെഡിക്കൽ കോളജിലെ മൈക്രോബയോളജി വിഭാഗത്തിൽ നടത്തിയ പ്രാഥമിക പരിശോധനയിൽ ഇതിൽ നിപ്പ സ്ഥിരീകരിച്ചതോടെയാണ് ആശങ്ക പരന്നത്. ഇന്ന് വൈകുന്നേരത്തോടെ പൂനെയിലെ വൈറോളജി ലാബിൽ നിന്ന് അന്തിമ ഫലം അറിയാനാകും.

അടിയന്തിര നടപടികൾ കൈക്കൊള്ളുന്നത് സംബന്ധിച്ച് തീരുമാനമെടുക്കാൻ തിരുവാലി പഞ്ചായത്ത് അംഗങ്ങളും ആരോഗ്യവകുപ്പ് ഉദ്യോഗസ്ഥരും രാവിലെ യോഗം ചേർന്നിരുന്നു. പഞ്ചായത്തിലെ പനി ബാധിതരെ കണ്ടെത്താനായി നാളെ തന്നെ മേഖലയിൽ സർവേ ആരംഭിക്കും. സെപ്റ്റംബർ 9നാണു പെരിന്തൽമണ്ണയിലെ എംഇഎസ് മെഡിക്കൽ കോളജിൽ വച്ചു യുവാവ് മരിച്ചത്. നിപ്പ ഔദ്യോഗകമായി സ്ഥിരീകരിച്ചാൽ ആരോഗ്യവകുപ്പ് തുടർനടപടികളിലേക്ക് കടക്കും