ചൈനീസ് വിദേശകാര്യ മന്ത്രി വാങ് യീ ഭാരതത്തിൽ !നാളെ പ്രധാനമന്ത്രി നരേന്ദ്രമോദിയുമായി കൂടിക്കാഴ്ച

ദില്ലി : ഗാൽവൻ താഴ്‌വരയിലെ സംഘർഷത്തിന് ശേഷം കലുഷിതമായ ഇന്ത്യ-ചൈന നയതന്ത്രബന്ധം സാധാരണ നിലയിലേക്ക് കൊണ്ടുവരാനുള്ള നീക്കങ്ങൾ സജീവമാക്കി ചൈനീസ് വിദേശകാര്യ മന്ത്രി വാങ് യീ ഭാരതത്തിലെത്തി . നാളെ പ്രധാനമന്ത്രി നരേന്ദ്ര മോദിയുമായി അദ്ദേഹം കൂടിക്കാഴ്ച നടത്തും. മോദിയുടെ ചൈനാ സന്ദർശനത്തിന് മുന്നോടിയായി നടക്കുന്ന ഈ യോഗം ഏറെ നിർണ്ണായകമാണ്.

നാളെ പ്രധാനമന്ത്രി മോദിയെ കാണുന്നതിന് മുൻപായി വാങ്, വിദേശകാര്യ മന്ത്രി എസ്. ജയശങ്കർ, ദേശീയ സുരക്ഷാ ഉപദേഷ്ടാവ് അജിത് ഡോവൽ എന്നിവരുമായി വെവ്വേറെ ചർച്ചകൾ നടത്തും. അതിർത്തിയിലെ നിലവിലെ സ്ഥിതിഗതികൾ, വ്യാപാരം, വിമാന സർവീസുകൾ പുനരാരംഭിക്കൽ തുടങ്ങിയ വിഷയങ്ങൾ ഈ കൂടിക്കാഴ്ചകളിൽ ചർച്ചയാകും. 2020-ലെ ഗാൽവൻ താഴ്‌വരയിലെ സംഘർഷത്തിന് ശേഷം വഷളായ ഉഭയകക്ഷി ബന്ധം പുനഃസ്ഥാപിക്കാനുള്ള ശ്രമങ്ങളുടെ ഭാഗമായാണ് ചൈനീസ് വിദേശകാര്യ മന്ത്രിയുടെ സന്ദർശനത്തെ ഇന്ത്യ കാണുന്നത്.

നാളെ രാവിലെ 11 മണിക്ക് വാങ്ങും എൻഎസ്എ ഡോവലും തമ്മിൽ അതിർത്തി തർക്കങ്ങളുമായി ബന്ധപ്പെട്ട 24-ാമത് സ്പെഷ്യൽ റെപ്രസെന്റേറ്റീവ്സ് (SR) ചർച്ച നടക്കും. അതിർത്തിയിൽ സമാധാനം നിലനിർത്തുന്നതിനായുള്ള പുതി നടപടികൾ ഇരുവരും ചർച്ച ചെയ്യുമെന്നാണ് സൂചന. കിഴക്കൻ ലഡാക്കിലെ സംഘർഷ മേഖലകളിൽ നിന്ന് സൈന്യത്തെ പിൻവലിച്ചെങ്കിലും, യഥാർത്ഥ നിയന്ത്രണ രേഖയിൽ (LAC) നിലവിൽ ഇരുവശത്തുമായി 50,000 മുതൽ 60,000 വരെ സൈനികർ ഇപ്പോഴുമുണ്ട്.

ഓഗസ്റ്റ് 31, സെപ്റ്റംബർ 1 തീയതികളിൽ ചൈനയിൽ നടക്കുന്ന ഷാങ്ഹായ് കോഓപ്പറേഷൻ ഓർഗനൈസേഷൻ ഉച്ചകോടിയിൽ പ്രധാനമന്ത്രി നരേന്ദ്രമോദി പങ്കെടുക്കുന്നുണ്ട്. അതിനു മുന്നോടിയായി നടത്തുന്ന വാങ്ങിന്റെ ഈ സന്ദർശനം ഏറെ പ്രാധാന്യമർഹിക്കുന്നു.

കൊവിഡ്-19 മഹാമാരിക്ക് ശേഷം നിർത്തിവെച്ച ഇന്ത്യ-ചൈന നേരിട്ടുള്ള വിമാന സർവീസുകൾ പൂർണ്ണമായും പുനരാരംഭിക്കുന്നതുൾപ്പെടെയുള്ള കാര്യങ്ങളും ചർച്ചയാകും. കൂടാതെ, ഇന്ത്യൻ ഉത്പന്നങ്ങൾക്ക് ട്രംപ് ഭരണകൂടം 50% തീരുവ ഏർപ്പെടുത്തിയതിനെ തുടർന്ന് ഇന്ത്യ-അമേരിക്ക ബന്ധത്തിൽ വർധിച്ചുവരുന്ന പിരിമുറുക്കത്തിനിടയിലാണ് വാങ്ങിന്റെ സന്ദർശനം എന്നതും ശ്രദ്ധേയമാണ്.

കഴിഞ്ഞ വർഷം ഒക്ടോബർ 23-ന് കസാഖ്സ്ഥാനിലെ കസാനിൽ നടന്ന കൂടിക്കാഴ്ചയിൽ പ്രധാനമന്ത്രി മോദിയും ചൈനീസ് പ്രസിഡന്റ് ഷി ജിൻപിംഗും തമ്മിൽ നടത്തിയ ആശയവിനിമയത്തിൽ നയതന്ത്രം പുനരുജ്ജീവിപ്പിക്കാൻ തീരുമാനിച്ചിരുന്നു. അതിനുശേഷമാണ് ഈ നിർണായക നീക്കങ്ങൾ നടക്കുന്നത്.