ചന്ദ്രയാൻ-3; വിക്രം ലാൻഡറിൽ നിന്നുള്ള ആദ്യ വിവരങ്ങൾ പങ്കുവെച്ച് ഇസ്രോ; ദക്ഷിണധ്രുവ മേഖലയിലെനിഗൂഢതകൾ പുറത്ത്!

വിക്രം ലാൻഡറിലെ ChaSTE (Chandra’s Surface Thermophysical Experiment) പേലോഡിൽ നിന്നുള്ള ആദ്യ വിവരങ്ങൾ പങ്കുവെച്ച് ഇസ്രോ. ദക്ഷിണധ്രുവ മേഖലയ്‌ക്ക് സമീപത്തെ ചാന്ദ്രോപരിത്തലത്തിലെ താപ വസ്തുക്കളെ കുറിച്ചുള്ള വിവരങ്ങളാണ് ഇസ്രോ പുറത്തുവിട്ടിരിക്കുന്നത്. പ്രതലത്തിന് താഴെ 10 സെന്റീമീറ്റർ ആഴത്തിൽ ആഴ്ന്നിറങ്ങുന്ന Controlled Penetration Mechansim വഴിയാണ് പഠനങ്ങൾ നടക്കുന്നത്. ടെംപറേച്ചർ പ്രോബ് എന്നാണ് ഇതറിയപ്പെടുന്നത്. താപനില അളക്കുന്നതിനായി 10 തരത്തിലുള്ള സെൻസറുകളാണ് ഇതിൽ ഘടിപ്പിച്ചിരിക്കുന്നത്. ഇതാണ് പഠനങ്ങൾ നടത്തുന്നത്.

ഇത്തരത്തിൽ നടത്തിയ പഠനം സംബന്ധിച്ച ഗ്രാഫാണ് ഇസ്രോ പുറത്തുവിട്ടത്. ചന്ദ്രോപരിതലത്തിന്റെ വിവിധ ആഴങ്ങളിലെ താപനില വ്യതിയാനങ്ങൾ ചിത്രീകരിക്കുന്നുണ്ട് ഗ്രാഫിൽ. ചന്ദ്രന്റെ ദക്ഷിണധ്രുവത്തിന് ഇത്തരമൊരു പ്രൊഫൈൽ ഇതാദ്യമാണ്. വിശദമായ നിരീക്ഷണങ്ങൾ നടന്നുവരികയാണ്. അഹമ്മദാബാദിലെ വിഎസ്എസ്സിയുമായി കൂടിച്ചേർന്ന് സ്‌പേസ് ഫിസിക്‌സ് ലബോറട്ടറിയാണ് ഈ പേലോഡ് വികസിപ്പിച്ചത്.

വരുന്ന രണ്ടാഴ്ച കാലം വളരെ നിർണായകമാണെന്ന് ഇസ്രോ മേധാവി എസ്. സേമനാഥ് വ്യക്തമാക്കിയിരുന്നു. വളരെ വ്യക്തമായ വിവരങ്ങളാണ് ലഭ്യമാകുന്നതെന്നും അദ്ദേഹം പറഞ്ഞിരുന്നു, വൈകാതെ കൂടുതൽ വിവരങ്ങൾ പുറത്തുവിടുമെന്നു അറിയിച്ചിട്ടുണ്ട്. ചന്ദ്രയാനുമായുള്ള ആശയവിനിമയം സങ്കീർണമാണ്. ലഭിക്കുന്ന ഡാറ്റകൾ ഡൗൺലോഡ് ചെയ്യാൻ നാല് മണിക്കൂറുകളോളം വേണ്ടി വരുന്നു. ചന്ദ്രനെ കാണുന്ന സമയത്ത മാത്രമാണ് ഇന്ത്യയിലിരുന്ന് ഡാറ്റകൾ സ്വീകരിക്കാൻ കഴിയൂ. ചന്ദ്രൻ അസ്തമിച്ച് കഴിഞ്ഞാൽ ലോകത്തിന്റെ മറ്റ് പല ഭാഗങ്ങളിലുള്ള ഗ്രൗണ്ട് സ്റ്റേഷനുകൾ വഴിയാണ് ഡാറ്റകൾ സ്വീകരിക്കുക. ഇവിടെ നിന്നും ഇസ്രോ ആസ്ഥാനത്തേക്ക് ഡാറ്റകൾ കൈമാറാൻ സമയമെടുക്കുമെന്നും അദ്ദേഹം പറഞ്ഞിരുന്നു