വിജയത്തിന്റെ തിളക്കം കുറച്ച് കോൺഗ്രസിനുള്ളിൽ മുഖ്യമന്ത്രി പോര് ! തലസ്ഥാനത്ത് തലപൊക്കി ‘ഒസിക്ക് ശേഷം കെസി’ ബോർഡുകൾ; അതൃപ്തിയിൽ വി ഡി സതീശൻ, രമേശ് ചെന്നിത്തല വിഭാഗങ്ങൾ

തിരുവനന്തപുരം : നിയമസഭാ തെരഞ്ഞെടുപ്പിൽ വൻ വിജയം നേടിയതിന് പിന്നാലെ കോൺഗ്രസിനുള്ളിൽ മുഖ്യമന്ത്രി പദവിയ്ക്കായി പോര് മുറുകുന്നു. മുൻ മുഖ്യമന്ത്രി ഉമ്മൻ ചാണ്ടിയുടെ പിൻഗാമിയായി കെ.സി. വേണുഗോപാൽ എത്തുമോ എന്ന ചർച്ചകളാണ് ഇപ്പോൾ കൊഴുക്കുന്നത്. തലസ്ഥാനത്തെ പ്രധാന കേന്ദ്രങ്ങളിലെല്ലാം കെ.സി. വേണുഗോപാലിനെ അനുകൂലിച്ചുകൊണ്ടുള്ള ഫ്ലക്സ് ബോർഡുകൾ പ്രത്യക്ഷപ്പെട്ടത് രാഷ്ട്രീയ വൃത്തങ്ങളിൽ വലിയ ചർച്ചയായിരിക്കുകയാണ്. ‘ഒസിക്ക് ശേഷം കെസി’ എന്ന വാചകം രാഷ്ട്രീയ കേരളത്തിൽ പുതിയൊരു അധികാര സമവാക്യത്തിന്റെ സൂചനയായിട്ടാണ് വിലയിരുത്തപ്പെടുന്നത്.

കെപിസിസി ആസ്ഥാനമായ ഇന്ദിരാഭവന് മുന്നിലും നഗരത്തിന്റെ മുക്കിലും മൂലയിലും സാധാരണ പ്രവർത്തകരുടെ പേരിൽ ഇത്തരത്തിലുള്ള പോസ്റ്ററുകൾ ഇടംപിടിച്ചിട്ടുണ്ട്. ഉമ്മൻ ചാണ്ടിയോടുള്ള വൈകാരിക അടുപ്പം കെ.സിയിലേക്ക് തിരിച്ചുവിടാനാണ് ഈ പ്രചാരണത്തിലൂടെ ഒരു വിഭാഗം ലക്ഷ്യമിടുന്നത്. സാധാരണക്കാരായ അണികൾക്കിടയിൽ വേണുഗോപാലിനുള്ള സ്വീകാര്യതയും ദേശീയ രാഷ്ട്രീയത്തിലുള്ള പ്രാഗത്ഭ്യവുമാണ് ഈ നീക്കത്തിന് പിന്നിലെ പ്രധാന ഊർജ്ജം. സ്ഥാനാർത്ഥി നിർണ്ണയ വേളയിൽ കെ.സി പുലർത്തിയ ജാഗ്രത ഭൂരിഭാഗം എംഎൽഎമാരുടെ പിന്തുണ ഉറപ്പാക്കാൻ അദ്ദേഹത്തിന് കരുത്തായിട്ടുണ്ട്.

