ചൈന പരുങ്ങലിൽ; മലാക്ക കടലിടുക്കിൽ പട്രോളിങ്ങിനൊരുങ്ങി ഭാരതം

ദില്ലി : ടിയാൻജിനിൽ നടന്ന ഷാങ്ഹായ് കോർപ്പറേഷൻ ഓർഗനൈസേഷൻ (SCO) ഉച്ചകോടിയിൽ ചൈനയുമായുള്ള നയതന്ത്രത്തിൽ തന്ത്രപ്രധാനമായ പുരോഗതി കൈവരിച്ചതിന് ചൈനയ്ക്ക് തലവേദന സൃഷ്ടിക്കുന്ന നീക്കവുമായി ഭാരതം. ഇന്ത്യൻ മഹാസമുദ്രത്തെ ദക്ഷിണ ചൈന കടലുമായി ബന്ധിപ്പിക്കുന്ന തന്ത്രപ്രധാനമായ മലാക്ക കടലിടുക്കിൽ ഇനി മുതൽ ഇന്ത്യയും സംയുക്തമായി പട്രോളിംഗ് നടത്തും. സിംഗപ്പൂർ, മലേഷ്യ, ഇന്തോനേഷ്യ തുടങ്ങിയ രാജ്യങ്ങളുമായി ചേർന്നാണ് ഇന്ത്യയുടെ ഈ നീക്കം. ചൈനയെ സംബന്ധിച്ചിടത്തോളം ഈ പ്രദേശം ഒരു പ്രധാന ദുർബലമായ സ്ഥലമായാണ് കണക്കാക്കപ്പെടുന്നത്.
ഫിലിപ്പീൻസ്, വിയറ്റ്നാം തുടങ്ങിയ രാജ്യങ്ങളുമായി ചൈന നിരന്തരം തർക്കമുന്നയിക്കുന്ന മേഖല കൂടിയാണിത്.

ഇന്ത്യയുടെ 60 ശതമാനത്തോളം വരുന്ന സമുദ്ര വ്യാപാരവും, ഏറെക്കുറെ എല്ലാ എൽഎൻജി ഇറക്കുമതികളും മലാക്ക കടലിടുക്കിലൂടെയാണ് നടക്കുന്നത്. ഈ പാത ചൈനയുടെ ചരക്ക് നീക്കങ്ങൾക്കുള്ള ഒരു തടസ്സമായി മാറാനും സാധ്യതയുണ്ട്. തന്ത്രപരമായി പ്രാധാന്യമുള്ള ഈ പ്രദേശം ഇന്ത്യയുടെ ആൻഡമാൻ & നിക്കോബാർ ദ്വീപുകളിൽ നിന്ന് 600 കിലോമീറ്റർ മാത്രം അകലെയാണ്. ഇന്ത്യൻ നാവികസേന ഈ ദ്വീപുകളിൽ തങ്ങളുടെ സാന്നിധ്യം വിപുലീകരിക്കുന്നുമുണ്ട്.

ചൈനയിൽ നടന്ന SCO ഉച്ചകോടിയിൽ ഷി ജിൻപിങ്ങിനും പുടിനുമൊപ്പം ശ്രദ്ധാകേന്ദ്രമായ ശേഷം മടങ്ങിയെത്തിയ പ്രധാനമന്ത്രി മോദി സിംഗപ്പൂർ പ്രധാനമന്ത്രി ലോറൻസ് വോങ്ങുമായി കൂടിക്കാഴ്ച നടത്തിയിരുന്നു. ഈ കൂടിക്കാഴ്ചയ്ക്ക് ശേഷമാണ് ഈ നിർണായക സംയുക്ത പ്രസ്താവന പുറത്തുവന്നത്.

കഴിഞ്ഞ ഏതാനും വർഷങ്ങളായി തെക്കുകിഴക്കൻ ഏഷ്യൻ സമുദ്രമേഖലയിലെ തങ്ങളുടെ ആധിപത്യം സ്ഥാപിക്കാൻ ശ്രമിക്കുന്ന ചൈനക്ക് ഇന്ത്യൻ മഹാസമുദ്രത്തിൽ ഒരു വെല്ലുവിളി നേരിടേണ്ടിവരുമെന്ന് വിദഗ്ധർ വിലയിരുത്തുന്നു. അമേരിക്കൻ നാവികസേനയോ ഇന്ത്യൻ നാവികസേനയോ ഈ ഭാഗത്ത് ഒരു ഉപരോധം ഏർപ്പെടുത്തിയാൽ അത് ചൈനയുടെ സാമ്പത്തിക സുരക്ഷക്ക് വലിയ ഭീഷണിയാകുമെന്ന് അമേരിക്കൻ ഇൻസ്റ്റിറ്റ്യൂട്ട് ഓഫ് സപ്ലൈ മാനേജ്മെന്റ് പറയുന്നു.

ചൈനയുടെ ഊർജ്ജ ഇറക്കുമതിയുടെ മൂന്നിൽ രണ്ട് ഭാഗവും ഈ പാതയിലൂടെയാണ് നടക്കുന്നത്. ചൈനയുടെ ഏകദേശം 3.5 ട്രില്യൺ ഡോളർ വരുന്ന വാർഷിക ഊർജ്ജ ഇറക്കുമതിയെ ഇത് ബാധിക്കാൻ സാധ്യതയുണ്ട്. ഗ്രേറ്റ് നിക്കോബാർ ദ്വീപിൽ നിന്ന് മലാക്ക കടലിടുക്കിലേക്ക് വെറും 600 കിലോമീറ്റർ മാത്രമുള്ളതിനാൽ ഇന്ത്യക്ക് ഈ മേഖലയിൽ തന്ത്രപരമായ മുൻതൂക്കമുണ്ട്.ഇന്ത്യന്‍ മഹാസമുദ്രത്തിലേക്ക് കടന്നുകയറാന്‍ ചൈന പലപ്പോഴായി ശ്രമിക്കുന്നുണ്ട്. അതിന് മറുപടിയായി ദക്ഷിണ ചൈനാ കടലില്‍ ഇന്ത്യയും ഇടപെട്ട് തുടങ്ങിയിരുന്നു. ഇതിന്റെ ഭാഗമാണ് മലാക്ക കടലിടുക്കിലെ ശക്തിപ്രകടനത്തിന് ഒരുങ്ങുന്നത്.

ഇതാദ്യമായല്ല ഇന്ത്യൻ യുദ്ധക്കപ്പലുകൾ ഈ മേഖലയിൽ എത്തുന്നത്. 2022-ൽ ഇന്ത്യൻ നാവികസേന ഇന്തോനേഷ്യൻ നാവികസേനയുമായി ചേർന്ന് ആൻഡമാൻ കടലിലും മലാക്ക കടലിടുക്കിലും സംയുക്ത പട്രോളിംഗ് നടത്തിയിരുന്നു. സാഗർ (SAGAR) സംരംഭത്തിലൂടെ ഇന്ത്യൻ മഹാസമുദ്രത്തിലെ നാവിക സേനകളെ ഒരുമിച്ച് കൊണ്ടുവരാനും ഇന്ത്യ ശ്രമിക്കുന്നുണ്ട്.