കോഴിക്കോട് ബീച്ച് ആശുപത്രിയിൽ ഹൗസ് സർജൻമാരുടെ കയ്യാങ്കളി; ചികിത്സ വൈകിയെന്ന ആരോപണവുമായി രോഗികളും കൂട്ടിരിപ്പുകാരും

കോഴിക്കോട് ∙ ഗവ.ജനറൽ (ബീച്ച്) ആശുപത്രിയിൽ ഹൗസ് സർജൻമാർ തമ്മിൽ കയ്യാങ്കളി. ഒരാൾ താമസിസിച്ചെത്തിയതിനെ മറ്റൊരു ഹൗസ് സർജൻ ചോദ്യം ചെയ്തതാണ് വാക്കേറ്റത്തിനും തുടർന്നുള്ള അടിപിടിയിലേക്കും കാര്യങ്ങൾ എത്തിച്ചത്. രാത്രി ഏഴു മണിയോടെയായിരുന്നു സംഭവം. അത്യാഹിത വിഭാഗത്തിൽ രോഗികളുടെ മുൻപിൽ തുടങ്ങിയ വാക്കേറ്റവും അടിപിടിയും ഹൗസ് സർജൻമാരുടെ മുറിയിൽ വച്ചും തുടർന്നുവെന്നാണ് വിവരം. അത്യാഹിത വിഭാഗത്തിലെ ഡ്യൂട്ടി ഡോക്ടർ ഉൾപ്പെടെ എത്തിയാണ് രംഗം ശാന്തമാക്കിയത്.അടിപിടിയെ തുടർന്നു ചികിത്സ വൈകിയതായി രോഗികളും അവരുടെ കൂട്ടിരിപ്പുകാരും ആരോപിച്ചു.

സംഭവത്തെ കുറിച്ച് അന്വേഷിക്കുമെന്നും എന്നാൽ രോഗികൾക്ക് ചികിത്സ വൈകിയിട്ടില്ലെന്നും ആശുപത്രി അധികൃതർ വ്യക്തമാക്കി