കെസി ക്യാമ്പിന്റെ നീക്കങ്ങൾക്ക് കരുത്തേകി മുതിർന്ന നേതാവ് ടി.എൻ. പ്രതാപൻ നടത്തിയ പ്രസ്താവനയും ഇതിനിടെ വലിയ ചർച്ചയായി. ‘വെണ്ണ പോലൊരാൾ മുഖ്യമന്ത്രിയാകും’ എന്ന പ്രതാപന്റെ വാക്കുകൾ കെ.സി. വേണുഗോപാലിനെ ഉദ്ദേശിച്ചാണെന്ന് രാഷ്ട്രീയ നിരീക്ഷകർ കരുതുന്നു. ഇതിന് പിന്നാലെ ഗുരുവായൂരപ്പന്റെ ഭക്തനായ നേതാവ് മുഖ്യമന്ത്രിയാകുമെന്ന പ്രചാരണവും പ്രതാപൻ ശക്തമാക്കിയിട്ടുണ്ട്. കെ.സിയുടെ സൗമ്യമായ പെരുമാറ്റവും എല്ലാവരെയും ഒന്നിപ്പിച്ചു കൊണ്ടുപോകാനുള്ള നേതൃശേഷിയും മുഖ്യമന്ത്രി സ്ഥാനത്തേക്ക് അദ്ദേഹത്തിന് മുൻഗണന നൽകുന്നുവെന്ന് വേണുഗോപാൽ അനുകൂലികൾ വാദിക്കുന്നു.

മുഖ്യമന്ത്രി പദത്തിനായി വി.ഡി. സതീശനും രമേശ് ചെന്നിത്തലയും ചർച്ചകളിൽ സജീവമായിരിക്കെ കെ.സി പക്ഷത്തിന്റെ ഈ ‘പവർ പ്ലേ’ ഹൈക്കമാൻഡിനെ പോലും അമ്പരപ്പിച്ചിരിക്കുകയാണ്. ഹൈക്കമാൻഡിലുള്ള നിർണ്ണായക സ്വാധീനവും മുസ്ലീം ലീഗ് ഉൾപ്പെടെയുള്ള ഘടകകക്ഷികളുമായുള്ള അടുത്ത ബന്ധവും കെ.സിക്ക് അനുകൂലമായ ഘടകങ്ങളാണ്. എ ഗ്രൂപ്പിലെ ഒരു വലിയ വിഭാഗം ഉമ്മൻ ചാണ്ടിയുടെ പിൻഗാമിയായി കെ.സിയെ അംഗീകരിച്ചത് ഗ്രൂപ്പ് സമവാക്യങ്ങളിൽ വലിയ മാറ്റങ്ങൾ വരുത്തിയിട്ടുണ്ട്. എങ്കിലും ഫ്ലക്സ് രാഷ്ട്രീയം വിജയത്തിന്റെ തിളക്കം കുറയ്ക്കുമെന്ന നിലപാടിലാണ് സതീശൻ പക്ഷം.

വരും ദിവസങ്ങളിൽ ഹൈക്കമാൻഡ് നിരീക്ഷകർ എംഎൽഎമാരുമായി നടത്തുന്ന ചർച്ചകൾക്ക് ശേഷമേ ഭരണസിംഹാസനത്തിൽ ആര് ഇരിക്കുമെന്ന് വ്യക്തമാകൂ. രാഹുൽ ഗാന്ധിയുടെ വിശ്വസ്തനായ കെ.സി ഡൽഹി വിട്ട് കേരളത്തിന്റെ ഭരണചക്രം ഏറ്റെടുക്കുമോ എന്ന ചോദ്യത്തിനാണ് ഇപ്പോൾ രാഷ്ട്രീയ കേരളം ഉത്തരം തേടുന്നത്. സോഷ്യൽ മീഡിയയിൽ ‘കെസി ലോഡിങ്’ എന്ന പ്രചാരണം കൊഴുക്കുന്നതിനൊപ്പം തലസ്ഥാനത്തെ ഫ്ലക്സ് യുദ്ധവും വരാനിരിക്കുന്ന നിർണ്ണായക രാഷ്ട്രീയ നീക്കങ്ങളുടെ വിളംബരമായി മാറിക്കഴിഞ്ഞു. സംസ്ഥാന രാഷ്ട്രീയത്തിലേക്കുള്ള വേണുഗോപാലിന്റെ മടങ്ങിവരവ് കോൺഗ്രസിനുള്ളിലെ ശക്തിചേരികളെ എങ്ങനെ മാറ്റിമറിക്കുമെന്ന് വരും ദിവസങ്ങളിൽ വ്യക്തമാകും