ഇരുചക്ര വാഹനങ്ങളിലെ കൈവിട്ട അഭ്യാസങ്ങൾക്ക് കേന്ദ്രപ്പൂട്ട്; രണ്ട് കൈകളും ഹാൻഡിലിൽ ഇല്ലെങ്കിൽ വണ്ടി തനിയെ നിൽക്കും!! പുതിയ സാങ്കേതികവിദ്യ വരുന്നു

ദില്ലി: ഇരുചക്ര വാഹനങ്ങളുടെ ഹാൻഡിലിൽ നിന്ന് കൈകൾ പൂർണ്ണമായും മാറ്റിയുള്ള അപകടകരമായ ഡ്രൈവിംഗ് അഭ്യാസങ്ങൾക്ക് തടയിടാൻ കേന്ദ്ര സർക്കാർ ശക്തമായ നടപടികളിലേക്ക് കടക്കുന്നു. ബൈക്കുകളിലും സ്കൂട്ടറുകളിലും യാത്രക്കാരുടെ സുരക്ഷ ഉറപ്പാക്കുന്നതിനായി രണ്ട് കൈകളും ഹാൻഡിലിൽ തന്നെയുണ്ടെന്ന് ഉറപ്പുവരുത്തുന്ന പ്രത്യേക 3 ഡി ‘ഹാൻഡ്‍സ് ഫ്രീ’ സാങ്കേതികവിദ്യ നിർബന്ധമാക്കാൻ ഒരുങ്ങുകയാണ് കേന്ദ്ര ഭരണകൂടം. ഇനി മുതൽ വാഹന നിർമ്മാതാക്കൾ നിർബന്ധമായും ഈ സുരക്ഷാ സംവിധാനം പുതിയ ഇരുചക്ര വാഹനങ്ങളിൽ ഉൾപ്പെടുത്തേണ്ടി വരും. കേന്ദ്ര ഗതാഗത മന്ത്രാലയത്തിന് കീഴിലുള്ള ഓട്ടോമോട്ടീവ് ഇൻഡസ്ട്രി സ്റ്റാൻഡേർഡ്സ് കമ്മിറ്റിയാണ് (എഐഎസ്സി) ഇതുസംബന്ധിച്ച സുപ്രധാനമായ കരട് രേഖ തയ്യാറാക്കിയത്. പ്രമുഖ വാഹന നിർമ്മാതാക്കളുടെ പ്രതിനിധികളും ഉൾപ്പെടുന്ന സമിതിയാണിത്.

പുതിയ സാങ്കേതികവിദ്യ യാഥാർത്ഥ്യമാകുന്നതോടെ വാഹനം ഓടിക്കുന്നതിനിടയിൽ അശ്രദ്ധ കാണിക്കുന്നവർക്ക് കൃത്യമായ മുന്നറിയിപ്പുകൾ ലഭിക്കും. യാത്രയ്ക്കിടയിൽ ഏതെങ്കിലും ഒരു കൈ ഹാൻഡിലിൽ നിന്ന് മാറ്റിയാൽ മൂന്ന് സെക്കൻഡിനുള്ളിൽ തന്നെ വാഹനത്തിന്റെ ഡിസ്‌പ്ലേയിൽ ദൃശ്യമായ മുന്നറിയിപ്പും അതോടൊപ്പം ഓഡിയോ അലർട്ടും മുഴങ്ങാൻ തുടങ്ങും. ഈ മുന്നറിയിപ്പ് അവഗണിച്ച് എട്ട് സെക്കൻഡ് കഴിഞ്ഞിട്ടും കൈകൾ തിരികെ ഹാൻഡിലിലേക്ക് വെച്ചില്ലെങ്കിൽ വാഹനത്തിന്റെ വേഗത തനിയെ കുറയുന്ന ‘കോസ്റ്റ് ഡൗൺ മോഡ്’ സംവിധാനവും ഇതിലൂടെ പ്രവർത്തിക്കും. കൂടാതെ യാത്ര ആരംഭിക്കുന്നതിന് മുൻപ് ഹാൻഡിലിൽ രണ്ട് കൈകളും കൃത്യമായി വെക്കാതിരുന്നാൽ എൻജിൻ സ്റ്റാർട്ട് ചെയ്യാൻ സാധിക്കാത്ത വിധത്തിലുള്ള ‘ഇഗ്നിഷൻ ലോക്ക്’ സംവിധാനവും ഇതിന്റെ ഭാഗമായി വാഹനങ്ങളിൽ ഉണ്ടാകും.

റോഡപകടങ്ങൾ വൻതോതിൽ കുറയ്ക്കാൻ ഈ പുതിയ സുരക്ഷാ മാനദണ്ഡങ്ങൾ സഹായിക്കുമെന്നാണ് മന്ത്രാലയത്തിന്റെ വിലയിരുത്തൽ. അതേസമയം, ഇത്തരത്തിൽ അത്യാധുനികമായ സുരക്ഷാ ഫീച്ചറുകൾ നിർബന്ധമാക്കുന്നതോടെ വിപണിയിൽ എത്തുന്ന പുതിയ ഇരുചക്ര വാഹനങ്ങളുടെ വിലയിൽ ചെറിയ തോതിലുള്ള വർദ്ധനവ് ഉണ്ടാകുമെന്നും റിപ്പോർട്ടുകൾ സൂചിപ്പിക്കുന്നു. ചെറുപ്പക്കാർക്കിടയിലെ അപകടകരമായ ബൈക്ക് അഭ്യാസങ്ങൾക്കും റൈഡിംഗിനിടയിലെ മൊബൈൽ ഫോൺ ഉപയോഗങ്ങൾക്കും ഈ മാറ്റം വലിയൊരു പരിധി വരെ തടയിടുമെന്നാണ് പ്രതീക്ഷിക്കുന്നത്.